ಬಹುಕಾಲದ ಗೆಳೆಯನೊಂದಿಗೆ ನಿಶ್ಚಿತಾರ್ಥ ಮಾಡಿಕೊಂಡ ಪ್ರಿಯಾಂಕಾ ಕಾಮತ್

ಮೊದಲ ಆಡಿಶನ್‌ನಲ್ಲೇ ಸಕ್ಸಸ್

ಕಲರ್ಸ್ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗಲಿದ್ದ ಹೊಚ್ಚ ಹೊಸ ರಿಯಾಲಿಟಿ ಶೋ 'ಚಾಂಪಿಯನ್'ನ ಆಡಿಶನ್‌ಗೆ ಪ್ರಿಯಾಂಕಾ ಕಾಮತ್ ಹೋಗಿದ್ದರು. ಮೊದಲ ಆಡಿಶನ್‌ನಲ್ಲಿಯೇ ಆಯ್ಕೆಯಾದ ಪಿಕೆ ಫೈನಲ್ ರೌಂಡ್‌ಗೂ ಸೆಲೆಕ್ಟ್ ಆಗಿದ್ದರು‌. ಪರೀಕ್ಷೆಯ ಸಮಯವಾದ ಕಾರಣ ಕೊನೆಯ ಸುತ್ತಿನ ಆಡಿಶನ್‌ನಲ್ಲಿ ಪ್ರಿಯಾಂಕಾಗೆ ಭಾಗವಹಿಸಲಾಗಲಿಲ್ಲ. ಪರೀಕ್ಷೆ ಇರುವ ಕಾರಣ ಭಾಗವಹಿಸಲು ಕಷ್ಟ ಎಂದು ತಿಳಿಸಿದ್ದರು. ಆದರೆ ಪರೀಕ್ಷೆ ಮುಗಿದ ನಂತರ ಆಡಿಶನ್‌ನಲ್ಲಿ ಭಾಗವಹಿಸಿ ಎಂದು ವಾಹಿನಿಯವರು ಹೇಳಿದರು. ಪರೀಕ್ಷೆ ನಂತರ 'ಚಾಂಪಿಯನ್' ಶೋ ಸ್ಪರ್ಧಿಯಾಗಿ ಕಾಣಿಸಿಕೊಂಡ ಪ್ರಿಯಾಂಕಾ ಮೂರು ತಿಂಗಳ ಕಾಲ ವೀಕ್ಷಕರನ್ನು ರಂಜಿಸಿದರು‌.

ಮಜಾಭಾರತದಲ್ಲಿ ಮೋಡಿ!

'ಚಾಂಪಿಯನ್' ರಿಯಾಲಿಟಿ ಶೋ ನಂತರ ಕಲರ್ಸ್ ಸೂಪರ್ ವಾಹಿನಿಯಲ್ಲಿ ಪ್ರಸಾರವಾಗುತ್ತಿದ್ದ 'ಮಜಾಭಾರತ'ದಲ್ಲಿ ಭಾಗವಹಿಸುವ ಅವಕಾಶ ದೊರಕಿತು. ಆದರೆ ಅದು ಹಾಸ್ಯ ಕಾರ್ಯಕ್ರಮವಾದ್ದರಿಂದ ಭಾಗವಹಿಸಲು ಪ್ರಿಯಾಂಕಾಗೆ ಭಯವಾಗಿತ್ತು. ಯಾಕೆಂದರೆ ನಟನೆಯ ಬಗ್ಗೆ ಅವರಿಗೆ ಕಿಂಚಿತ್ತೂ ಅನುಭವವಿರಲಿಲ್ಲ. ಈ ವಿಚಾರವನ್ನೇ ವಾಹಿನಿಯವರ ಬಳಿ ತಿಳಿಸಿದಾಗ 'ಒಂದು ವಾರ ನೋಡಿ. ಕಷ್ಟವಾದರೆ ಬಿಡಿ' ಎಂದು ಸಲಹೆ ನೀಡಿದರು. ಪ್ರಿಯಾಂಕಾ ಅವರಿಗೆ ಆರಂಭದ ದಿನಗಳಲ್ಲಿ ಕಷ್ಟವಾದರೂ ಮತ್ತೆ ನಟಿಸುವುದನ್ನು ಹಾಗೂ ನಟನೆಯ ರೀತಿ ನೀತಿಗಳನ್ನು ತಿಳಿದುಕೊಂಡರು.

'ಸಿಂಗ' ಸಿನಿಮಾದಲ್ಲೂ ನಟನೆ

ಮಜಾಭಾರತದ 4 ಸೀಸನ್‌ಗಳಲ್ಲಿಯೂ ಸ್ಪರ್ಧಿಯಾಗಿ ಕಾಣಿಸಿಕೊಂಡು ಮನೋಜ್ಞ ನಟನೆಯ ಮೂಲಕ ಕಿರುತೆರೆ ವೀಕ್ಷಕರಿಗೆ ಮನರಂಜನೆಯ ರಸದೌತಣ ಉಣಬಡಿಸಿದ್ದರು. ಪ್ರಿಯಾಂಕಾ ಕಾಮತ್ ಕಲರ್ಸ್ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗುತ್ತಿದ್ದ ಗಿಚ್ಚಿ ಗಿಲಿಗಿಲಿ ಕಾರ್ಯಕ್ರಮದಲ್ಲಿಯೂ ಭಾಗವಹಿಸುವ ಅವಕಾಶವನ್ನು ಪಡೆದುಕೊಂಡರು. ಚಿರಂಜೀವಿ ಸರ್ಜಾ ಹಾಗೂ ಅದಿತಿ ಪ್ರಭುದೇವ ಮುಖ್ಯ ಭೂಮಿಕೆಯಲ್ಲಿ ನಟಿಸಿರುವ 'ಸಿಂಗ' ಸಿನಿಮಾದಲ್ಲಿ ಅದಿತಿ ಪ್ರಭುದೇವ ಗೆಳತಿಯಾಗಿ ಪ್ರಿಯಾಂಕಾ ಬಣ್ಣ ಹಚ್ಚಿದ್ದಾರೆ.

ನಿರೂಪಕಿಯಾಗಿ ಕಮಾಲ್

ಉದಯ ವಾಹಿನಿಯಲ್ಲಿ ಪ್ರಸಾರವಾಗುತ್ತಿದ್ದ 'ಸಂಡೇ ಬಜಾರ್'ನ ನಿರೂಪಕಿಯಾಗಿ ಕಾಣಿಸಿಕೊಂಡಿರುವ ಪ್ರಿಯಾಂಕಾ ಕಾಮತ್ ಆಲಿಯಾಸ್ ಪಿಕೆ ಮುಂದೆ ಅದೇ ವಾಹಿನಿಯಲ್ಲಿ ಪ್ರಸಾರವಾಗುತ್ತಿದ್ದ 'ಹಾಸ್ಯೋತ್ಸವ' ಕಾರ್ಯಕ್ರಮದ ನಿರೂಪಕಿಯಾಗಿಯೂ ಮಿಂಚಿದ ಪ್ರತಿಭೆ. ಹೊಸ ಬಾಳಿಗೆ ಕಾಲಿಡಲು ಸಜ್ಜಾಗಿರುವ ನಟಿಗೆ ಅಭಿಮಾನಿಗಳಿಂದ ಶುಭಾಶಯಗಳ ಮಹಾಪೂರವೇ ಹರಿದು ಬರ್ತಿದೆ.