'ಗೋಲಿಸೋಡ' ಕುಡಿದ ವಿಮರ್ಶಕರು ಥ್ರಿಲ್ಲ್ ಆದ್ರಾ.?

'ಕಿಕ್ ಕೊಡುವ ಗೋಲಿಸೋಡ' -ವಿಜಯ ಕರ್ನಾಟಕ

ಚಿತ್ರದ ಹೀರೋ ಅಂದರೆ ಕತೆ ಮತ್ತು ಸ್ಕ್ರಿಪ್ಟ್‌. ಕಸ, ತಿಪ್ಪೆಗಳ ನಡುವೆಯೂ ಹೃದಯ ಕಲಕುತ್ತದೆ. ಹುಡುಗರ ನಡುವಿನ ಸ್ನೇಹ ಸ್ಟ್ರಾಂಗ್. ಪ್ರಾಣಕ್ಕೆ ಪ್ರಾಣ ಕೊಡುವ ಸ್ನೇಹಕ್ಕೆ ಪ್ರೇಕ್ಷಕ ಫಿದಾ ಆಗುತ್ತಾನೆ. ಎಲ್ಲರೂ ರೌಡಿಗಳ ಹೊಡೆತಕ್ಕೆ ಚಿಂದಿಯಾಗಿ ದಿಕ್ಕಾಪಾಲಾದರೂ ಮತ್ತೆ ಸೆಟೆದು ನಿಲ್ಲುವ ಅವರೊಳಗಿನ ಇಚ್ಛಾಶಕ್ತಿ ಪ್ರೇಕ್ಷಕನಿಗೆ ಥ್ರಿಲ್ ನೀಡುತ್ತದೆ. ರೌಡಿಗಳನ್ನು ಅವರು ಚಾಣಾಕ್ಷತನದಿಂದ ದುರ್ಬಲರನ್ನಾಗಿ ಮಾಡುತ್ತಾರೆ. ಅಂದಹಾಗೆ, ಚಿತ್ರದಲ್ಲಿ ರಕ್ತ ಸಂಬಂಧಿಗಳಲ್ಲದವರ ನಡುವಿನ ಮನುಷ್ಯ ಪ್ರೀತಿ ಮನತಟ್ಟುತ್ತದೆ. ಎಲ್ಲೂ ಬೋರ್‌ ಹೊಡೆಸದೆ, ಕ್ಷಣಕ್ಷಣವೂ ಕುತೂಹಲ ಕೆರಳಿಸುವ ಸ್ಕ್ರಿಪ್ಟ್‌ ಸಹಜವಾಗಿದೆ. ಎಲ್ಲರ ಅಭಿನಯವೂ ಚೆನ್ನಾಗಿದೆ. ಬಿಗ್‌ ಬಜೆಟ್‌ ಸಿನಿಮಾಗಳಲ್ಲಿ ಕಣ್ಣಿಗೆ ಕಲರ್‌ಫುಲ್‌ ಅನ್ನಿಸಬಹುದು. ಆದರೆ, ಈ ಚಿತ್ರದ ತಾಜಾತನ ಮೈಮರೆಸುತ್ತವೆ. ಮನರಂಜನೆಯ ಬೇರೆ ಆಯಾಮಗಳನ್ನು ಅರಿಯಲು ಈ ಸಿನಿಮಾ ನೋಡಿ. ರೇಟಿಂಗ್: 3.5/5.-ಪದ್ಮಾ ಶಿವಮೊಗ್ಗ.

'ಮಕ್ಕಳ ಉತ್ಸಾಹದ ಬಂಡವಾಳ' -ಪ್ರಜಾವಾಣಿ

ಕಸುಗಾಯಿಯ ಒಗರು ಹಾಗೂ ತಾಜಾತನ ಗೋಲಿಸೋಡದ ಗುಣ. ಈ ಪಾನೀಯವನ್ನು ಕುಡಿದಾಗ ಒಂದು ರೀತಿಯ ಚೈತನ್ಯದ ಅನುಭವವಾಗುತ್ತದೆ. ‘ಗೋಲಿಸೋಡ' ಚಿತ್ರದಲ್ಲೂ ‘ರಾ' ಎನ್ನಬಹುದಾದ ಈ ತಾಜಾತನವಿದೆ. ಕಥೆಯಲ್ಲೂ ಚೈತನ್ಯವಿದೆ. ತಮಿಳಿನ ಯಶಸ್ವಿ ಚಿತ್ರ ‘ಗೋಲಿಸೋಡ'ವನ್ನು ಅದೇ ಹೆಸರಿನಲ್ಲಿ ಕನ್ನಡಕ್ಕೆ ತಂದಿದ್ದಾರೆ ನಿರ್ದೇಶಕ ರಘುಜಯ. ಬೆಂಗಳೂರಿನ ಕೆ.ಆರ್. ಮಾರುಕಟ್ಟೆಯಲ್ಲಿ ಮೂಟೆ ಹೊತ್ತು ದಿನದ ಅನ್ನ ದುಡಿಯುವ ದುಬ್ಬ, ಮಂಜ, ಕ್ಯಾತ, ಚಿಕ್ಕ ಎಂಬ ನಾಲ್ಕು ಹುಡುಗರ ಕಥೆ ‘ಗೋಲಿಸೋಡ'ದಲ್ಲಿದೆ. ಹದಿನಾಲ್ಕು-ಹದಿನಾರು ವರ್ಷಗಳ ಈ ಅನಾಥ ಮಕ್ಕಳು ಮೂಟೆ ಹೊರುವುದರ ಹೊರತಾಗಿಯೂ ಇನ್ನೇನಾದರೂ ಮಾಡಬೇಕು ಎಂದುಕೊಳ್ಳುವಲ್ಲಿಂದ ಕಥೆ ಚುರುಕು ಪಡೆದುಕೊಳ್ಳುತ್ತದೆ.-ಗಣೇಶ ವೈದ್ಯ.

'ಮಾರುಕಟ್ಟೆಯೊಳಗಿನ ಮನೋವ್ಯಾಪಾರ' -ಕನ್ನಡ ಪ್ರಭ

ಪುಟ್ಟಕ್ಕನ ಆಶ್ರಯದಲ್ಲಿ ಮೂಟೆ ಹೊರುತ್ತಾ ನೆಲೆ ಕಂಡುಕೊಂಡ ಹುಡುಗರು, ಹೊಸದೊಂದು ಕೆಲಸಕ್ಕೆ ಮುಂದಾಗುವುದು, ಅದಕ್ಕೆ ಗೌಡರ ಗೂಂಡಾ ಪಡೆಯಿಂದ ಅಡ್ಡಿಯಾಗುವುದು, ಕೊನೆಗೆ ಚಿಗುರು ಮೀಸೆ ಹುಡುಗರು ಆ ಗೂಂಡಾಗಿರಿ ಮೇಲೆರಗಿ ಒದೆ ತಿಂದು ದಿಕ್ಕಾಪಾಲಾಗುವ ಸನ್ನಿವೇಶಗಳು ಚಿತ್ರದ ಮೊದಲಾರ್ಧದಲ್ಲಿ ಕಾಣಸಿಗುತ್ತವೆ. ಹಾಸ್ಯದ ಜೊತೆ ಅಲ್ಲಲ್ಲಿ ಈ ಸನ್ನಿವೇಶಗಳನ್ನು ತಂದಿರುವ ನಿರ್ದೇಶಕರ ಪ್ರಯತ್ನ ಬೋರ್ ಎನಿಸಿದರೂ, ದ್ವಿತೀಯಾರ್ಧ ರೋಚಕ. ವಿಕ್ರಮ್, ಸಿಳ್ಳೆ ಮಂಜ, ಚಂದನ್, ಹೇಮಂತ್ ಪೈಕಿ ಸಿಳ್ಳೆ ಮಂಜ ಅಭಿನಯದ ಬಗ್ಗೆ ಮರು ಮಾತಿಲ್ಲ. ಉಳಿದವರ ಅಭಿನಯದಲ್ಲಿ ಆ ತೀವ್ರತೆ ಕಾಣಿಸದು. ಪೋಷಕ ಪಾತ್ರಗಳಲ್ಲಿ ತಾರಾ, ಮಧು ಸೂಧನ್, ಡ್ಯಾನಿ ಕುಟ್ಟಪ್ಪ ಹೆಚ್ಚು ಸೆಳೆಯುತ್ತಾರೆ. ನಾಯಕಿ ಪ್ರಿಯಾಂಕ ಜೈನ್, ಹಾಗೂ ಆಕೆಯ ಗೆಳತಿಯಾಗಿ ದಿವ್ಯಾ ರಂಗಾಯಣ ಅವರ ಪಾತ್ರಗಳು ಪ್ರೇಕ್ಷಕರ ಮನಗೆಲ್ಲುತ್ತದೆ. ರೇಟಿಂಗ್: 3/5.-ದೇಶಾದ್ರಿ ಹೊಸ್ಮನೆ.

'ಮಕ್ಕಳ ಮಾರಾಮಾರಿಯ ವೈಭವೀಕರಣ' -ವಿಜಯವಾಣಿ

'ಗೋಲಿಸೋಡ' ನೋಡುವುದಕ್ಕೆ ತುಂಬಾ ಶಾಂತವಾಗಿರುತ್ತದೆ. ಆದರೆ ಒಮ್ಮೆ ಕುಲುಕಿದರೆ ಅದರೊಳಗಿನ ಒತ್ತಡ ಏನೆಂಬುದು ಗೊತ್ತಾಗುತ್ತದೆ. ಚಿತ್ರದಲ್ಲಿ ಒಂದು ಪಾತ್ರ 'ಗೋಲಿಸೋಡ'ವನ್ನು ಹೀಗೆ ಬಣ್ಣಿಸುತ್ತದೆ. ಇದಕ್ಕೆ ಅನ್ವರ್ಥವಾಗಿ ಚಿತ್ರದಲ್ಲಿ ನಾಲ್ಕು ಮಕ್ಕಳ ಕಥೆ ಇದೆ. ಒಂದು ಹಂತದವರೆಗೂ ಎಲ್ಲಾ ಅನ್ಯಾಯ, ಹಿಂಸೆ ಸಹಿಸಿಕೊಳ್ಳುವ ಮಕ್ಕಳು ತಿರುಗಿಬಿದ್ದರೆ? ಇದೇ 'ಗೋಲಿಸೋಡ'ದ ಒನ್ ಲೈನ್ ಸ್ಟೋರಿ. ರೇಟಿಂಗ್: 2/5.-ಅವಿನಾಶ್ ಜಿ.ರಾಮ್.

'ಸಂಯಮದ ನಟನೆಯಿಂದ ಸಹ್ಯವಾಗುವ ಸರಳ ಕತೆ' -ಉದಯವಾಣಿ

ಚಿಕ್ಕವರಿಗೆ ಭಯ ಇರುತ್ತೆ; ದೊಡ್ಡವರಿಗೆ ಜವಾಬ್ದಾರಿ ಇರುತ್ತೆ; ಚಿಗುರು ಮೀಸೆ ಹುಡುಗರಿಗೆ? ಭಯವೂ ಇಲ್ಲ, ಜವಾಬ್ದಾರಿಯೂ ಇಲ್ಲ. ಅವರಿಗೆ ಛಲ ಇರುತ್ತೆ ಉತ್ಸಾಹ ಇರುತ್ತೆ. ಎಲ್ಲಕ್ಕಿಂತ ಹೆಚ್ಚಾಗಿ ಏನ್ ಬೇಕಾದರೂ ಆಗಲಿ, ಫೇಸ್ ಮಾಡೋಣ ಎನ್ನುವ ಹುಂಬತನ ವಿಪರೀತ ಇರುತ್ತದೆ. ಅಂತಹ ಹುಂಬ ಹುಡುಗರ ಕಥೆಯೇ ಈ 'ಗೋಲಿಸೋಡ'. ಮಾರ್ಕೆಟ್ ನಲ್ಲಿ ಕೂಲಿ ಕೆಲಸ ಮಾಡಿ ಬದುಕು ಸಾಗಿಸುವ ನಾಲ್ವರು ಅನಾಥ ಹುಡುಗರನ್ನು ಕೆಣಕಿದರೆ ಏನಾಗಬಹುದು? ಅದೇ ಈ ಚಿತ್ರದ ಕಥೆ ಎಂದು ಸುಲಭವಾಗಿ ಹೇಳಿ ಬಿಡಬಹುದು. ಆದರೆ, 'ಗೋಲಿಸೋಡ' ಗಮನ ಸೆಳೆಯುವುದು ಇ ಒನ್ ಲೈನ್ ನಿಂದಲ್ಲ, ಚಿತ್ರಕಥೆಯಿಂದ ಎಂದರೆ ತಪ್ಪಿಲ್ಲ. ಏಕೆಂದರೆ, ಬಹಳ ಸರಳವಾಗಿ ಕಾಣುವ ಒನ್ ಲೈನ್ ನಲ್ಲಿ ಸಿಕ್ಕಾಪಟ್ಟೆ ಟ್ವಿಸ್ಟ್ ಗಳು ಇವೆ. ಹಾಗಾಗಿ 'ಗೋಲಿಸೋಡ' ಬೇರೆ ಶೈಲಿಯ ಸಿನಿಮಾ ಎಂದರೆ ತಪ್ಪಿಲ್ಲ. -ಚೇತನ್ ನಾಡಿಗೇರ್.