ನಟಿ ಶ್ರುತಿ ಹಾಸನ್ ಮೇಲೆ ಅಪರಿಚಿತನ ದಾಳಿ

ಜನಪ್ರಿಯ ನಟ ಕಮಲ್ ಹಾಸನ್ ಅವರ ಪುತ್ರಿ ಹಾಗೂ ನಟಿ ಶ್ರುತಿ ಹಾಸನ್ (27) ಅವರ ಮೇಲೆ ಅಪರಿಚಿತ ವ್ಯಕ್ತಿಯೊಬ್ಬ ದಾಳಿ ಮಾಡಿದ್ದಾರೆ. ಈ ಘಟನೆ ಮಂಗಳವಾರ (ನ.19) ಬೆಳಗ್ಗೆ ಮುಂಬೈನ ಬಾಂದ್ರಾದಲ್ಲಿರುವ ಶ್ರುತಿ ಹಾಸನ್ ಅವರ ಅಪಾರ್ಟ್ ಮೆಂಟ್ ನಲ್ಲಿ ನಡೆದಿದೆ.

ಈ ಅಪರಿಚಿತ ವ್ಯಕ್ತಿ ಮನೆಯ ಕಾಲಿಂಗ್ ಬೆಲ್ ಒತ್ತಿದ್ದಾನೆ. ಬಾಗಿಲು ತೆಗೆದ ಕೂಡಲೆ ಶ್ರುತಿ ಹಾಸನ್ ಅವರ ಮೇಲೆ ದಾಳಿ ಮಾಡಿ ಅವರ ಕುತ್ತಿಗೆ ಹಿಡಿದು ನೂಕಿದ್ದಾನೆ. ಮನೆಯ ಒಳಗೆ ನುಗ್ಗಲು ಯತ್ನಿಸಿದ್ದಾನೆ. ಆದರೆ ಸಮಯಪ್ರಜ್ಞೆ ಮೆರೆದ ಶ್ರುತಿ ಅವರು ಕೂಡಲೆ ಬಾಗಿಲನ್ನು ಜೋರಾಗಿ ತಳ್ಳಿದ್ದಾರೆ.

ನಟಿ ಶ್ರುತಿ ಹಾಸನ್

ಈ ಅಪರಿಚಿತ ವ್ಯಕ್ತಿ 'ರಾಮಯ್ಯ ವಸ್ತಾವಯ್ಯಾ' ಚಿತ್ರೀಕರಣ ಸಮಯದಿಂದಲೂ ಹಿಂಬಾಲಿಸುತ್ತಿದ್ದ ಎನ್ನಲಾಗಿದೆ. ಮೂರು ದಿನಗಳ ಹಿಂದೆಯೂ ಸೆಟ್ಸ್ ಗೆ ಬಂದಿದ್ದನಂತೆ. ಈ ವ್ಯಕ್ತಿ ಯಾರು ಎಂಬುದು ಇನ್ನಷ್ಟೆ ಗೊತ್ತಾಗಬೇಕು. ಈ ಬಗ್ಗೆ ಟ್ವಿಟ್ಟರ್ ನಲ್ಲೂ ಶ್ರುತಿ ಹಾಸನ್, "ನಾನು ಆರಾಮವಾಗಿದ್ದೇನೆ. ನನ್ನ ಬಗ್ಗೆ ತೋರಿದ ಕಾಳಜಿಗೆ ಧನ್ಯವಾದಗಳು" ಎಂದಿದ್ದಾರೆ. (ಏಜೆನ್ಸೀಸ್)