'ಲೈಗರ್' OTT: 10 ನಿಮಿಷಕ್ಕಿಂತ ಜಾಸ್ತಿ ನೋಡೋಕ್ಕಾಗ್ತಿಲ್ಲ, ಪುರಿ ನಿಂದೇ ಸಿನಿಮಾನಾ, ವಿಜಿ ಸ್ಕ್ರಿಪ್ಟ್ ಕೇಳಿದ್ಯಾ?

ಸಿನಿಮಾ ನೋಡಿದವರು ತಲೆ ಚಚ್ಚಿಕೊಳ್ಳುತ್ತಿದ್ದಾರೆ

ದೊಡ್ಡ ಸಿನಿಮಾ ಓಟಿಟಿಗೆ ಬರ್ತಿದೆ ಅಂದಾಗ ಸಹಜವಾಗಿಯೇ ಕುತೂಹಲ ಇರುತ್ತದೆ. ಕೊನೆ ಪಕ್ಷ ಥಿಯೇಟರ್‌ನಲ್ಲಿ ನೋಡದೇ ಇರುವವರಾದರೂ ಸಿನಿಮಾ ನೋಡಲು ಮುಂದಾಗುತ್ತಾರೆ. ಆದರೆ 'ಲೈಗರ್' ಸಿನಿಮಾ ನೋಡಲು ಯಾರೊಬ್ಬರು ಮನಸ್ಸು ಮಾಡುತ್ತಿಲ್ಲ. ನೋಡಿದವರು ಕೂಡ ಬೇಸರ ವ್ಯಕ್ತಪಡಿಸ್ತಿದ್ದಾರೆ. ರಿಲೀಸ್‌ಗೂ ಮೊದಲು ನೀವು ಕೊಟ್ಟ ಬಿಲ್ಡಪ್‌ಗೂ ಈ ಸಿನಿಮಾಗೂ ಏನಾದ್ರು ಸಂಬಂಧ ಇದ್ಯಾ ಅಂತ ವ್ಯಂಗ್ಯ ಮಾಡಿದ್ದಾರೆ.

ಮತ್ತೆ ಟ್ರೋಲ್ ಆಗ್ತಿದೆ 'ಲೈಗರ್'

'ಲೈಗರ್' ಸಿನಿಮಾ ರಿಲೀಸ್ ಆದ ದಿನದಿಂದಲೂ ಸಿಕ್ಕಾಪಟ್ಟೆ ಟ್ರೋಲ್ ಆಗಿತ್ತು. ಮಾತು ನಿಲ್ಲಿಸಿ ಕೆಲಸ ಮಾಡಬೇಕಿತ್ತು. ಕೆಲಸ ಮಾಡದೇ ಬರೀ ಬಡಾಯಿ ಕಚ್ಚಿಕೊಂಡಿದ್ರಿ, ಅದಕ್ಕೆ ಹಿಂಗಾಯ್ತು ಅಂತೆಲ್ಲಾ ಗೇಲಿ ಮಾಡಿದ್ದರು. ಇದೀಗ ಸಿನಿಮಾ ಓಟಿಟಿಗೆ ಬಂದರೂ ಟ್ರೋಲ್ ಮಾತ್ರ ತಪ್ಪುತ್ತಿಲ್ಲ. '10 ನಿಮಿಷಕ್ಕಿಂತ ಜಾಸ್ತಿ ಸಿನಿಮಾ ನೋಡೋಕ್ಕಾಗ್ತಿಲ್ಲ'. 'ಸಿನಿಮಾ ನೋಡಿದ್ರೆ ವಾಂತಿ ಬರುವಂತಾಗುತ್ತಿದೆ'. 'ವಿಜಯ್ ದೇವರಕೊಂಡ ನಿಜಕ್ಕೂ ನೀನು ಸ್ಕ್ರಿಪ್ಟ್ ಕೇಳಿ ಸಿನಿಮಾ ಒಪ್ಪಿಕೊಂಡ?' 'ಈ ಸಿನಿಮಾ ನೋಡಿದ್ರೆ ಟೈಂ ವೇಸ್ಟ್' ಅಂತೆಲ್ಲಾ ಕಾಮೆಂಟ್ ಮಾಡಿ ಟ್ರೋಲ್ ಮಾಡ್ತಿದ್ದಾರೆ.

ಓಟಿಟಿಯಲ್ಲಿ ನೋಡಿ ಎಂದ ಚಾರ್ಮಿಗೂ ಪಾಠ

ಕೆಲ ದಿನಗಳ ಹಿಂದೆ ಟ್ರೋಲ್‌ಗೆ ಬೇಸತ್ತು, ಸೋಶಿಯಲ್ ಮೀಡಿಯಾದಿಂದ ಬ್ರೇಕ್ ತೆಗೆದುಕೊಳ್ಳುವುದಾಗಿ ಹೇಳಿದ್ದ ಚಾರ್ಮಿ ಮತ್ತೆ ವಾಪಸ್ ಬಂದಿದ್ದರು. ಇದೀಗ ಸಿನಿಮಾ ಓಟಿಟಿಗೆ ಬಂದಿದೆ ಎಂದು ಪೋಸ್ಟ್ ಮಾಡಿದ್ದಾರೆ. ಕಾಮೆಂಟ್‌ ಬಾಕ್ಸ್‌ನಲ್ಲಿ ಚಾರ್ಮಿಗೂ ನೆಟ್ಟಿಗರು ಪಾಠ ಮಾಡಿದ್ದಾರೆ. 'ಇನ್ನು ಮುಂದೆ ಸರಿಯಾಗಿ ಕಥೆ ಮಾಡಿಕೊಂಡು ಸಿನಿಮಾ ಮಾಡಿ', 'ನೀನು, ಪುರಿ, ವಿಜಯ್ ದೇವರಕೊಂಡ ಒಮ್ಮೆ ಲೈಗರ್ ಸಿನಿಮಾ ನೋಡಿ, ಏನೆಲ್ಲಾ ಮಿಸ್ಟೇಕ್ ಆಗಿದೆ ಅಂತ ತಿಳ್ಕೊಂಡು ಮುಂದೆ ಒಳ್ಳೆ ಸಿನಿಮಾ ಮಾಡಿ' ಎಂದು ಬಿಟ್ಟಿ ಸಲಹೆ ಕೊಟ್ಟಿದ್ದಾರೆ.

ಸಿನಿಮಾ ನೋಡಿ ಅಭಿಮಾನಿಗಳ ಮೆಚ್ಚುಗೆ

ಇನ್ನು ಓಟಿಟಿಗೆ ಬಂದಿರೋ 'ಲೈಗರ್' ಸಿನಿಮಾ ಇಷ್ಟೆಲ್ಲಾ ಟ್ರೋಲ್ ಆಗುತ್ತಿದ್ದರೂ ಕೆಲವರು ಮಾತ್ರ ಸಿನಿಮಾ ಚೆನ್ನಾಗಿದೆ ಎನ್ನುತ್ತಿದ್ದಾರೆ. 'ಇಷ್ಟೆಲ್ಲಾ ನೆಗೆಟಿವ್ ಟ್ರೋಲ್ ಮಾಡುವಂತಹ ಕೆಟ್ಟ ಸಿನಿಮಾ ಏನಲ್ಲ'. 'ಅದಕ್ಕೆ ಹೇಳುವುದು ರಿವ್ಯೂ ನಂಬಬೇಡಿ ಅಂತ, ಲೈಗರ್ ಸಿನಿಮಾ ಚೆನ್ನಾಗಿದೆ' ಎನ್ನುತ್ತಿದ್ದಾರೆ. ಎಲ್ಲಕ್ಕಿಂತ ಮುಖ್ಯವಾಗಿ ವಿಜಯ್ ದೇವರಕೊಂಡ ಪರಿಶ್ರಮದ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸುತ್ತಿದ್ದಾರೆ.