ಹಾಲಿವುಡ್ ಗೆ ಜಿಗಿಯಲಿದೆ ಹೃತಿಕ್ ರೋಷನ್ ಸಿನಿಮಾ!

ಬಾಲಿವುಡ್ ಗ್ರೀಕ್ ಗಾಡ್ ಹೃತಿಕ್ ರೋಷನ್ ಅಭಿನಯದ 'ಕಾಬಿಲ್' ಚಿತ್ರ ಬಾಲಿವುಡ್ ನಲ್ಲಿ ಸೌಂಡ್ ಮಾಡಿದ್ದು ಅಷ್ಟಕ್ಕಷ್ಟೇ. ಆದ್ರೆ, ಈ ಚಿತ್ರವೀಗ ಹಾಲಿವುಡ್ ಗೆ ರೀಮೇಕ್ ಆಗಲು ಸಜ್ಜಾಗಿದೆ. ಹೌದು, ಎಲ್ಲ ಅಂದುಕೊಂಡಂತೆ ಆದ್ರೆ, ಹೃತಿಕ್ ಸಿನಿಮಾ ಹಾಲಿವುಡ್ ಅಂಗಳದಲ್ಲಿ ರಾರಾಜಿಸಲಿದೆ.

ಹಾಲಿವುಡ್ ನ ಖ್ಯಾತ ನಿರ್ಮಾಣ (20th Century Fox) ಸಂಸ್ಥೆ 'ಕಾಬಿಲ್' ಚಿತ್ರವನ್ನ ಇಂಗ್ಲೀಷ್ ನಲ್ಲಿ ರೀಮೇಕ್ ಮಾಡಲು ಮುಂದಾಗಿದ್ದು, ಈ ಬಗ್ಗೆ ನಟ ಹೃತಿಕ್ ರೋಷನ್ ಬಳಿ ಚರ್ಚಿಸಿದ್ದಾರೆ ಎಂದು ಚಿತ್ರದ ನಿರ್ದೇಶಕ ಸಂಜಯ್ ಗುಪ್ತ ತಿಳಿಸಿದ್ದಾರೆ.

'ಕಾಬಿಲ್' ಚಿತ್ರಕ್ಕೆ ಈ ಆಫರ್ ಬಂದಿರುವುದು ನಮ್ಮ ಚಿತ್ರತಂಡಕ್ಕೆ ಸಿಕ್ಕಿದ ಗೌರವ. 2017ನೇ ಸಾಲಿನ ಆನ್ ಲೈನ್ ಸರ್ವೆಯಲ್ಲಿ 'ಕಾಬಿಲ್' ಅತ್ಯುತ್ತಮ ಚಿತ್ರವಾಗಿ ಹೊರಹೊಮ್ಮಿತ್ತು. ಈಗ ಹಾಲಿವುಡ್ ರೀಮೇಕ್ ಆಫರ್ ಬಂದಿರುವುದು ಡಬಲ್ ಧಮಾಕ ಎಂದು ಸಂಜಯ್ ಗುಪ್ತ ಸಂತಸ ಹಂಚಿಕೊಂಡಿದ್ದಾರೆ.

ಇನ್ನು ಈ ಬಗ್ಗೆ ಹೃತಿಕ್ ರೋಷನ್ ಅವರ ತಂದೆ ರಾಕೇಶ್ ರೋಷನ್ ಅವರ ಬಳಿ ಚರ್ಚಿಸಿ ಅಂತಿಮ ನಿರ್ಣಯವನ್ನ ಕೈಗೊಳ್ಳಲಾಗುವುದಂತೆ. ಅಂದ್ಹಾಗೆ, ಹೃತಿಕ್ ರೋಷನ್ ಹಾಗೂ ಯಾಮಿ ಗೌತಮ್ ಅಭಿನಯದ ಈ ಚಿತ್ರವನ್ನ ಹೃತಿಕ್ ರೋಷನ್ ಅವರ ತಂದೆ ರಾಕೇಶ್ ರೋಷನ್ ಅವರೇ ನಿರ್ಮಾಣ ಮಾಡಿರುವುದು.