2022ರ ದಾಖಲೆಗಳ ಮುರಿದು ಮುನ್ನುಗ್ಗುತ್ತಿದೆ 'ಅವತಾರ್ 2: ಈವರೆಗೆ ಬಾಚಿದ್ದು ಎಷ್ಟು ಸಾವಿರ ಕೋಟಿ?

ಭಾರಿ ಕಲೆಕ್ಷನ್ ಮಾಡುತ್ತಿರುವ 'ಅವತಾರ್ 2'

ಡಿಸೆಂಬರ್ 16 ರಂದು ಬಿಡುಗುಡೆ ಆದ 'ಅವತಾರ್; ದಿ ವೇ ಆಫ್ ವಾಟರ್' ಸಿನಿಮಾವು ಕೇವಲ 20 ದಿನಗಳಲ್ಲಿ 1.5 ಬಿಲಿಯನ್ ಡಾಲರ್ ಅಂದರೆ ಭಾರತೀಯ ರುಪಾಯಿ ಲೆಕ್ಕದಲ್ಲಿ 12 ಸಾವಿರ ಕೋಟಿ ಕಲೆಕ್ಷನ್ ಮಾಡಿದೆ. ಇಷ್ಟು ದೊಡ್ಡ ಮೊತ್ತದ ಹಣವನ್ನು ಇಷ್ಟು ಕಡಿಮೆ ಅವಧಿಯಲ್ಲಿ ಇನ್ಯಾವ ಸಿನಿಮಾವೂ ಗಳಿಸಿಲ್ಲ. ಅಲ್ಲದೆ, 2022 ರಲ್ಲಿ ಬಿಡುಗಡೆ ಆಗಿ ಬಾಕ್ಸ್ ಆಫೀಸ್‌ನಲ್ಲಿ ಅತಿ ಹೆಚ್ಚು ಹಣ ದೋಚಿದ ಸಿನಿಮಾ ಎಂಬ ಖ್ಯಾತಿಗೂ 'ಅವತಾರ್ 2' ಸಿನಿಮಾ ಪಾತ್ರವಾಗಿದೆ.

ಟಾಮ್ ಕ್ರೂಸ್ ಸಿನಿಮಾ ದಾಖಲೆ ಉಡೀಸ್

2022 ರ ನಡುವಲ್ಲಿ ಬಿಡುಗಡೆ ಆಗಿದ್ದ ಟಾಮ್ ಕ್ರೂಸ್ ನಟನೆಯ 'ಟಾಪ್‌ ಗನ್ ಮಾವರಿಕ್' ಸಿನಿಮಾವು 1.49 ಬಿಲಿಯನ್ ಅಂದರೆ 12,218 ಕೋಟಿ ರುಪಾಯಿ ಗಳಿಕೆ ಮಾಡಿತ್ತು. ಈ ದಾಖಲೆಯನ್ನು ಮುರಿದಿರುವ 'ಅವತಾರ್ 2' ಸಿನಿಮಾವು 12,400 ಕೋಟಿಗೂ ಹೆಚ್ಚು ಹಣ ಗಳಿಕೆ ಮಾಡಿದೆ. ಆ ಮೂಲಕ 2022 ರಲ್ಲಿ ಬಿಡುಗಡೆ ಆಗಿ ಅತಿ ಹೆಚ್ಚು ಹಣ ಗಳಿಸಿದ ಸಿನಿಮಾ ಎಂಬ ಖ್ಯಾತಿಗೆ ಈ ಸಿನಿಮಾ ಪಾತ್ರವಾಗಿದೆ.

ಟಾಪ್ ಆಗಲು ಇನ್ನೂ ಎಂಟು ಸಿನಿಮಾಗಳನ್ನು ದಾಟಬೇಕು

'ಅವತಾರ್ 2' ಸಿನಿಮಾ ದೊಡ್ಡ ಮೊತ್ತದ ಕಲೆಕ್ಷನ್ ಮಾಡುತ್ತಿದೆಯಾದರೂ ಈ ಸಿನಿಮಾ ಟಾಪ್ 1 ಕ್ಕೆ ಏರಲು ಇನ್ನೂ ಎಂಟು ಸಿನಿಮಾಗಳನ್ನು ದಾಟಬೇಕಿದೆ. ಸಿನಿಮಾ ಒಳ್ಳೆಯ ಕಲೆಕ್ಷನ್ ಮಾಡುತ್ತಿದ್ದರೂ ಸಹ ಹದಿಮೂರು ವರ್ಷದ ಹಿಂದೆ ಬಿಡುಗಡೆ ಆಗಿದ್ದ 'ಅವತಾರ್' ಮೊದಲ ಭಾಗದ ಕಲೆಕ್ಷನ್ ಅನ್ನು ಬೀಟ್ ಮಾಡಲು ಇನ್ನೂ ಸರಿ ಸುಮಾರು ಒಂದು ಬಿಲಿಯನ್ ಡಾಲರ್ ಅಂದರೆ 8200 ಕೋಟಿ ರುಪಾಯಿ ಕಲೆಕ್ಷನ್ ಮಾಡಬೇಕಿದೆ. ಆದರೆ 'ಜುರಾಸಿಕ್ ವರ್ಲ್ಡ್‌' ಹಾಗೂ ಮಾರ್ವೆಲ್‌ನ ಕೆಲವು ಸಿನಿಮಾಗಳ ದಾಖಲೆಗಳನ್ನು ಶೀಘ್ರದಲ್ಲಿಯೇ 'ಅವತಾರ್ 2' ಮುರಿಯಲಿದೆ.

ಅವತಾರ್ ಸಿನಿಮಾ ಸರಣಿ

'ಅವತಾರ್ 2' ಸಿನಿಮಾವನ್ನು 'ಟೈಟ್ಯಾನಿಕ್' ಖ್ಯಾತಿಯ ನಿರ್ದೇಶಕ ಜೇಮ್ಸ್ ಕ್ಯಾಮರೂನ್ ನಿರ್ದೇಶನ ಮಾಡಿದ್ದಾರೆ. ಮೊದಲ 'ಅವತಾರ್' ಸಿನಿಮಾ ಬಿಡುಗಡೆ ಆಗಿ ಹದಿಮೂರು ವರ್ಷಗಳ ಬಳಿಕ 'ಅವತಾರ್ 2' ಬಿಡುಗಡೆ ಆಗಿದೆ. ಹಾಗಿದ್ದರೂ ಸಹ ಸಿನಿಮಾ ಸೂಪರ್ ಡೂಪರ್ ಆಗಿದೆ. 'ಅವತಾರ್ 3' ಸಿನಿಮಾ ಸಹ ಈಗಾಗಲೇ ತಯಾರಾಗಿದ್ದು ಆ ಸಿನಿಮಾ 2024 ರ ಡಿಸೆಂಬರ್ ತಿಂಗಳಲ್ಲಿ ಬಿಡುಗಡೆ ಆಗಲಿದೆ. ಅದರ ಬಳಿಕ 'ಅವತಾರ್ 4' ಮತ್ತು 'ಅವತಾರ್ 5' ಸಿನಿಮಾಗಳು ಸಹ ಬಿಡುಗಡೆ ಆಗಲಿವೆ.