ಆಸ್ಪತ್ರೆಯವರೇ ನನ್ನ ತಂದೆಯನ್ನು ಕೊಂದಿದ್ದಾರೆ: ನಟಿ ಸಂಭಾವನಾ ಸೇಠ್

ವಿಡಿಯೋದಲ್ಲಿ ತಂದೆಯ ಪರಿಸ್ಥಿತಿ ತೋರಿಸಿದ್ದರು

ವಿಡಿಯೋ ಮಾಡಿ ತಂದೆಯ ಪರಿಸ್ಥಿತಿಯನ್ನು ತೋರಿಸಿರುವ ಸಂಭಾವನಾ, ಆಸ್ಪತ್ರೆ ವಿರುದ್ಧ ಕಿಡಿ ಕಾರಿದ್ದಾರೆ. ಆದರೆ ಸಂಭಾವನಾ ವಿಡಿಯೋ ಮಾಡಿ ಆಸ್ಪತ್ರೆ ಸಿಬ್ಬಂದಿ ತಂದೆಯನ್ನು ಸರಿಯಾಗಿ ಶುಶ್ರೂಶೆ ಮಾಡುತ್ತಿಲ್ಲ ಎಂದು ದೂರಿದ ಕೇವಲ ಎರಡು ಗಂಟೆ ಒಳಗೆಯೇ ಸಂಭಾವನಾ ತಂದೆ ನಿಧನ ಹೊಂದಿದ್ದಾರೆ. ಈ ಘಟನೆಗಳು ನಡೆದಿರುವುದು ಮೇ 08 ರಂದು.

'ಮೆಡಿಕಲ್ ಮರ್ಡರ್' ಎಂದ ಸಂಭಾವನಾ

ತಂದೆ ಸಾವಿನ ಜೊತೆ ಹೋರಾಡುತ್ತಿದ್ದ ಸಂದರ್ಭದಲ್ಲಿ ತಾವು ಮಾಡಿದ್ದ ವಿಡಿಯೋವನ್ನು ಇನ್‌ಸ್ಟಾಗ್ರಾಂನಲ್ಲಿ ಹಂಚಿಕೊಂಡಿರುವ ಸಂಭಾವನಾ, 'ನನ್ನ ತಂದೆಯನ್ನು ಆಸ್ಪತ್ರೆಯವರೇ ಕೊಂದಿದ್ದಾರೆ. ಇದು 'ಮೆಡಿಕಲ್ ಮರ್ಡರ್' ನಾನು ಆಸ್ಪತ್ರೆಯ ವಿರುದ್ಧ ಕಾನೂನು ಹೋರಾಟ ಮಾಡುತ್ತೇನೆ' ಎಂದಿದ್ದಾರೆ. ಅದೇ ಆಸ್ಪತ್ರೆಯಲ್ಲಿ ಕೆಲಸ ಮಾಡುವ ನರ್ಸ್‌ ಒಬ್ಬರ ಮೇಲೆ ತೀವ್ರ ವಾಗ್ದಾಳಿ ಮಾಡಿರುವ ಸಂಭಾವನಾ, ಪಿಪಿಇ ಕಿಟ್ ಧರಿಸಿರುವ ನರ್ಸ್‌ನ ಚಿತ್ರವನ್ನು ಹಂಚಿಕೊಂಡು 'ಈ ನರ್ಸ್‌ನ ಹೆಸರನ್ನು ಆಸ್ಪತ್ರೆಯವರು ಬಿಟ್ಟುಕೊಡುತ್ತಿಲ್ಲ. ಯಾರಿಗಾದರೂ ಗೊತ್ತಿದ್ದರೆ ತಿಳಿಸಿ' ಎಂದು ಮನವಿ ಮಾಡಿದ್ದಾರೆ.

ಬಿಳಿ ಬಟ್ಟೆ ತೊಟ್ಟ ರಾಕ್ಷಸರು ಕೊಲ್ಲುತ್ತಿದ್ದಾರೆ: ಸಂಭಾವನಾ ಸೇಠ್

ವಿಡಿಯೋ ಜೊತೆಗೆ ಪೋಸ್ಟ್ ಹಂಚಿಕೊಂಡಿರುವ ಸಂಭಾವನಾ ಸೇಠ್, 'ಎಲ್ಲ ವೈದ್ಯರೂ ದೇವರಲ್ಲ ಕೆಲವರು ರಾಕ್ಷಸರು ಸಹ ಇದ್ದಾರೆ. ಬಿಳಿ ಬಟ್ಟೆ ಧರಿಸಿದ ಕೆಲವು ರಾಕ್ಷಸರು ನಮ್ಮ ಪ್ರೀತಿ ಪಾತ್ರರನ್ನು ಕೊಲ್ಲುತ್ತಿದ್ದಾರೆ. ಆಸ್ಪತ್ರೆ ಅವ್ಯವಸ್ಥೆ ಬಗ್ಗೆ ವಿಡಿಯೋ ಮಾಡಿದ ಎರಡು ಗಂಟೆಯಲ್ಲಿ ನಮ್ಮ ತಂದೆ ನಿಧನರಾಗಿದ್ದಾರೆ. ತಂದೆಯನ್ನು ಕಳೆದುಕೊಂಡು ಬಿಡುತ್ತೇನೆ ಎಂಬುದು ನನ್ನ ಜೀವನದ ದೊಡ್ಡ ಭಯವಾಗಿತ್ತು. ಅದನ್ನೀಗ ಎದುರಿಸಿ ಬಿಟ್ಟಿದ್ದೇನೆ. ಈಗ ನಾನು ಭಯದಿಂದ ಮುಕ್ತಗೊಂಡಿದ್ದೇನೆ. ಕಾನೂನು ಹೋರಾಟ ನಡೆಸಲಿದ್ದೇನೆ. ಈ ಹೋರಾಟದಲ್ಲಿ ಗೆಲ್ಲುತ್ತೀನೋ ಇಲ್ಲವೋ ಗೊತ್ತಿಲ್ಲ ಆದರೆ ಈ ರಾಕ್ಷಸ ಮೀನುಗಳ ನಿಜ ಮುಖವನ್ನಂತೂ ಬಯಲಿಗೆ ಎಳೆಯುತ್ತೇನೆ' ಎಂದಿದ್ದಾರೆ.

Recommended Video

ತಂದೆ-ತಾಯಿ ವಿಚ್ಛೇದನ ಪಡೆದು ದೂರವಾಗಿದ್ದಾಗ ಖುಷಿಯಾಗಿತ್ತು ಎಂದ ಶ್ರುತಿ ಹಾಸನ್ | Filmibeat Kannada

ಜೈಪುರ ಗೋಲ್ಡನ್ ಆಸ್ಪತ್ರೆಗೆ ನೊಟೀಸ್

'ಈಗ ನನಗೆ ನಿಮ್ಮ (ಜನರ) ನೆರವು ಅಗತ್ಯವಿದೆ. ಯಾರು-ಯಾರು ಆಸ್ಪತ್ರೆಗಳಿಗೆ ದಾಖಲಾಗಿದ್ದೀರೊ ಅವರಲ್ಲಿ ಬಹುತೇಕರಿಗೆ ಈ ಸಮಸ್ಯೆ ಎದುರಾಗಿಯೇ ಇರುತ್ತದೆ. ಆದರೆ ಬೇರೆ-ಬೇರೆ ಕಾರಣಗಳಿಗೆ ನೀವು ಹೋರಾಟ ಮಾಡದೇ ಇರಬಹುದು. ಆದರೆ ಈಗ ಸಮಯ ಬಂದಿದೆ' ಎಂದಿರುವ ಸಂಭಾವನಾ ಸೇಠ್, ತಮ್ಮ ವಕೀಲರನ್ನು ಸಹ ಪೋಸ್ಟ್‌ಗೆ ಟ್ಯಾಗ್ ಮಾಡಿ, ದೆಹಲಿಯ ಜೈಪುರ ಗೋಲ್ಡನ್ ಆಸ್ಪತ್ರೆಗೆ ನೊಟೀಸ್ ಕಳಿಸುವ ಕಾರ್ಯವನ್ನು ಈಗಾಗಲೇ ಆರಂಭಿಸಿದ್ದಾರೆ' ಎಂದಿದ್ದಾರೆ.