ಮುಖಪುಟ

ಬಾಲಿವುಡ್

ನಟ ಅಮೀರ್ ಖಾನ್ ಸಿನಿಮಾದಲ್ಲಿ ತಮಿಳಿನ ಖ್ಯಾತ ನಟ ವಿಜಯ್ ಸೇತುಪತಿ ನಟಿಸಲಿದ್ದಾರೆ ಎನ್ನಲಾಗಿತ್ತು. ಆದರೆ ಈ ಅವಕಾಶ ಕಳೆದುಕೊಂಡಿದ್ದಾರೆ ವಿಜಯ್ ಸೇತುಪತಿ ಎಂಬ ವರದಿಗಳು ಬಾಲಿವುಡ್‌ ಅಂಗಳದಿಂದ ಬರುತ್ತಿವೆ.

ಫಾರೆಸ್ಟ್ ಗಂಪ್ ಸಿನಿಮಾದ ಹಿಂದಿ ರೀಮೇಕ್ 'ಲಾಲ್‌ ಸಿಂಗ್ ಚಡ್ಡಾ' ಸಿನಿಮಾದಲ್ಲಿ ನಟ ಅಮೀರ್ ಖಾನ್ ಜೊತೆಗೆ ವಿಜಯ್ ಸೇತುಪತಿ ನಟಿಸಬೇಕಿತ್ತು. ಈ ಕುರಿತು ಮಾತುಕತೆ ಸಹ ಆಗಿತ್ತು, ಆದರೆ ಈಗ ಹಠಾತ್ತನೆ ವಿಜಯ್ ಸೇತುಪತಿ ಲಾಲ್ ಸಿಂಗ್ ಚಡ್ಡಾ ಸಿನಿಮಾದಿಂದ ಹಿಂದೆ ಸರಿದಿದ್ದಾರೆ.

ವಿಜಯ್ ಸೇತುಪತಿ, ಅಮೀರ್ ಖಾನ್ ಸಿನಿಮಾದಿಂದ ಹಿಂದೆ ಸರಿಯಲು ಕಾರಣ ಕೊರೊನಾ. ಹೌದು, ಕೊರೊನಾ ಲಾಕ್‌ಡೌನ್ ಕಾರಣದಿಂದ ವಿಜಯ್ ಸೇತುಪತಿ ಅವರ ಶೆಡ್ಯೂಲ್ ನಲ್ಲಿ ಭಾರಿ ಬದಲಾವಣೆ ಆಗಿದ್ದು, ಸೇತುಪತಿ ಹಾಗೂ ಲಾಲ್‌ ಸಿಂಗ್ ಚಡ್ಡಾ ಸಿನಿಮಾಗಳ ಶೆಡ್ಯೂಲ್ ಹೊಂದಿಕೆ ಆಗುತ್ತಿಲ್ಲ. ಹಾಗಾಗಿ ಅನಿವಾರ್ಯವಾಗಿ ವಿಜಯ್ ಸೇತುಪತಿ ಸಿನಿಮಾದಿಂದ ಹೊರಬರುತ್ತಿದ್ದಾರೆ.

ವಿಜಯ್ ಸೇತುಪತಿ ಹಲವಾರು ಸಿನಿಮಾಗಳನ್ನು ಒಪ್ಪಿಕೊಂಡಿದ್ದಾರೆ. ದಿನವೊಂದಕ್ಕೆ ಮೂರು-ನಾಲ್ಕು ಶಿಫ್ಟ್‌ಗಳಲ್ಲಿ ಕೆಲಸ ಮಾಡುತ್ತಿದ್ದಾರಂತೆ. ಒಂದೊಮ್ಮೆ ಅಮೀರ್ ಖಾನ್ ಸಿನಿಮಾದಲ್ಲಿ ನಟಿಸಿದರೆ ಬೇರೆ ಸಿನಿಮಾಗಳಿಗೆ ಸಮಸ್ಯೆ ಆಗುತ್ತದೆ ಎಂಬ ಕಾರಣಕ್ಕೆ ಸಿನಿಮಾದಿಂದ ಹೊರಬಂದಿದ್ದಾರೆ ವಿಜಯ್ ಸೇತುಪತಿ.

ಮತ್ತೊಂದು ವರದಿ ಹೇಳುವಂತೆ. ಲಾಲ್‌ ಸಿಂಗ್ ಚಡ್ಡಾ ಸಿನಿಮಾದಲ್ಲಿ ನಟಿಸಲು ತೂಕ ಕಡಿಮೆ ಮಾಡಿಕೊಳ್ಳುವಂತೆ ವಿಜಯ್ ಸೇತುಪತಿಗೆ ಸೂಚಿಸಿದ್ದರಂತೆ ನಿರ್ದೇಶಕ ಅದ್ವೈತ್‌. ಆದರೆ ವಿಜಯ್ ಸೇತುಪತಿ ತೂಕ ಇಳಿಸಿಕೊಳ್ಳಲಿಲ್ಲವಾದ್ದರಿಂದ ಸಿನಿಮಾದಿಂದ ಅನಿವಾರ್ಯವಾಗಿ ಹೊರ ಬರಬೇಕಾಗಿದೆ ಎನ್ನಲಾಗುತ್ತಿದೆ.