ಜಪಾನ್‌ನಲ್ಲಿ 'RRR' ಶತದಿನೋತ್ಸವ: ಎಷ್ಟು ಥಿಯೇಟರ್‌? ಒಟ್ಟು ಕಲೆಕ್ಷನ್ ಎಷ್ಟು?

ಜಪಾನ್‌ನಲ್ಲಿ 'RRR' ಶತದಿನೋತ್ಸವ

ಹೌದು ಅಕ್ಟೋಬರ್ 21ಕ್ಕೆ ಜಪಾನ್‌ನಲ್ಲಿ ರಿಲೀಸ್ ಆಗಿದ್ದ 'RRR' ಸಿನಿಮಾ ಇದೀಗ 100 ದಿನ ಪೂರೈಸಿದೆ. ಈ ಬಗ್ಗೆ ಟ್ವೀಟ್ ಮಾಡಿರುವ ಮೌಳಿ "ಆ ದಿನಗಳಲ್ಲಿ, ಒಂದು ಸಿನಿಮಾ 100 ದಿನ, 175 ದಿನಗಳು ಓಡುವುದು ದೊಡ್ಡ ವಿಷಯವಾಗಿತ್ತು. ಕಾಲಾನಂತರದಲ್ಲಿ ವ್ಯಾಪಾರದ ವಿನ್ಯಾಸವೇ ಬದಲಾಯಿತು. ಆ ಸವಿ ನೆನಪುಗಳು ಮಾಯವಾಗಿತ್ತು. ಆದರೆ ಜಪಾನಿನ ಸಿನಿ ಅಭಿಮಾನಿಗಳು ನಮಗೆ ಆ ಸಂತೋಷವನ್ನು ಮರುಕಳಿಸುವಂತೆ ಮಾಡುತ್ತಿದ್ದಾರೆ. ಲವ್ ಯು ಜಪಾನ್" ಎಂದು ಬರೆದುಕೊಂಡಿದ್ದಾರೆ.

42 ಥಿಯೇಟರ್‌ನಲ್ಲಿ 100 ದಿನ

ನೇರವಾಗಿ ಒಟ್ಟು 42 ಥಿಯೇಟರ್‌ಗಳಲ್ಲಿ ಸಿನಿಮಾ 100 ದಿನ ಪ್ರದರ್ಶನ ಕಂಡಿದೆ. ಶಿಫ್ಟ್‌ಗಳಲ್ಲಿ ಬದಲಾಗಿ 114 ಥಿಯೇಟರ್‌ಗಳಲ್ಲಿ ಸಿನಿಮಾ 100 ದಿನ ಪೂರೈಸಿದೆ. ಒಟ್ನಲ್ಲಿ ಜಪಾನ್‌ನಲ್ಲಿ 'RRR' ಸಿನಿಮಾ ಸೂಪರ್ ಹಿಟ್ ಆಗಿದೆ. ಈ ಸಾಧನೆ ಮಾಡಿದ ಮೊದಲ ಭಾರತೀಯ ಸಿನಿಮಾ ಎನ್ನುವ ಹೆಗ್ಗಳಿಕೆಗೆ ಪಾತ್ರವಾಗಿದೆ. 3 ತಿಂಗಳ ಹಿಂದೆ ಮೌಳಿ, ಚರಣ್, ತಾರಕ್ ಜಪಾನ್‌ಗೆ ಹೋಗಿ ಪ್ರಚಾರ ಮಾಡಿ ಬಂದಿದ್ದರು. ಚಿತ್ರದಕ್ಕೆ ಒಳ್ಳೆ ಓಪನಿಂಗ್ ಏನು ಸಿಕ್ಕರಲಿಲ್ಲ. ಆದರೆ ನಿಧಾನವಾಗಿ ಟೇಕಾಫ್ ಆಗಿತ್ತು. ಸಿನಿಮಾ ಅಂದಾಜು 45 ಕೋಟಿಗೂ ಅಧಿಕ ಕಲೆಕ್ಷನ್ ಮಾಡಿದೆ ಎನ್ನಲಾಗ್ತಿದೆ.

'ಮುತ್ತು' ದಾಖಲೆ ಮುರಿದ 'RRR'

ಇಷ್ಟು ವರ್ಷ ಜಪಾನ್‌ನಲ್ಲಿ ಅತಿ ಹೆಚ್ಚು ಕಲೆಕ್ಷನ್ ಮಾಡಿದ ಭಾರತದ ಸಿನಿಮಾ ಎನ್ನುವ ಹೆಗ್ಗಳಿಕೆ ರಜನಿಕಾಂತ್ ನಟನೆಯ 'ಮುತ್ತು' ಚಿತ್ರದಾಗಿತ್ತು. 24 ವರ್ಷಗಳ ನಂತರ ಆ ದಾಖಲೆಯನ್ನು ಮುರಿದು 'RRR' ಮೊದಲ ಸ್ಥಾನಕ್ಕೇರಿದೆ. ಇನ್ನುಳಿದಂತೆ 'ಬಾಹುಬಲಿ'-2, 'ತ್ರೀ ಈಡಿಯಟ್ಸ್', 'ಇಂಗ್ಲೀಷ್ ವಿಂಗ್ಲೀಷ್' ಸಿನಿಮಾಗಳು ಕೂಡ ಭರ್ಜರಿ ಕಲೆಕ್ಷನ್ ಮಾಡಿವೆ. ಕೋಟಿ ಕೋಟಿ ಕೊಳ್ಳೆ ಹೊಡೆದಿವೆ.

ರಾಮ್‌-ಭೀಮ್ ಬ್ರೋಮ್ಯಾನ್ಸ್‌

ಅಲ್ಲೂರಿ ಸೀತಾ ರಾಮರಾಜು, ಕೋಮರಂ ಭೀಮ್ ಎನ್ನುವ ಇಬ್ಬರು ಸ್ವಾತಂತ್ರ್ಯ ಹೋರಾಟಗಾರರ ಪಾತ್ರಗಳನ್ನು ಮಾತ್ರ ಆಯ್ಕೆ ಮಾಡಿಕೊಂಡು ಒಂದು ಕಾಲ್ಪನಿಕ ಕಥೆಯನ್ನು ಕಟ್ಟಿ ನಿರ್ದೇಶಕ ರಾಜಮೌಳಿ ಗೆದ್ದಿದ್ದರು. ರಾಮ್‌- ಭೀಮ್ ಪಾತ್ರದಲ್ಲಿ ಚರಣ್- ತಾರಕ್ ಅಭಿನಯಕ್ಕೆ ಪ್ರೇಕ್ಷಕರು ಫಿದಾ ಆಗಿದ್ದರು. ರಾಮ್‌- ಭೀಮ್ ಬ್ರೊಮ್ಯಾನ್ಸ್ ಜಪಾನ್ ಪ್ರೇಕ್ಷಕರಿಗೂ ಇಷ್ಟವಾಗಿದೆ. ಅಂತರಾಷ್ಟ್ರೀಯ ಮಟ್ಟದಲ್ಲಿ ಚಿತ್ರಕ್ಕೆ ಬೆಂಬಲ ವ್ಯಕ್ತವಾಗ್ತಿದೆ. ಡಿವಿವಿ ದಾನಯ್ಯ ನಿರ್ಮಾಣದ ಈ ಚಿತ್ರಕ್ಕೆ ಎಂ. ಎಂ ಕೀರವಾಣಿ ಸಂಗೀತವಿದೆ. ಅಜಯ್ ದೇವಗನ್, ಆಲಿಯಾ ಭಟ್ ಕೂಡ ಚಿತ್ರದ ತಾರಾಗಣದಲ್ಲಿದ್ದರು.