ಶೀಘ್ರದಲ್ಲೇ 'ಕಾಫಿ ಕಿಂಗ್ ವಿ.ಜಿ. ಸಿದ್ಧಾರ್ಥ' ಬಯೋಪಿಕ್: ಸಿನಿಮಾ ಮಾಡೋದ್ಯಾರು?

ಪುಸ್ತಕ ಆಧರಿಸಿ 'ವಿ.ಜಿ. ಸಿದ್ಧಾರ್ಥ' ಸಿನಿಮಾ!

ಕೆಫೆ ಕಾಫಿ ಡೇ ಸಂಸ್ಥಾಪಕ ದಿವಂಗತ ವಿ.ಜಿ.ಸಿದ್ಧಾರ್ಥ ಜೀವನ ಚರಿತ್ರೆಯನ್ನು ಆಧರಿಸಿದ ಪುಸ್ತಕ ಬಿಡುಗಡೆಗೆ ತಯಾರಾಗಿದೆ. ಪಬ್ಲಿಷಿಂಗ್ ಹೌಸ್ ಪ್ಯಾನ್ ಮ್ಯಾಕ್‌ಮಿಲನ್ ಇಂಡಿಯಾ ಪುಸ್ತಕ ಬಿಡುಗಡೆ ಮಾಡಲಾಗುವುದು ಎಂದು ಈ ಹಿಂದೆ ಘೋಷಿಸಿತ್ತು. 'ಕಾಫಿ ಕಿಂಗ್: ದಿ ಸ್ವಿಫ್ಟ್ ರೈಸ್ ಅಂಡ್ ಸಡನ್ ಡೆತ್ ಆಫ್ ಕೆಫೆ ಕಾಫಿ ಡೇ ಫೌಂಡರ್ ವಿ.ಜಿ.ಸಿದ್ಧಾರ್ಥ' ಎಂಬ ಶೀರ್ಷಿಕೆ ಹೊಂದಿರುವ ಪುಸ್ತಕ ಶೀಘ್ರದಲ್ಲಿಯೇ ಬಿಡುಗಡೆಯಾಗಲಿದೆ. ಇದೇ ಪುಸ್ತಕವನ್ನು ಆಧರಿಸಿದ ಸಿನಿಮಾ ಕೂಡ ಬರಲಿದೆ. ಸಿನಿಮಾ ಮಾಡಲು ಟೀ ಸಿರೀಸ್ ಮುಂದಾಗಿದೆ.

ಪುಸ್ತಕದ ಹಕ್ಕು ಪಡೆದ ಟೀ-ಸೀರೀಸ್!

ಇದೇ ಪುಸ್ತಕದ ಹಕ್ಕುಗಳನ್ನು ನಿರ್ಮಾಣ ಸಂಸ್ಥೆಗಳು ಪಡೆದುಕೊಂಡಿವೆ. ಕರ್ಮ ಮೀಡಿಯಾ ಎಂಟರ್‌ಟೈನ್‌ಮೆಂಟ್, ಆಲ್‌ಮೈಟಿ ಮೋಷನ್ ಪಿಕ್ಚರ್‌ನ ಪ್ರಬ್ಲೀನ್ ಕೌರ್ ಸಂಧು ಮತ್ತು ಟಿ-ಸೀರೀಸ್ ಪಡೆದುಕೊಂಡಿದೆ. 'ಕಾಫಿ ಕಿಂಗ್: ದಿ ಸ್ವಿಫ್ಟ್ ರೈಸ್ ಅಂಡ್ ಸಡನ್ ಡೆತ್ ಆಫ್ ಕೆಫೆ ಕಾಫಿ ಡೇ ಫೌಂಡರ್ ವಿ.ಜಿ.ಸಿದ್ಧಾರ್ಥ' ಜೀವನ ಚರಿತ್ರೆಯನ್ನು ತನಿಖಾ ಪತ್ರಕರ್ತರಾದ ರುಕ್ಮಿಣಿ.ಬಿ.ಆರ್ ಮತ್ತು ಪ್ರೊಸೆನ್‌ಜಿತ್ ದತ್ತಾ ಬರೆದಿದ್ದಾರೆ. ಈ ಪುಸ್ತಕವನ್ನು ಪ್ಯಾನ್ ಮ್ಯಾಕ್‌ಮಿಲನ್ ಪಬ್ಲಿಷ್ ಮಾಡುತ್ತಿದೆ.

ಸಿನಿಮಾದಲ್ಲಿರುವ ಅಂಶಗಳೇನು?

'ಕಾಫಿ ಕಿಂಗ್: ದಿ ಸ್ವಿಫ್ಟ್ ರೈಸ್ ಅಂಡ್ ಸಡನ್ ಡೆತ್ ಆಫ್ ಕೆಫೆ ಕಾಫಿ ಡೇ ಫೌಂಡರ್ ವಿ.ಜಿ.ಸಿದ್ಧಾರ್ಥ' ಪುಸ್ತಕ ವಿ.ಜಿ.ಸಿದ್ಧಾರ್ಥ ಜೀವನ, ಉದ್ಯಮಿಯಾಗಿ ಅವರು ಬೆಳೆದ ರೀತಿ, ಉದ್ಯಮದಲ್ಲಿ ಅವರಿಗಾದ ನಷ್ಟ, ಆರ್ಥಿಕ ಬಿಕ್ಕಟ್ಟು, ಕೊನೆಗೆ ಅವರ ಸಾವಿನ ಕಾರಣಗಳನ್ನು ಬಿಚ್ಚಿಡಲಿದೆ. ಇದೇ ಅಂಶಗಳನ್ನು ಮುಖ್ಯವಾಗಿ ಇಟ್ಟುಕೊಂಡು ಸಿನಿಮಾ ಮಾಡಲಾಗುತ್ತದೆ. ಎಲ್ಲದ್ಧಕ್ಕಿಂದ ಮುಖ್ಯವಾಗಿ ಅವರ ನಷ್ಟ ಮತ್ತು ಸಾವಿನ ವಿಷಯ ಸಿನಿಮಾದಲ್ಲಿ ಹೈಲೈಟ್‌ ಆಗಿರಲಿದೆ.

ಕಾಫಿ ಡೇ ಸಾಮ್ರಾಜ್ಯಕ್ಕೆ ಒಡೆಯ!

ವಿ.ಜಿ.ಸಿದ್ಧಾರ್ಥ ಒಬ್ಬ ಯಶಸ್ವಿ ಉದ್ಯಮಿ ಆಗಿದ್ದರು. ಕಾಫಿ ಡೇ ಎನ್ನುವ ಸಾಮ್ರಾಜ್ಯ ಕಟ್ಟಿಕೊಂಡು ಕಿಂಗ್ ಆಗಿದ್ದರು. ಅನೇಕರಿಗೆ ಉದ್ಯಮ ನೀಡುವ ಮೂಲಕ ಆಸರೆಯಾಗಿದ್ದರು. ಆದರೂ ಅವರ ಬದುಕು ದುರಂತ ಅಂತ್ಯ ಕಂಡಿದೆ. ಉದ್ಯಮದಲ್ಲಿ ಸಿದ್ಧಾರ್ಥ ನಷ್ಟ ಅನುಭವಿಸಿದ್ದು, 2019ರ ಜುಲೈ ತಿಂಗಳಿನಲ್ಲಿ ಆತ್ಮಹತ್ಯೆ ಮಾಡಿಕೊಂಡರು. ಹಾಗಾಗಿ ಸಿನಿಮಾದಲ್ಲಿ ಅವರ ಬದುಕಿನ ಪ್ರಮುಖ ಘಟ್ಟಗಳು ತೆರೆಮೇಲೆ ಮೂಡಲಿವೆ.