ಬಾಲಿವುಡ್ ಬಾಕ್ಸಾಫೀಸ್‌ನಲ್ಲಿ 'ದೃಶ್ಯಂ 2' ಆರ್ಭಟ: 'ಕಾಂತಾರ' ಕಲೆಕ್ಷನ್ ಲೆಕ್ಕಾಚಾರವೇನು?

ಬಾಕ್ಸಾಫೀಸ್‌ನಲ್ಲಿ ಧೂಳೆಬ್ಬಿಸುತ್ತಿದೆ 'ದೃಶ್ಯಂ 2'

ಬಾಲಿವುಡ್ ಬಾಕ್ಸಾಫೀಸ್‌ನಲ್ಲಿ ಮತ್ತೊಮ್ಮೆ ಹಿಂದಿ ಸಿನಿಮಾ ಮಂದಿಯ ಪರ್ವ ಆರಂಭ ಆಗಿದೆ. ಅದು ಎಂತಹದ್ದೇ ಸಿನಿಮಾ ಮಾಡಿದರೂ, ಬಾಲಿವುಡ್ ಸಿನಿಮಾಗಳು ಬಾಕ್ಸಾಫೀಸ್‌ನಲ್ಲಿ ಕಚ್ಚಿಕೊಳ್ಳುತ್ತಲೇ ಇರಲಿಲ್ಲ. ಆದ್ರೀಗ 'ದೃಶ್ಯಂ 2' ಬಾಲಿವುಡ್ ಮಂದಿಯ ಆತಂಕವನ್ನು ಹೊಡೆದುರುಳಿಸಿದೆ. ಬಾಕ್ಸಾಫೀಸ್‌ನಲ್ಲಿ ಮೂರೇ ದಿನಕ್ಕೆ 64 ಕೋಟಿ ರೂಪಾಯಿ ಕಲೆ ಹಾಕಿ ಸಿನಿಮಾ ಮಂದಿಗೆ ಕಿಕ್ ಕೊಟ್ಟಿದೆ. ಆದರೆ, ಇನ್ನೊಂದು ಕಡೆ ಬಾಕ್ಸಾಫೀಸ್‌ಗೆ ಬೇಲಿ ಹಾಕಿಟ್ಟುಕೊಂಡಿದ್ದ 'ಕಾಂತಾರ' ಕಲೆಕ್ಷನ್ ಡ್ರಾಪ್ ಆಗುತ್ತಾ? 100 ಕೋಟಿ ಕ್ಲಬ್ ಸೇರುತ್ತಾ? ಅನ್ನೋ ಪ್ರಶ್ನೆ ಹುಟ್ಕೊಂಡಿದೆ.

6ನೇ ವಾರದಲ್ಲಿ 'ಕಾಂತಾರ' ಕಥೆಯೇನು?

'ಕಾಂತಾರ' ಬಾಲಿವುಡ್ ಬಾಕ್ಸಾಫೀಸ್‌ನಲ್ಲಿ ಆರು ವಾರಗಳ ದರ್ಬಾರ್ ಮಾಡಿದೆ. ಅದ್ಯಾವುದೇ ಬಾಲಿವುಡ್ ಸಿನಿಮಾ ರಿಲೀಸ್ ಆದರೂ ಜಗ್ಗದೆ ಮುನ್ನುಗ್ಗಿತ್ತು. ಸೂಪರ್‌ಸ್ಟಾರ್ ಸಿನಿಮಾಗಳಿಗೂ ಟಕ್ಕರ್ ಕೊಟ್ಟು ಅಬ್ಬರಿಸಿತ್ತು. ಈಗ 'ದೃಶ್ಯಂ 2' ತೆರೆಕಂಡ ಬಳಿಕ ಗಳಿಕೆಯಲ್ಲಿ ಇಳಿಕೆ ಕಾಣಬಹುದೇನೋ ಅನ್ನೋ ಲೆಕ್ಕಾಚಾರ ಶುರುವಾಗಿತ್ತು. ಆದರೆ, 6ನೇ ವೀಕೆಂಡ್‌ನಲ್ಲಿ 'ಕಾಂತಾರ' ಸುಮಾರು 1.85 ಕೋಟಿ ರೂ. ಕಲೆಕ್ಷನ್ ಮಾಡಿದೆ ಎಂದು ಬಾಲಿವುಡ್‌ನಲ್ಲಿ ವರದಿಯಾಗಿದೆ.

ಈ ವಾರ ಕಾಂತಾರ ಟಾರ್ಗೆಟ್ ₹90 ಕೋಟಿ

ಆರನೇ ವಾರದ ಹೊತ್ತಿಗೆ ಬಾಲಿವುಡ್ ಬಾಕ್ಸಾಫೀಸ್‌ನಲ್ಲಿ 'ಕಾಂತಾರ' ಕಲೆ ಹಾಕಿದ್ದು ಸುಮಾರು ₹81 ಕೋಟಿ ರೂಪಾಯಿ. ಹೀಗಾಗಿ 'ಕಾಂತಾರ' ಮುಂದಿನ ಟಾರ್ಗೆಟ್ 90 ಕೋಟಿ ರೂಪಾಯಿ. ಇದೇ ವಾರದ ಹೊತ್ತಿಗೆ 90 ಕೋಟಿ ರೂ. ಕಲೆಕ್ಷನ್ ಮಾಡುತ್ತಾ ಅನ್ನೋದನ್ನು ಎದುರು ನೋಡುತ್ತಿದ್ದಾರೆ. ಈ ವಾರ 'ದೃಶ್ಯಂ 2' ಸಿನಿಮಾ ಕಡೆಗೆ ಜನರು ವಾಲಿದರೆ, 'ಕಾಂತಾರ' 90 ಕೋಟಿ ರೂ. ಕಲೆ ಹಾಕೋದು ಅನುಮಾನ ಎಂದೂ ಹೇಳಲಾಗುತ್ತಿದೆ. ಹೀಗಾಗಿ 'ದೃಶ್ಯಂ 2'ಗೂ ಹಾಗೂ 'ಕಾಂತಾರ' ಎರಡೂ ಸಿನಿಮಾ ಈ ವಾರ ತುಂಬಾನೇ ಮುಖ್ಯ.

'ಕಾಂತಾರ' ಓಟಿಟಿ ರಿಲೀಸ್ ಯಾವಾಗ?

'ಕಾಂತಾರ' ಹವಾ ಇನ್ನೂ ಕಮ್ಮಿಯಾಗಿಲ್ಲ. ಹಿಂದಿಯಲ್ಲಿ ₹100 ಕೋಟಿ ದಾಟಲು ಹೆಚ್ಚು ಕಡಿಮೆ 20 ಕೋಟಿ ಬೇಕಿದೆ. ಅದೇ, ತೆಲುಗು, ತಮಿಳು ಹಾಗೂ ಮಲಯಾಳಂನಲ್ಲೂ ಈ ಸಿನಿಮಾ ಇನ್ನೂ ಉತ್ತಮ ರೆಸ್ಪಾನ್ಸ್ ಸಿಗುತ್ತಿದೆ. ಈ ಮಧ್ಯೆ ಓಟಿಟಿಗೆ ರಿಲೀಸ್ ಬಗ್ಗೆನೂ ಟಾಕ್ ಶುರುವಾಗಿದೆ. ಆದರೆ, ಪ್ರೊಡಕ್ಷನ್ ಕಂಪನಿಯಾಗಲಿ, ಓಟಿಟಿ ಸಂಸ್ಥೆಯಾಗಲಿ ಇನ್ನೂ ಅಧಿಕೃತವಾಗಿ ಮಾಹಿತಿಯನ್ನು ಹೊರ ಹಾಕಿಲ್ಲ.