ಕೊಲೆ, ಕಳ್ಳಸಾಗಣೆ ಆರೋಪ ಹೊರಿಸಿದ್ದವನ ವಿರುದ್ಧ ಪ್ರಕರಣ: ಸಲ್ಮಾನ್ ಖಾನ್‌ಗೆ ನಿರಾಸೆ

ಹೈಕೋರ್ಟ್ ಮೊರೆ ಹೋದ ಸಲ್ಮಾನ್ ಖಾನ್

ಬಳಿಕ ಸಿಟಿ ಸಿವಿಲ್ ನ್ಯಾಯಾಲಯದ ಆದೇಶದ ವಿರುದ್ಧ ಹೈಕೋರ್ಟ್‌ ಮೊರೆ ಹೋದ ಸಲ್ಮಾನ್ ಖಾನ್, ಕೇತನ್ ಕಕ್ಕಡ್‌ ತಮ್ಮ ಬಗ್ಗೆ ಸುಳ್ಳು ಮಾಹಿತಿ ಹರಡಂತೆ ತಡೆಯಾಜ್ಞೆ ನೀಡಲು ಕೋರಿದ್ದಾರೆ. ಹಾಗೂ ಸಿಟಿ ಸಿವಿಲ್ ಕೋರ್ಟ್‌ನ ಆದೇಶದ ವಿರುದ್ಧ ಮೇಲ್ಮನವಿ ಸಲ್ಲಿಸಿದ್ದಾರೆ. ಪ್ರಕರಣ ಆಲಿಸಿದ ಬಾಂಬೆ ಹೈಕೋರ್ಟ್ ತಡೆಯಾಜ್ಞೆ ನೀಡುವುದನ್ನು ನಿರಾಕರಿಸಿದೆ. ಹಾಗೂ ಸಿಟಿ ಸಿವಿಲ್ ಕೋರ್ಟ್‌ನ ಆದೇಶದ ಮೇಲ್ಮನವಿಗೆ ನೀಡಬೇಕಿರುವ ಆದೇಶವನ್ನು ಕಾಯ್ದಿರಿಸಿದೆ.

ಕೊಲೆ, ಕಳ್ಳಸಾಗಣೆ ಆರೋಪ ಹೊರಿಸಿದ್ದ ಕೇತನ್

ವಿಡಿಯೋ ಒಂದರಲ್ಲಿ ಸಲ್ಮಾನ್ ಖಾನ್‌ರ ಬಗ್ಗೆ ಮಾತನಾಡಿದ್ದ ಕೇತನ್ ಕಕ್ಕಡ್, 'ಸಲ್ಮಾನ್ ಖಾನ್‌ರ ವಿಶಾಲ ಪನ್ವೇಲ್ ಫಾರಂ ಹೌಸ್‌ನಲ್ಲಿ ಸಿನಿಮಾ ನಟ-ನಟಿಯರ ಶವಗಳನ್ನು ಹೂಳಲಾಗುತ್ತಿದೆ. ಸಲ್ಮಾನ್ ಖಾನ್‌ಗೆ ಎದುರು ತಿರುಗಿದವರ ಶವಗಳನ್ನು ಅಲ್ಲಿ ಹೂಳಲಾಗುತ್ತಿದೆ. ಅಲ್ಲದೆ, ಆ ಫಾರಂ ಹೌಸ್ ಅನೈತಿಕ ಚಟುವಟಿಕೆಗಳ ತಾಣವಾಗಿದ್ದು, ಅದು ಮಕ್ಕಳ ಕಳ್ಳ ಸಾಗಣೆಯ ತಾಣವೂ ಆಗಿದೆ'' ಎಂದಿದ್ದರು. ಸಲ್ಮಾನ್ ಖಾನ್‌ರ ಧರ್ಮದ ಬಗ್ಗೆ ಹಾಗೂ ಅವರ ಕುಟುಂಬ ಸದಸ್ಯರ ಬಗ್ಗೆಯೂ ಕೆಟ್ಟದಾಗಿ ಮಾತನಾಡಿದ್ದರು.

ಭೂಮಾಫಿಯಾ ಮಾಡುತ್ತಿದ್ದಾರೆಂದು ಆರೋಪ

ಯೂಟ್ಯೂಬ್ ಸಂದರ್ಶನವೊಂದರಲ್ಲಿ ಮಾತನಾಡಿದ್ದ ಕೇತನ್ ಕಕ್ಕಡ್, ''ಸಲ್ಮಾನ್ ಖಾನ್ ನನ್ನ ಜಮೀನು ಕಿತ್ತುಕೊಂಡಿದ್ದಾರೆ. ಅವರ ಸೂಚನೆ ಮೇರೆಗೆ ಅರಣ್ಯ ಇಲಾಖೆ ನನ್ನ ಜಮೀನನ್ನು ರದ್ದು ಮಾಡಿದೆ. ಅಲ್ಲದೆ ನನ್ನ ಜಮೀನಿಗೆ ಓಡಾಡಲು ಇರುವ ಏಕೈಕ ದಾರಿಯನ್ನು ಗೇಟ್‌ ಇಟ್ಟು ಬಂದ್ ಮಾಡಿದ್ದಾರೆ ಸಲ್ಮಾನ್. ಅಲ್ಲಿ ಸಲ್ಮಾನ್ ಒಂದು ದೇವಸ್ಥಾನ ನಿರ್ಮಿಸಿದ್ದು ಅದರ ಗೇಟ್‌ ಅನ್ನು ಬಂದ್ ಮಾಡಿದ್ದಾರೆ. ಪನ್ವೆಲಾದಲ್ಲಿ ಸಲ್ಮಾನ್ ಖಾನ್ ಭೂ ಮಾಫಿಯಾ ನಡೆಸುತ್ತಿದ್ದಾರೆ. ನನ್ನ ಜಮೀನು ಮಾತ್ರವಲ್ಲ ಇನ್ನೂ ಕೆಲವರ ಜಮೀನನ್ನು ಅವರು ವಶಪಡಿಸಿಕೊಂಡಿದ್ದಾರೆ'' ಎಂದಿದ್ದರು. ಅದೇ ಸಂದರ್ಶನದಲ್ಲಿ ಇದ್ದ ಇಬ್ಬರು ಯುವತಿಯರು ಸಹ ಸಲ್ಮಾನ್ ಖಾನ್ ಅನ್ನು ನಿಂದಿಸಿದ್ದರು. ಅವರ ವಿರುದ್ಧವೂ ದೂರು ದಾಖಲಿಸಲಾಗಿತ್ತು.

ಸಲ್ಮಾನ್ ಖಾನ್‌ರ ಫಾರಂ ಹೌಸ್‌ನ ವಿಶೇಷತೆ

ಸಲ್ಮಾನ್‌ ಖಾನ್‌ ಅವರು ಪನ್ವೆಲ್ ನಲ್ಲಿ ಐಶಾರಾಮಿ ಫಾರ್ಮ್‌ ಹೌಸ್‌ ಹೊಂದಿದ್ದಾರೆ. ಇದರ ಒಟ್ಟು ವಿಸ್ತೀರ್ಣ 150 ಎಕರೆ. ಈ ವಿಶಾಲ ಜಾಗದಲ್ಲಿ ಮನೆ, ತೋಟ, ಈಜುಕೊಳ, ಜಿಮ್, ಅತಿಥಿ ಗೃಹ ಸೇರಿದಂತೆ ಅಗತ್ಯ ಇರುವ ಎಲ್ಲವನ್ನು ಸಲ್ಲು ನಿರ್ಮಾಣ ಮಾಡಿಕೊಂಡಿದ್ದಾರೆ. 150 ಎಕರೆ ಜಾಗದಲ್ಲಿ ನಿರ್ಮಾಣ ಆಗಿರುವ ಈ ಫಾರ್ಮ್‌ ಹೌಸ್‌ ಬೆಲೆ 80 ಕೋಟಿ ಎನ್ನಲಾಗುತ್ತದೆ. ಫಾರಂ ಹೌಸ್‌ನಲ್ಲಿ ಕುದುರೆ ಲಾಯ, ಕೃಷಿ ಭೂಮಿ, ಮನೊರಂಜನಾ ಸ್ಥಳ ಇತರೆಗಳನ್ನು ವಿಂಗಡಿಸಲಾಗಿದೆ. ಲಾಕ್‌ಡೌನ್ ಸಮಯವನ್ನು ಸಲ್ಮಾನ್ ಖಾನ್ ಇಲ್ಲಿಯೇ ಕಳೆದಿದ್ದರು. ಫಾರಂ ಹೌಸ್‌ನಲ್ಲಿ ತಿಂಗಳುಗಟ್ಟಲೆ ಸಮಯ ಕಳೆಯುತ್ತಾರೆ ಸಲ್ಮಾನ್.