ನಾನು ಪರಿಪೂರ್ಣ ಗಂಡಸು ಅಲ್ಲ: ಅಮೀರ್ ಖಾನ್

ನ್ಯೂಯಾರ್ಕ್ ನಲ್ಲಿ ನಡೆದ 'ಜಗತ್ತಿನಲ್ಲಿ ಮಹಿಳೆ' ಎಂಬ ಶೃಂಗಸಭೆಯಲ್ಲಿ ಪಾಲ್ಗೊಂಡಿದ್ದ ನಟ ಅಮೀರ್ ಖಾನ್ ಅಲ್ಲಿ ಕೆಲವೊಂದು ಕುತೂಹಲಕಾರಿ ಹೇಳಿಕೆಗಳನ್ನು ಕೊಡುವ ಮೂಲಕ ಎಲ್ಲರ ಗಮನಸೆಳೆದಿದ್ದಾರೆ. ನಿಜವಾದ ಗಂಡಸು ಎಂದರೆ ಯಾರು? ಎಂದು ಕೇಳಿರುವ ಅವರು.

"ತೋಳ್ಬಲ ಇರುವವನಾಗಿ, ಇತರರನ್ನು ಹೊಡೆಯುವಷ್ಟು ಶಕ್ತಿಯುತನಾಗಿ, ಯಾವುದೇ ಪರಿಸ್ಥಿತಿಯಲ್ಲೂ ಕಣ್ಣೀರಿಡದಂತಹ, ಯಾರ ಮೇಲೂ ಅವಲಂಬಿಸದಂತೆ ಇರಬೇಕೆ? ಆ ರೀತಿಯ ಎಲ್ಲಾ ಲಕ್ಷಣಗಳು ಇರಬೇಕೆಂದರೆ ನಾನು ಪರಿಪೂರ್ಣ ಪ್ರಮಾಣದಲ್ಲಿ ಗಂಡಸು ಅಲ್ಲ ಎಂಬುದನ್ನು ನಿಸ್ಸಂಶಯವಾಗಿ ಒಪ್ಪುತ್ತೇನೆ" ಎಂದಿದ್ದಾರೆ. [ಚಿತ್ರಗಳಲ್ಲಿ ಆಮೀರ್ ಖಾನ್ 50ನೇ ಹುಟ್ಟುಹಬ್ಬ]

"ಪತ್ನಿಯ ಮೇಲೆ ಕೈ ಮಾಡುವ ಗಂಡಸರು ಚಿಕ್ಕಂದಿನಿಂದ ಅಂತಹ ವಾತಾವರಣದಲ್ಲೇ ಬೆಳೆದಿರುತ್ತಾರೆ. ಪುರಷನೆಂದರೆ ಅಧಿಕಾರ ಚಲಾಯಿಸಬೇಕು ಎಂಬ ಧೋರಣೆಯಲ್ಲೇ ಇರುತ್ತಾರೆ. ಈ ರೀತಿಯ ಪರಿಸ್ಥಿತಿ ಸಮಾಜದಲ್ಲಿ ಬದಲಾಗಬೇಕು, ಸ್ತ್ರೀ ಮತ್ತು ಪುರುಷರು ಸಮಾನ ಎಂಬ ಧೋರಣೆ ಬೆಳೆಯಬೇಕು".

ಭಾರತದಲ್ಲಿ ಸ್ತ್ರೀಯರ ಮೇಲೆ ಅತ್ಯಾಚಾರ ಪ್ರಕರಣಗಳು ಹೆಚ್ಚಾಗುತ್ತಿರುವ ಸಂಬಂಧ ಮಾತನಾಡಿರುವ ಅಮೀರ್ ಖಾನ್, "ತಪ್ಪಿತಸ್ಥರನ್ನು ಶಿಕ್ಷಿಸಲು ಹೆಚ್ಚು ಸಮಯ ತೆಗೆದುಕೊಳ್ಳಲಾಗುತ್ತಿದೆ. ಅತ್ಯಾಚಾರ ಪ್ರಕರಣಗಳು ಹೆಚ್ಚಾಗಲು ಇದೂ ಒಂದು ಕಾರಣ. ಕಾನೂನಿನಲ್ಲಿ ಕೆಲವೊಂದು ಬದಲಾವಣೆಗಳಾಗಬೇಕಿವೆ" ಎಂದಿದ್ದಾರೆ.

"ಅತ್ಯಾಚಾರಕ್ಕೆ ಒಳಗಾದ ಮಹಿಳೆಯರು ಮಾನಸಿಕವಾಗಿ ಕುಗ್ಗಿಹೋಗದೆ ಅವರಿಗೆ ಧೈರ್ಯ ತುಂಬುವ ರೀತಿಯಲ್ಲಿ ಸಮಾಜದಲ್ಲಿ ಬದಲಾವಣೆಗಳು ಬರಬೇಕು. ಮುಖ್ಯವಾಗಿ ಈ ರೀತಿಯ ಕೇಸಿನ ವಿಚಾರಣೆ ನಡೆಸುವ ಪೊಲೀಸರು, ಪರೀಕ್ಷಿಸುವ ವೈದ್ಯರ ವರ್ತನೆಯಲ್ಲೂ ಬದಲಾವಣೆಗಳಾಗಬೇಕು" ಎಂದಿದ್ದಾರೆ ಅಮೀರ್ ಖಾನ್.