ಕಂಗನಾಗೆ ತಿರುಗುಬಾಣವಾದ ಡ್ರಗ್ಸ್ ಪ್ರಕರಣ: ತನಿಖೆಗೆ ಸರ್ಕಾರ ಸೂಚನೆ

ಶಾಸಕರ ಒತ್ತಾಯದ ಮೇರೆ ತನಿಖೆಗೆ ಸೂಚನೆ

'ಶಾಸಕರಾದ ಸುನಿಲ್ ಪ್ರಭು, ಪ್ರತಾಪ್ ಸಾರನಿಕ್ ಮನವಿಯ ಮೇರೆಗೆ ಅಧ್ಯಯನ್ ಆರೋಪಿಸಿದಂತೆ ಕಂಗನಾ ಗೆ ಡ್ರಗ್ಸ್ ವ್ಯಸನವಿದೆಯೇ, ಆಕೆ ಡ್ರಗ್ಸ್ ತೆಗೆದುಕೊಳ್ಳುವಂತೆ ಒತ್ತಾಯಿಸಿದ್ದರೇ ಎಂಬ ಬಗ್ಗೆ ತನಿಖೆ ಮಾಡುವಂತೆ ಸೂಚಿಸಲಾಗಿದೆ. ಈ ವಿಷಯವನ್ನು ವಿಧಾನಸಭೆಯಲ್ಲಿಯೂ ನಾನು ಸ್ಪಷ್ಟಪಡಿಸಿದ್ದೇನೆ' ಎಂದಿದ್ದಾರೆ ಮಹಾರಾಷ್ಟ್ರ ಗೃಹ ಮಂತ್ರಿ ಅನಿಲ್ ದೇಶ್‌ಮುಖ್.

ಕಂಗನಾ ಡ್ರಗ್ಸ್ ಸೇವಿಸುತ್ತಾರೆ ಎಂದಿದ್ದ ಅಧ್ಯಯನ್

2016 ರ ಸಂದರ್ಶನವೊಂದರಲ್ಲಿ ಮಾತನಾಡಿದ್ದ ಅಧ್ಯಯನ್, 'ಪಾರ್ಟಿಯೊಂದರಲ್ಲಿ ಕಂಗನಾ, ಡ್ರಗ್ಸ್ ತೆಗೆದುಕೊಳ್ಳುವಂತೆ ನನ್ನನ್ನು ಒತ್ತಾಯಿಸಿದ್ದಳು, ಆಕೆಯೂ ಅಂದು ಕೊಕೇನ್ ಸೇದಿದ್ದಳು. ನಾವಿಬ್ಬರೂ ಒಟ್ಟಿಗೆ ಹಲವು ಬಾರಿ ಗಾಂಜಾ ಸೇದಿದ್ದೇವೆ' ಎಂದಿದ್ದರು. ಈಗ ಆ ವಿಡಿಯೋ ವೈರಲ್ ಆಗಿದೆ.

'ಆರೋಪ ಸಾಬೀತಾದರೆ ಮುಂಬೈ ಬಿಟ್ಟು ಹೊರಟುಹೋಗುತ್ತೇನೆ'

ಡ್ರಗ್ಸ್ ನಂಟು ಆರೋಪದ ತನಿಖೆ ಸುದ್ದಿ ಹೊರಬೀಳುತ್ತಿದ್ದಂತೆ ಈ ಬಗ್ಗೆ ಟ್ವೀಟ್ ಮಾಡಿರುವ ಕಂಗನಾ ರನೌತ್, 'ಡ್ರಗ್ಸ್ ಕುರಿತ ಎಲ್ಲಾ ಪರೀಕ್ಷೆಗಳನ್ನು ಮಾಡಿರಿ, ನನ್ನ ಕರೆ ದಾಖಲೆಗಳನ್ನು ಪರೀಕ್ಷಿಸಿ, ನಾನು ಎಂದಾದರೂ ಡ್ರಗ್ ಪೆಡ್ಲರ್ ಜೊತೆಗೆ ಸಂಪರ್ಕ್ ಹೊಂದಿದ್ದೆ ಎಂದು ಸಾಬೀತಾದರೆ ಶಾಶ್ವತವಾಗಿ ಮುಂಬೈ ಬಿಟ್ಟು ಹೊರಟುಹೋಗುತ್ತೇನೆ' ಎಂದಿದ್ದಾರೆ ಕಂಗನಾ.

ಮುಂಬೈ, ಪಾಕ್ ಆಕ್ರಮಿತ ಕಾಶ್ಮೀರ ಎಂದಿದ್ದ ಕಂಗನಾ

ಇತ್ತೀಚೆಗೆ ಟ್ವೀಟ್‌ ಒಂದರಲ್ಲಿ, 'ಮುಂಬೈ, ಪಾಕ್ ಆಕ್ರಮಿತ ಕಾಶ್ಮೀರದಂತೆ ಎನಿಸುತ್ತಿದೆ' ಎಂದಿದ್ದರು ಕಂಗನಾ. ಈ ಹೇಳಿಕೆ ಬಳಿಕ ಆಡಳಿತಾರೂಢ ಶಿವಸೇನಾ ಕಾರ್ಯಕರ್ತರು, ಸಚಿವರು, ಮುಖಂಡರು ಕಂಗನಾ ವಿರುದ್ಧ ಆಕ್ರೋಶ ಹೊರಹಾಕಿದ್ದರು. ಅದರ ಮುಂದುವರೆದ ಭಾಗವಾಗಿಯೇ ಈಗ ಹಳೆಯ ವಿಡಿಯೋದ ಬಗ್ಗೆ ಕಂಗನಾ ವಿರುದ್ಧ ತನಿಖೆ ಪ್ರಾರಂಭವಾಗಿದೆ.

ಕಂಗನಾ ಕಚೇರಿಗೆ ನೊಟೀಸ್

ಮುಂಬೈ ಮಹಾನಗರ ಪಾಲಿಕೆಯು ಕಂಗನಾ ರನೌತ್‌ ಅವರ ಕಚೇರಿಗೆ ನೊಟೀಸ್ ಸಹ ಕಳಿಸಿದ್ದು, ಕಚೇರಿಯನ್ನು ನಿಯಮಬಾಹಿರವಾಗಿ ಕಟ್ಟಲಾಗಿದೆ ಎಂದಿದೆ. ಇದಕ್ಕೆ ಪ್ರತಿಕ್ರಿಯೆಯಾಗಿ ವಕೀಲರ ಮೂಲಕ ಉತ್ತರ ಕೊಟ್ಟಿದ್ದಾರೆ ನಟಿ ಕಂಗನಾ ರನೌತ್.