ಕತ್ರಿನಾ-ರಣಬೀರ್ 'ಜಗ್ಗಾ ಜಾಸೂಸ್' 7 ದಿನಗಳ ಕಲೆಕ್ಷನ್ ಎಷ್ಟು?

ರಣಬೀರ್ ಕಪೂರ್ ಮತ್ತು ಕತ್ರಿನಾ ಕೈಫ್ ಅಭಿನಯದ 'ಜಗ್ಗಾ ಜಾಸೂಸ್' ಚಿತ್ರ ಆರಂಭವಾದಾಗಿನಿಂದಲೂ ಬಿಟೌನ್ ನಲ್ಲಿ ಟಾಕ್ ಆಫ್ ದಿ ಟೌನ್ ಆಗಿತ್ತು. ಮಾಜಿ ಪ್ರೇಮಿಗಳ ಈ ಸಿನಿಮಾ ಅಂತು ಕಳೆದ ವಾರ ಜುಲೈ 14 ರಂದು ತೆರೆಕಂಡು ಅಭಿಮಾನಿಗಳಲ್ಲಿ ಇದ್ದ ಕುತೂಹಲಕ್ಕೆ ತೆರೆ ಎಳೆದಿದೆ.

ಫ್ರೆಶ್ ಮತ್ತು ಕುತೂಹಲಕಾರಿ ಕತೆ ಇರುವ 'ಜಗ್ಗಾ ಜಾಸೂಸ್' ಚಿತ್ರ ಪ್ರೇಕ್ಷಕವಲಯದಲ್ಲಿ ಮಾತ್ರವಲ್ಲದೇ ಬಾಕ್ಸ್ ಆಫೀಸ್ ಗಳಿಕೆಗೆ ಸಂಬಂಧಿಸಿದಂತೆಯೂ ದೊಡ್ಡ ಮಟ್ಟದ ನಿರೀಕ್ಷೆ ಹೊಂದಿತ್ತು. ಆದರೆ ಚಿತ್ರ ನಿರ್ಮಾಪಕರ ಆಸೆಯನ್ನು ಹುಸಿಗೊಳಸಿದ್ದು, 7 ದಿನಗಳ ಅಂತ್ಯಕ್ಕೆ ಕೇವಲ 46.29 ಕೋಟಿ ರೂ ಗಳಿಸಿದೆ ಎಂಬುದು ಮೂಲಗಳಿಂದ ತಿಳಿದಿದೆ.

'ಜಗ್ಗಾ ಜಾಸೂಸ್' ತೆರೆಕಂಡ ದಿನವೇ(ಶುಕ್ರವಾರ) ರೂ.8.25 ಕೋಟಿ ಗಳಿಸಿತ್ತು. ಈ ಹಿನ್ನೆಲೆಯಲ್ಲಿ ರಜೆ ದಿನಗಳಲ್ಲಿ ಅಂದರೆ ಶನಿವಾರ ಮತ್ತು ಭಾನುವಾರಗಳಂತಹ ದಿನಗಳಲ್ಲಿ ಇನ್ನೂ ಹೆಚ್ಚು ಹಣ ಗಳಿಸಲಿದೆ ಎಂಬ ಚಿತ್ರತಂಡದ ಆಸೆಯನ್ನು ಹುಸಿಗೊಳಿಸಿದೆ. ಎರಡನೇ ದಿನ 11 ಕೋಟಿ, ಮೂರನೇ ದಿನ 12.5 ಕೋಟಿ ರೂ ಗಳಿಸುವ ಮೂಲಕ 7 ದಿನಗಳ ಅಂತ್ಯಕ್ಕೆ ಒಟ್ಟಾರೆ 46.29 ಕೋಟಿ ಗಳಿಸಿ ಸಾಧಾರಣ ಯಶಸ್ಸು ಕಂಡಿದೆ.

ಅಂದಹಾಗೆ 'ಜಗ್ಗಾ ಜಾಸೂಸ್' ಚಿತ್ರಕ್ಕೆ ಅನುರಾಗ್ ಬಸು ಆಕ್ಷನ್ ಕಟ್ ಹೇಳಿದ್ದರು. 'ಪಿಕ್ಚರ್ ಶುರು ಎಂಟರ್‌ಟೈನ್‌ಮೆಂಟ್ ಮತ್ತು ಇಶಾನಾ ಮೂವೀಸ್' ಪ್ರೊಡಕ್ಷನ್ ಕಂಪನಿ ಅಡಿಯಲ್ಲಿ ನಿರ್ಮಾಣ ಮಾಡಲಾಗಿದ್ದ ಈ ಚಿತ್ರಕ್ಕೆ ಪ್ರೀತಮ್ ಸಂಗೀತ ಸಂಯೋಜನೆ ನೀಡಿದ್ದರು. ಚಿತ್ರ ಮೇಕಿಂಗ್ ಮತ್ತು ವಿಸ್ಯುವಲ್ ದೃಷ್ಟಿಯಿಂದಲೂ ಬಹಳ ರಿಚ್ ಆಗಿ ಮೂಡಿಬಂದಿತ್ತು. ಈ ಚಿತ್ರಕ್ಕೆ 110 ಕೋಟಿಗಿಂತಲೂ ಹೆಚ್ಚು ಬಂಡವಾಳ ಹೂಡಲಾಗಿತ್ತು.