ಬಾಲಿವುಡ್ ಬಾಕ್ಸಾಫೀಸ್‌ನಲ್ಲಿ 'ಕಾಂತಾರ' ಗೆಲ್ಲಲು 'ಪುಷ್ಪ' ತಂತ್ರ ಬಳಸಿದ 'ಕೆಜಿಎಫ್ 2' ವಿತರಕ!

'ಕಾಂತಾರ' ವಿತರಣೆ ಮಾಡಿದ್ಯಾರು?

'ಕೆಜಿಎಫ್ 2' ಬಿಡುಗಡೆ ಬಳಿಕ ಹಿಂದಿ ಬೆಲ್ಟ್‌ನಲ್ಲಿ ಕನ್ನಡ ಸಿನಿಮಾಗಳಿಗೆ ಬೆಲೆ ಸಿಕ್ಕಿದೆ. ಪ್ಯಾನ್ ಇಂಡಿಯಾ ಲೆವೆಲ್‌ನಲ್ಲಿ ಕನ್ನಡ ಸಿನಿಮಾಗಳು ರಿಲೀಸ್ ಆಗುತ್ತಿದ್ದರೆ, ಹಿಂದಿ ಬೆಲ್ಟ್‌ನಲ್ಲಿರೋ ಪ್ರೇಕ್ಷಕರು ಅಲರ್ಟ್ ಆಗುವಷ್ಟು ಸ್ಯಾಂಡಲ್‌ವುಡ್‌ಗೆ ಗುರುತು ಸಿಕ್ಕಿದೆ. ಹಾಗೇ ಹೊಂಬಾಳೆ ಫಿಲ್ಮ್ಸ್‌ 'ಕಾಂತಾರ' ನಿರ್ಮಾಣ ಮಾಡಿದ್ದರಿಂದ ಬಾಲಿವುಡ್‌ನಲ್ಲಿ ರಿಲೀಸ್ ಮಾಡೋದು ಹೆಚ್ಚೇನು ಕಷ್ಟ ಆಗಿರಲಿಲ್ಲ. 'ಕೆಜಿಎಫ್ 2' ಅನ್ನು ಹಿಂದಿಯಲ್ಲಿ ವಿತರಿಸಿದ್ದ ಅನಿಲ್ ತಡಾನಿನೇ 'ಕಾಂತಾರ'ವನ್ನು ವಿತರಣೆ ಮಾಡಿದ್ದಾರೆ. 'ಕೆಜಿಎಫ್' ಸಿನಿಮಾದಂತೆ ಇದೂ ಕೂಡ ಬಾಕ್ಸಾಫೀಸ್‌ನಲ್ಲಿ ಧೂಳೆಬ್ಬಿಸುತ್ತಿದೆ.

'ಪುಷ್ಪ' ತಂತ್ರ ಬಳಸಿದ್ರಾ ಅನಿಲ್ ತಡಾನಿ?

'ಕಾಂತಾರ' ಬಾಕ್ಸಾಫೀಸ್‌ನಲ್ಲಿ ಅದ್ಭುತ ಕಮಾಯಿಯನ್ನೇ ಮಾಡುತ್ತಿದೆ. ಬಾಲಿವುಡ್‌ನಲ್ಲೂ ಈ ಸಿನಿಮಾ ಸಕ್ಸಸ್ ಕಂಡಿದೆ. ಆದರೆ, ಈ ಯಶಸ್ಸಿನ ಬಾಲಿವುಡ್‌ ವಿತರಕರ ಅನಿಲ್ ತಡಾನಿಯ ಚಾಣಾಕ್ಷತನವಿದೆ ಎಂದು ಬಾಲಿವುಡ್‌ನಲ್ಲಿ ಟಾಕ್. ಅನಿಲ್ ತಡಾನಿ 'ಕೆಜಿಎಫ್ 2' ಸಿನಿಮಾಗೂ ಮುನ್ನ 'ಪುಷ್ಪ' ಸಿನಿಮಾವನ್ನು ಗೋಲ್ಡ್‌ಮೈನ್ಸ್‌ ಟೆಲಿಫಿಲ್ಮ್ಸ್ ಜೊತೆ ಸೇರಿ ರಿಲೀಸ್ ಮಾಡಿದ್ದರು. ಹಿಂದಿ ಬೆಲ್ಟ್‌ನಲ್ಲಿಯೇ ಈ ಸಿನಿಮಾ ಸುಮಾರು 100 ಕೋಟಿ ರೂ.ಗೂ ಅಧಿಕ ಗಳಿಕೆ ಕಂಡಿತ್ತು. 'ಪುಷ್ಪ' ಸಿನಿಮಾವನ್ನು ಹೇಗೆ ಗೆಲ್ಲಿಸಿದ್ದರೋ ಹಾಗೇ 'ಕಾಂತಾರ'ವನ್ನೂ ಗೆಲ್ಲಿಸಿದ್ದಾರೆ ಅನ್ನೋದು ಬಾಲಿವುಡ್ ಮಂದಿ ವಾದ.

'ಪುಷ್ಪ' ತಂತ್ರಗಾರಿಕೆ ಏನು?

'ಪುಷ್ಪ' ಸಿನಿಮಾವನ್ನು ಬಾಲಿವುಡ್‌ನಲ್ಲಿ ರಿಲೀಸ್ ಮಾಡಿದಾಗ ಟಿಕೆಟ್ ಬೆಲೆಯನ್ನು ಕಡಿತಗೊಳಿಸಿದ್ದರು. ಹೀಗಾಗಿ ಜನರು ಥಿಯೇಟರ್‌ಗೆ ನುಗ್ಗಿದ್ದರು. 'ಕಾಂತಾರ'ಗೂ ಕೂಡ ಇದೇ ಸ್ಟ್ರಾಟಜಿಯನ್ನು ಬಳಸಿದ್ದರು ಅನ್ನೋದು ಬಾಲಿವುಡ್‌ ವಲಯದಲ್ಲಿ ಕೇಳಿಬರುತ್ತಿದೆ. ಸಿನಿಮಾ ತೆರೆಕಂಡಾಗ ಟಿಕೆಟ್ ಬೆಲೆ 112 ರೂಪಾಯಿಗೆ ಇಳಿಸಿದ್ದರು. ಇದು ಹಿಂದಿ ಬೆಲ್ಟ್‌ಗಳಲ್ಲಿ ಅದ್ಭುತವಾಗಿ ವರ್ಕ್‌ಔಟ್ ಆಗಿದೆ ಎಂದು ವರದಿಯಾಗಿದೆ. 'ಪುಷ್ಪ' ರಿಲೀಸ್ ವೇಳೆನೂ ಇದೇ ಸ್ಟ್ರಾಟಜಿಯನ್ನು ಬಳಸಿದ್ದರು. ಈಗ ವಿತರಕರ ಒತ್ತಾಯದ ಮೇರೆಗೆ 'ಕಾಂತಾರ' ಟಿಕೆಟ್ ದರವನ್ನು ಕೊಂಚ ಮಟ್ಟಿಗೆ ಏರಿಕೆ ಮಾಡಲಾಗಿದೆ.

'ಕಾಂತಾರ' ಕಲೆಕ್ಷನ್ ಎಷ್ಟು?

10 ದಿನಗಳಲ್ಲಿ 'ಕಾಂತಾರ' ಕಲೆಕ್ಷನ್ ಹಿಂದಿ ಬೆಲ್ಟ್‌ನಲ್ಲಿ ಸಖತ್ತಾಗಿದೆ. ಇದೂವರೆಗೂ ಬಾಕ್ಸಾಫೀಸ್‌ನಲ್ಲಿ ಸುಮಾರು 22 ಕೋಟಿ ರೂಪಾಯಿ ಕಲೆಕ್ಷನ್ ಮಾಡಿದೆ. ಮುಂದಿನ ಟಾರ್ಗೆಟ್ 30 ಕೋಟಿ. ಸದ್ಯ ಬಾಕ್ಸಾಫೀಸ್‌ನಲ್ಲಿ 'ಕಾಂತಾರ' ಕಲೆಕ್ಷನ್ ಸೂಪರ್ ಆಗಿದ್ದು, ಹಬ್ಬದಂದು ಬೇಜಾನ್ ಸದ್ದು ಮಾಡುತ್ತಿದೆ. ಹೊಸ ಸಿನಿಮಾಗಳ ಆರ್ಭಟ ಮಧ್ಯೆಯೂ 'ಕಾಂತಾರ' ಖದರ್ ಜೋರಾಗಿದೆ.