ತನ್ನ ಬಯೋಪಿಕ್‌ಗೆ ಕೇವಲ 1 ರೂ. ಪಡೆದಿದ್ದ ಮಿಲ್ಖಾ ಸಿಂಗ್; ಆ ಹಣದ ವಿಶೇಷತೆ ಏನು ಗೊತ್ತಾ?

ಬಯೋಪಿಕ್ ನಿರ್ಮಾಣಕ್ಕೆ 1 ರೂ. ಪಡೆದಿದ್ದ ಸಿಂಗ್

ತನ್ನದೆ ಬಯೋಪಿಕ್ ನಿರ್ಮಾಣ ಮಾಡಲು ಅತೀ ಕಡಿಮೆ ಹಣ ತೆಗೆದುಕೊಳ್ಳುವ ಮೂಲಕ ಉದಾರತೆ ಮೆರೆದಿದ್ದರು ಮಿಲ್ಖಾ ಸಿಂಗ್. ಸರಳ ವ್ಯಕ್ತಿತ್ವದ ಮೂಲಕವೇ ಎಲ್ಲರ ಹೃದಯ ಗೆದ್ದಿದ್ದ ಮಿಲ್ಖಾ ಸಿಂಗ್ ತನ್ನ ಬಯೋಪಿಕ್ ಮಾಡಲು ಪಡೆದ ಹಣ ನಿಜಕ್ಕೂ ಅಚ್ಚರಿ ಮೂಡಿಸಿತ್ತು. ಮಿಲ್ಖಾ ಸಿಂಗ್ ಕೇವಲ 1 ರೂ. ಪಡೆಯುವ ಮೂಲಕ ತನ್ನ ಜೀವನವನ್ನು ತೆರೆಮೇಲೆ ತರಲು ಅನುಮತಿ ನೀಡಿದ್ದರು.

ಈ 1 ರೂಪಾಯಿಯ ವಿಶೇಷತೆ ಏನು?

ಮಿಲ್ಖಾ ಸಿಂಗ್ ಪಡೆದ 1 ರೂಪಾಯಿನಲ್ಲಿ ವಿಶೇಷತೆ ಅಡಗಿತ್ತು. 'ಫ್ಲೈಯಿಂಗ್ ಸಿಖ್' ಪಡೆದ 1 ರೂಪಾಯಿಯನ್ನು 1958ರಲ್ಲಿ ಮುದ್ರಿಸಲಾಗಿತ್ತು. 1958ರ ವಿಶೇಷತೆ ಎಂದರೆ ಮಿಲ್ಖಾ ಸಿಂಗ್ ಕಾಮನ್ ವೆಲ್ತ್ ಕ್ರೀಡಾಕೂಟದಲ್ಲಿ ಭಾರತಕ್ಕಾಗಿ ಮೊದಲ ಬಾರಿಗೆ ಚಿನ್ನದ ಪದಕ ಗೆದ್ದ ಸುವರ್ಣ ವರ್ಷವದು. ಆ ವರಷದ 1 ರೂ. ನೋಟನ್ನು ಮಿಲ್ಖಾ ಸಿಂಗ್ ಅವರಿಗೆ ಚಿತ್ರತಂಡ ನೀಡಿತ್ತು.

ನಿರ್ದೇಶಕರು ಹೇಳಿದ್ದೇನು?

ಈ ಬಗ್ಗೆ ಪ್ರತಿಕ್ರಿಯೆ ನೀಡಿದ್ದ ನಿರ್ದೇಶಕ ರಾಕೇಶ್ ಓಂ ಪ್ರಕಾಶ್ ಮೆಹ್ರಾ, "ನಮ್ಮ ಚಿತ್ರದಲ್ಲಿ ಅವರ ಕಥೆ ಹೇಳಲು ಅವಕಾಶ ಮಾಡಿಕೊಟ್ಟ ಮಿಲ್ಖಾಜಿ ಅವರಿಗೆ ಅಮೂಲ್ಯವಾದ ಮೆಚ್ಚುಗೆಯ ಸಂಕೇತ ನೀಡಲು ಬಯಸಿದ್ದೇವೆ. ವಿಶೇಷವಾದುದ್ದನ್ನು ಕೊಡಲು ಬಹಳ ಸಮಯ ಹುಡುಕಿದ್ದೆವು. ಅಂತಿಮವಾಗಿ ಸಿಕ್ಕಿದೆ. 1958ರಲ್ಲಿ ಮುದ್ರಿತವಾದ ವಿಶೇಷ 1 ರೂ. ನೋಟನ್ನು ನೀಡಿದ್ದೇವೆ" ಎಂದು ಹೇಳಿದ್ದರು.

ಯುವಕರಿಗೆ ಈ ಸಿನಿಮಾ ಪ್ರೇರಣೆಯಾಗಬೇಕು

ಮಿಲ್ಖಾ ಸಿಂಗ್ ಅವರಿಗೆ ಹಣ ಮುಖ್ಯವಾಗಿರಲ್ಲ. ಮೆಹ್ರಾ ಸಿನಿಮಾ ಮಾಡುವುದನ್ನು ಮಾತ್ರ ಬಯಸಿದ್ದರು. "ಈ ಸಿನಿಮಾ ಹೇಗೆ ತಯಾರಾಗಬೇಕು ಎಂದರೆ ಹೆಚ್ಚು ಯುವಕರು ಅಥ್ಲೀಟ್ ನಲ್ಲಿ ಪದಕಗಳನ್ನು ಗೆಲ್ಲಲು ಪ್ರೇರೇಪಿಸುವ ಹಾಗೆ ಇರಬೇಕು" ಎಂದು ಮಿಲ್ಖಾ ಸಿಂಗ್ ನಿರ್ಮಾಪಕರ ಬಳಿ ಹೇಳಿದ್ದರಂತೆ.

ಅತೀ ಹೆಚ್ಚು ಕಲೆಕ್ಷನ್ ಮಾಡಿದ್ದ ಬಯೋಪಿಕ್

ಸಿನಿಮಾದ ಲಾಭದ ಶೇರನ್ನು ಮಿಲ್ಖಾ ಸಿಂಗ್ 2003ರಲ್ಲಿ ಬಡ ಮತ್ತು ನಿರ್ಗತಿಕ ಕ್ರೀಡಾಪಟುಗಳಿಗಾಗಿ ಸ್ಥಾಪಿಸಿದ್ದ ಚಾರಿಟೆಬಲ್ ಟ್ರಸ್ಟ್ ಗೆ ನೀಡಬೇಕೆಂದು ಸಿಂಗ್ ಹೇಳಿದ್ದರು ಎನ್ನುವ ಮಾತು ಕೂಡ ಕೇಳಿಬಂದಿತ್ತು. 2013ರಲ್ಲಿ ಬಿಡುಗಡೆಯಾದ ಭಾಗ್ ಮಿಲ್ಖಾ ಭಾಗ್ ದೊಡ್ಡ ಮಟ್ಟದಲ್ಲಿ ಸಕ್ಸಸ್ ಕಂಡಿತ್ತು. ಪ್ರೇಕ್ಷಕರ ಮೆಚ್ಚುಗೆ ಗಳಿಸಿತ್ತು. ಅಲ್ಲದೇ ಕೋಟಿ ಕೋಟಿ ಹಣ ಕಲೆಕ್ಷನ್ ಮಾಡಿತ್ತು. ಸುಮಾರು 200 ಕೋಟಿಗೂ ಅಧಿಕ ಹಣ ಕಲೆಕ್ಷನ್ ಮಾಡಿದೆ.