'ಪಠಾಣ್' ಬುಕಿಂಗ್: ಬೆಂಗಳೂರು, ಮುಂಬೈ, ದೆಹಲಿಗಳಲ್ಲಿ ಎಷ್ಟಿದೆ ಟಿಕೆಟ್ ದರ? ಹೆಚ್ಚು ದುಬಾರಿ ಎಲ್ಲಿ?

ಜನವರಿ 25ಕ್ಕೆ ಸಿನಿಮಾ ಬಿಡುಗಡೆ

ಶಾರುಖ್ ಖಾನ್, ಪೂರ್ಣ ಪ್ರಮಾಣದ ನಾಯಕ ನಟನಾಗಿ ನಟಿಸಿರುವ ಸಿನಿಮಾ ಒಂದು ಬಿಡುಗಡೆ ಆಗಿ ಐದು ವರ್ಷವಾಗಿದೆ. ಇದು ಒಂದು ರೀತಿಯ ಕಮ್ ಬ್ಯಾಕ್ ಸಿನಿಮಾ ಶಾರುಖ್ ಖಾನ್‌ಗೆ ಹಾಗಾಗಿ 'ಪಠಾಣ್' ಸಿನಿಮಾ ಮೇಲೆ ನಿರೀಕ್ಷೆ ಹೆಚ್ಚಿದೆ. ಅಭಿಮಾನಿಗಳು ಸಹ ಶಾರುಖ್ ಖಾನ್ ಅವರನ್ನು ಬೆಳ್ಳಿ ತೆರೆ ಮೇಲೆ ನೋಡಲು ಕಾತರರಾಗಿದ್ದಾರೆ. ಹಾಗಾಗಿ ಮುಂಬೈ, ದೆಹಲಿ, ಉತ್ತರದ ಹಲವು ನಗರಗಳಲ್ಲಿ 'ಪಠಾಣ್' ಸಿನಿಮಾಕ್ಕೆ ಒಳ್ಳೆಯ ಬುಕಿಂಗ್ ಆಗಿದೆ. ಬೆಂಗಳೂರಿನಲ್ಲಿ ಸಹ ಒಳ್ಳೆ ಬುಕಿಂಗ್ ಆಗಿದೆ.

ಮುಂಬೈನಲ್ಲಿ ಟಿಕೆಟ್ ಬೆಲೆ ಎಷ್ಟು?

ಮುಂಬೈ ಸೇರಿದಂತೆ ಹಲವು ಕಡೆಗಳಲ್ಲಿ ಸಿನಿಮಾದ ಟಿಕೆಟ್ ಬೆಲೆಯನ್ನು ದೊಡ್ಡ ಪ್ರಮಾಣದಲ್ಲಿ ಹೆಚ್ಚಿಸಲಾಗಿದೆ. ಮುಂಬೈನಲ್ಲಿ 'ಪಠಾಣ್' ಸಿನಿಮಾದ 2ಡಿ ಆವೃತ್ತಿಯೇ ಕೆಲವು ಮಲ್ಟಿಪ್ಲೆಕ್ಸ್‌ಗಳಲ್ಲಿ 2000 ರುಪಾಯಿ ಬೆಲೆಗೆ ಟಿಕೆಟ್ ಮಾರಾಟ ಮಾಡಲಾಗುತ್ತಿದೆ. ಇನ್ನು ಕೆಲವು ಚಿತ್ರಮಂದಿರಗಳಲ್ಲಿ 1500 ಕ್ಕೆ ಟಿಕೆಟ್ ಮಾರಾಟ ಮಾಡಲಾಗುತ್ತಿದೆ. 4ಡಿಎಕ್ಸ್, ಐಮ್ಯಾಕ್ಸ್ 2ಡಿ ಸ್ಕ್ರೀನ್‌ಗಳ ಟಿಕೆಟ್ ಬೆಲೆಯು ಸರಾಸರಿ 1500 ರು ಇದೆ.

ದೆಹಲಿಯಲ್ಲಿ ಎಷ್ಟಿದೆ ಬೆಲೆ?

'ಪಠಾಣ್' ಸಿನಿಮಾ ಟಿಕೆಟ್‌ಗೆ ಅತಿ ಹೆಚ್ಚು ಬೆಲೆ ಇರುವುದು ದೆಹಲಿಯಲ್ಲಿ. ದೆಹಲಿಯ ಸೆಲೆಕ್ಟ್ ಸಿಟಿ ವಾಕ್ ಪಿವಿಆರ್‌ನಲ್ಲಿ 'ಪಠಾಣ್' ಸಿನಿಮಾದ ಒಂದು ಟಿಕೆಟ್‌ಗೆ 2200 ರು ತೆರಬೇಕಾಗಿದೆ ಅಭಿಮಾನಿಗಳು. ಹಾಗಿದ್ದರು ಸಹ ಈ ಮಲ್ಟಿಪ್ಲೆಕ್ಸ್‌ನ ನಾಲ್ಕು ಶೋಗಳೂ ಫುಲ್ ಆಗಿವೆ. ಇನ್ನೂ ಕೆಲವು ಚಿತ್ರಮಂದಿರಗಳಲ್ಲಿ 1500 ರು ಟಿಕೆಟ್‌ಗಳು ಲಭ್ಯವಿದೆ. ಇತರೆ ಕೆಲವು ಸಾಮಾನ್ಯ ಚಿತ್ರಮಂದಿರಗಳಲ್ಲಿ 300 ರು.ಗೆ ಟಿಕೆಟ್ ಮಾರಾಟ ಮಾಡಲಾಗುತ್ತಿದೆ.

ಬೆಂಗಳೂರಿನಲ್ಲಿಯೂ ಬೆಲೆ ಕಡಿಮೆಯಿಲ್ಲ

ಬೆಂಗಳೂರಿನಲ್ಲಿಯೂ 'ಪಠಾಣ್' ಸಿನಿಮಾ ಹವಾ ಜೋರಾಗಿದೆ. ಜನವರಿ 25 ಕ್ಕೆ ಬಿಡುಗಡೆ ಆಗಲಿರುವ ಸಿನಿಮಾಕ್ಕೆ ಈಗಿನಿಂದಲೇ ಅಭಿಮಾನಿಗಳು ಟಿಕೆಟ್ ಬುಕ್ ಮಾಡುತ್ತಿದ್ದಾರೆ. ಕೆಲವು ಚಿತ್ರಮಂದಿರಗಳಲ್ಲಿ 150, ಕೆಲವರಲ್ಲಿ 250 ಹೀಗೆ ಸಾಮಾನ್ಯ ಟಿಕೆಟ್ ದರವೇ ಸಿನಿಮಾಕ್ಕಿದೆ. ಆದರೆ ಕೆಲವು ಐಶಾರಾಮಿ ಮಲ್ಟಿಪ್ಲೆಕ್ಸ್‌ಗಳಲ್ಲಿ ಟಿಕೆಟ್ ಬೆಲೆಯನ್ನು ದೊಡ್ಡ ಮೊತ್ತಕ್ಕೆ ಏರಿಸಲಾಗಿದೆ. ರೆಕ್ಸ್ ಡೈರೆಕ್ಟರ್ಸ್ ಕಟ್, ಪಿವಿಆರ್‌ ನ ಒಂದು ಶೋಗೆ 2000 ಟಿಕೆಟ್ ಬೆಲೆ ನಿಗದಿ ಪಡಿಸಲಾಗಿದೆ. ಹಲವು ಮಲ್ಟಿಪ್ಲೆಕ್ಸ್‌ಗಳಲ್ಲಿ ಶೋಗಳು ಈಗಾಗಲೇ ಹೌಸ್ ಫುಲ್ ಆಗಿವೆ.