Dubbing movies in kannada : ಕನ್ನಡಕ್ಕೆ ಡಬ್ ಮಾಡಿದರೆ ಪ್ಯಾನ್ ಇಂಡಿಯಾ ಸಿನಿಮಾಗಳು ವರ್ಕೌಟ್ ಆಗಲ್ವೇ?

ತಮಿಳು- ಮಲಯಾಳಂ ಚಿತ್ರಗಳಿಗೂ ಇದೆ ಡಿಮ್ಯಾಂಡ್

ತಮಿಳು ಚಿತ್ರಗಳಿಗೆ ಮೊದಲಿನಿಂದಲೂ ಬೆಂಗಳೂರು ಒಂದು ದೊಡ್ಡ ಮಾರ್ಕೆಟ್. ಬೆಂಗಳೂರಿನ ಒಂದಷ್ಟು ಗಲ್ಲಿಗಳಿಗೆ ಹೋದರೆ ನೀವು ತಮಿಳುನಾಡಿನಲ್ಲಿ ಸಂಚರಿಸುವ ಅನುಭವವಾಗುತ್ತದೆ. ತಮಿಳಿನ ನಾಮಫಲಕಗಳು ಮಾತ್ರವಲ್ಲ ತಮಿಳು ಚಿತ್ರ ತಾರೆಯರ ದೊಡ್ಡದೊಡ್ಡ ಚಿತ್ರಪಟಗಳು ನಿಮಗೆ ಎದುರಾಗುತ್ತದೆ. ಬೆಂಗಳೂರಿನ ಜೊತೆಗೆ ಬೆಂಗಳೂರು ಗ್ರಾಮಾಂತರ ಕೋಲಾರದ ಕೆಜಿಎಫ್ ಪ್ರಾಂತ್ಯ ಮೈಸೂರು ಭದ್ರಾವತಿ ಇಲ್ಲೆಲ್ಲ ತಮಿಳು ಚಿತ್ರಗಳಿಗೆ ಒಳ್ಳೆ ಮಾರ್ಕೆಟ್ ಇದೆ. ಇನ್ನು ಮಲಯಾಳಂ ಚಿತ್ರಗಳಿಗೆ ಬಂದರೆ ಕರಾವಳಿ ಪ್ರಾಂತ್ಯದಲ್ಲಿ ಕೊಡಗಿನಲ್ಲಿ ತಕ್ಕಮಟ್ಟಿಗೆ ಒಳ್ಳೆ ರೆಸ್ಪಾನ್ಸ್ ಸಿಗುತ್ತದೆ. ಹಿಂದಿ ಚಿತ್ರಗಳಿಗೂ ಬೆಂಗಳೂರಿನ ಜೊತೆಜೊತೆಗೆ ಮುಂಬೈ-ಕರ್ನಾಟಕ ಅಥವಾ ಇಂದಿನ ಕಿತ್ತೂರು ಕರ್ನಾಟಕದಲ್ಲಿ ಮೊದಲಿನಿಂದಲೂ ಡಿಮ್ಯಾಂಡ್ ಇದ್ದೇ ಇದೆ. ಹೀಗಾಗಿ ಒಂದು ಅರ್ಥದಲ್ಲಿ ಕರ್ನಾಟಕದಲ್ಲಿ ಕನ್ನಡೇತರ ಚಿತ್ರಗಳನ್ನು ಜನರು ಮೊದಲಿನಿಂದಲೂ ಅದೇ ಭಾಷೆಯಲ್ಲಿ ನೋಡಿಕೊಂಡು ಬಂದಿರುವುದರಿಂದ ಅವರಿಗೆ ಡಬ್ ಮಾಡಿದರೆ ಮೂಲ ಚಿತ್ರದ ಫ್ಲೇವರ್ ಖಂಡಿತ ಸಿಗುವುದಿಲ್ಲ. ಹೀಗಾಗಿ ಈ ಭಾಷೆಗಳನ್ನು ಗೊತ್ತಿರುವ ಬಹುತೇಕ ಕನ್ನಡಿಗರು ಅದೇ ಭಾಷೆಯಲ್ಲಿ ನೋಡಲು ಯತ್ನಿಸುತ್ತಾರೆ.

ಸಮರ್ಪಕವಾದ ಡಬ್ಬಿಂಗ್ ಕೊರತೆ

ಕನ್ನಡಿಗರು ಕನ್ನಡದಲ್ಲಿ ಅನ್ಯ ಭಾಷಾ ಚಿತ್ರಗಳನ್ನು ನೋಡದೇ ಇರಲು ಅತಿಮುಖ್ಯವಾದ ಮತ್ತೊಂದು ಕಾರಣವೆಂದರೆ ಡಬ್ಬಿಂಗ್. ಬಹುತೇಕ ಡಬ್ಬಿಂಗ್ ಚಿತ್ರಗಳನ್ನು ನಾವು ಗಮನಿಸಿದಾಗ ಲಿಪ್ ಸಿಂಕ್ ಎನ್ನುವುದು ಸರಿಯಾದ ರೀತಿಯಲ್ಲಿ ಆಗಿರುವುದಿಲ್ಲ. ಜೊತೆಗೆ ಡಬ್ಬಿಂಗ್ ಸಿನಿಮಾಗಳಲ್ಲಿ ಬಳಕೆ ಮಾಡುವ ಕನ್ನಡವು ಕೂಡ ತೀರಾ ಕಳಪೆ ಆಗಿರುತ್ತದೆ. 'ಬಂದ ನಮ್ಮ ಸರೈನೋಡು', 'ವೇಗ-ಉದ್ವೇಗ 8', 'ತಿರುಗೋ ಮೀಸೆ', 'ಸೆಲ್ಫಿ ಶುರುಮಾಡಿದ ಲವ್ ಸ್ಟೋರಿ' ಒಂದಷ್ಟು ಡಬ್ಬಿಂಗ್ ಚಿತ್ರಗಳ ಟೈಟಲ್ ಗಳು. ಟೈಟಲ್ ಗಳಲ್ಲೇ ಹೀಗಿರಬೇಕಾದರೆ ಇದರೊಳಗಿನ ಕನ್ನಡ ಡಬ್ಬಿಂಗ್ ಯಾವ ರೀತಿ ಇರುತ್ತದೆ ಎಂಬುದು ಬಿಡಿಸಿ ಹೇಳಬೇಕಾಗಿಲ್ಲ. ಲಿಪ್ ಸಿಂಕ್ ಮಾಡುವ ಸಾಹಸ ಕೂಡ ಒಂದು ರೀತಿಯಲ್ಲಿ ಅತ್ಯಂತ ಹಾಸ್ಯಾಸ್ಪದ ರೀತಿಯಲ್ಲಿ ಕಾಣುತ್ತದೆ. ಎಷ್ಟೋಸಲ ಇಲ್ಲಿರುವುದು ನಮ್ಮ ಕನ್ನಡ ಭಾಷೆಯಾ ಅನ್ನುವ ಭಾವನೆ ಅಲ್ಲಿ ಬಂದುಬಿಡುತ್ತೆ. ಹೀಗಾಗಿಯೇ ಟಿವಿ ಚಾನೆಲ್ ಗಳಲ್ಲಿ ಒಂದಷ್ಟು ಹೊತ್ತು ಟೈಂಪಾಸ್ ಗಾಗಿ ಈ ಸಿನಿಮಾಗಳನ್ನು ನೋಡುತ್ತಾರೆ ಹೊರತು
ಯಾರು ಕೂಡ ಚಿತ್ರಮಂದಿರಗಳಿಗೆ ಹೋಗಿ ದುಡ್ಡು ಕೊಟ್ಟು ಟಿಕೆಟ್ ಖರೀದಿ ಮಾಡಿ ನೋಡಲು ಸಾಹಸ ಮಾಡುವುದಿಲ್ಲ.

ಬೇರೆ ಭಾಷೆಗಳಲ್ಲಿ ವೃತ್ತಿಪರ ಡಬ್ಬಿಂಗ್ ನಡೆಯುತ್ತದೆ

ನೀವು ಒಂದು ಮಲಯಾಳಂ ಚಿತ್ರವನ್ನು ತೆಲುಗಿನಲ್ಲಿ ನೋಡಿ. ಮೂಲ ಭಾಷೆ ಅರ್ಥವಾಗದೇ ಹೋದರೂ ಕೂಡ ತೆಲುಗಿನ ಭಾಷೆ ಎಷ್ಟರಮಟ್ಟಿಗೆ ಮೂಲ ಭಾಷೆಯಲ್ಲಿನ ಭಾವನೆಗಳನ್ನು ಅದೇ ದಾಟಿಯಲ್ಲಿ ದಾಟಿಸುತ್ತದೆ ಅದರಲ್ಲಿ ಗೊತ್ತಾಗುತ್ತದೆ. ಬಹುತೇಕ ತೆಲುಗು- ತಮಿಳು- ಮಲಯಾಳಂ ಚಿತ್ರಗಳನ್ನು ನಾವು ಗಮನಿಸಿದಾಗ ಡಬ್ಬಿಂಗ್ ಅತ್ಯಂತ ಪೂರಕವಾಗಿದ್ದು ಅನ್ಯಭಾಷೆಯ ಚಿತ್ರವನ್ನು ನೋಡುವ ಭಾವನೆ ಬರದಷ್ಟು ವೃತ್ತಿಪರವಾದ ಕೆಲಸದಲ್ಲಿ ಕಾಣುತ್ತದೆ. ಅರವತ್ತರ ದಶಕದ ಆರಂಭದಲ್ಲೇ ಕನ್ನಡ ಸಿನಿಮಾರಂಗದಲ್ಲಿ ಸಂಪೂರ್ಣವಾಗಿ ಡಬ್ಬಿಂಗ್ ನಿಷೇಧಿಸಿದ ಕಾರಣಕ್ಕೆ ಇಂದು ಡಬ್ಬಿಂಗ್ ಎಂಬ ಹೊಸ ಸಂಸ್ಕೃತಿ ಕನ್ನಡಕ್ಕೆ ಅಷ್ಟಾಗಿ ಹೊಂದಾಣಿಕೆ ಆಗುತ್ತಿಲ್ಲ.

OTT ಬಂದ ಮೇಲೆ ಎಲ್ಲಾ ಬದಲಾಗಿದೆ!

OTT ಬಂದಮೇಲೆ ಅದರಲ್ಲೂ ಕೂಡ ಕರೋನದ ಎರಡು ವರ್ಷ ಮನೆಯಲ್ಲಿ ಜನಸಾಮಾನ್ಯರು ಬಂಧನಕ್ಕೆ ಒಳಪಟ್ಟಿದ್ದ ಕಾಲದಲ್ಲಿ ಅವರಿಗೆ ಹೆಚ್ಚು ಎಂಟರ್ಟೈನ್ಮೆಂಟ್ ಸಿಕ್ಕಿದ್ದು OTT ಗಳ ಮೂಲಕವೇ! ಆ ಸಂದರ್ಭದಲ್ಲಿ ಬಹುತೇಕ ಮನೆಗಳಲ್ಲಿ ಜನ ಅತಿಹೆಚ್ಚಾಗಿ ಮಲಯಾಳಂ ಸಿನಿಮಾಗಳನ್ನು ನೋಡಿದರು. ಕರ್ನಾಟಕದಲ್ಲಿ ಮಾತ್ರವಲ್ಲ ಭಾರತದಲ್ಲಿ ಅತಿ ಹೆಚ್ಚು ಜನ ಆ ಸಮಯದಲ್ಲಿ ನೋಡಿದ್ದು ಮಲಯಾಳಂ ಚಿತ್ರಗಳನ್ನು. ಭಾಷೆ ಬರದೇ ಹೋದರೂ ಸಬ್-ಟೈಟಲ್ ಜೊತೆಯಲ್ಲಿ ಈ ಸಿನೆಮಾಗಳನ್ನು ನೋಡಿದ್ದಾರೆ. ಮುಖ್ಯವಾಗಿ ಮಲಯಾಳಂ ಸಿನೆಮಾಗಳನ್ನುನೋಡುವುದಕ್ಕೆ ಕಾರಣ ಕಥಾವಸ್ತು ಮತ್ತು ಭಾವನಾತ್ಮಕವಾಗಿ ಅದನ್ನು ತೆರೆಗೆ ಅವರು ತರುವ ರೀತಿ. ಇದೇ ಮಲಯಾಳಂ ಚಿತ್ರಗಳನ್ನು ನೀವು ಕನ್ನಡಕ್ಕೆ ಡಬ್ ಮಾಡಿದರೆ? ಖಂಡಿತವಾಗಿಯೂ ಅದೇ ಒಂದು ಇಂಪ್ಯಾಕ್ಟ್ ಕ್ರಿಯೇಟ್ ಮಾಡುವುದಿಲ್ಲ. ಎದುರಿಗೆ ಕಾಣುವ ಪಾತ್ರದ ಅಭಿನಯಕ್ಕೆ ತಕ್ಕ ದೃಶ್ಯದ ಸಂಯೋಜನೆ ಮತ್ತು ಸಂಭಾಷಣೆ ಬಹಳ ಮುಖ್ಯವಾಗುತ್ತದೆ. ಎಷ್ಟು ಸಲ ಭಾಷೆ ಬರದೇ ಹೋದರೂ ಕೂಡ ಭಾವನೆಗಳಿಂದ ಅದನ್ನು ನಾವು ಅನುಭವಿಸುತ್ತೇವೆ. ಆದರೆ ಭಾವನೆಗಳಿಗೆ ಪೂರಕವಾದ ಸಂಭಾಷಣೆಗೆ ಇಲ್ಲದೆ ಹೋದರೆ ಈ ದೃಶ್ಯ ಬಿದ್ದುಹೋಗುತ್ತದೆ. ಹೀಗಾಗಿಯೇ ಬಹುತೇಕರು ಮೂಲ ಆವೃತ್ತಿಯಲ್ಲಿ ಸಿನಿಮಾಗಳನ್ನು ನೋಡಲು ಇಷ್ಟಪಡುವುದು. ಡಬ್ಬಿಂಗ್ ಚಿತ್ರಗಳಿಗೆ ಒಂದು ಸರಿಯಾದ ಪದ್ಧತಿ ಮತ್ತು ಅದನ್ನು ಬಳಸುವ ಭಾಷೆ ಮತ್ತು ಅದಕ್ಕೆ ಬೇಕಾದ ತಂತ್ರಜ್ಞಾನವನ್ನು ಕನ್ನಡ ಸಿನಿಮಾರಂಗ ಅಳವಡಿಸಿಕೊಳ್ಳುವವರೆಗೂ ಕಂಡಿತವಾಗಿ ಕೂಡ ಜನ ಡಬ್ಬಿಂಗ್ ಚಿತ್ರಗಳ ಕಡೆಗೆ ಮುಖ ಮಾಡುವುದಿಲ್ಲ.