ಸಿನಿಮಾ ತಾರೆ ಮೀರಾ ಜಾಸ್ಮಿನ್‍ಗೆ ಕೋರ್ಟ್ ಸಮನ್ಸ್

ಜನಪ್ರಿಯ ಸಿನಿಮಾ ತಾರೆ ಮೀರಾ ಜಾಸ್ಮಿನ್ ವಿರುದ್ಧ ಕೋಜಿಕೋಡ್ ಮುಖ್ಯ ಜುಡಿಷಿಯಲ್ ಮ್ಯಾಜಿಸ್ಟ್ರೇಟ್ ನ್ಯಾಯಾಲಯ ಸಮನ್ಸ್ ಜಾರಿ ಮಾಡಿದೆ. ಮೀರಾ ಜಾಸ್ಮಿನ್ ರು.5 ಲಕ್ಷ ಮುಂಗಡ ಹಣ ತೆಗೆದುಕೊಂಡು ಕಡೆಗೆ ಚಿತ್ರೀಕರಣಕ್ಕೆ ಬರಲಿಲ್ಲ ಎಂದು ಎಂದು ಆರೋಪಿಸಿ ಕೆ ಎ ದೇವರಾಜ್ ಎಂಬ ಮಲಯಾಳಂ ನಿರ್ಮಾಪಕ ಹಾಗೂ ನಿರ್ದೇಶಕ ಕೋರ್ಟ್ ಮೆಟ್ಟಿಲೇರಿದ್ದರು.

ಕೋಜಿಕೋಡ್ ನ್ಯಾಯಾಲಯ ಸಮನ್ಸ್ ಜಾರಿ ಮಾಡಿರುವ ಹಿನ್ನೆಲೆಯಲ್ಲಿ ಕಾರಣಾಂತರಗಳಿಂದ ತಾವು ಕೋರ್ಟ್‌ಗೆ ಹಾಜರಾಗಲು ಸಾಧ್ಯವಾಗುತ್ತಿಲ್ಲ. ಕೊಂಚ ವಿನಾಯಿತಿ ನೀಡಬೇಕು ಎಂದು ಮೀರಾ ಜಾಸ್ಮಿನ್ ಕೇರಳ ಹೈಕೋರ್ಟ್‌ಗೆ ಮೇಲ್ಮನವಿ ಸಲ್ಲಿಸಿದ್ದರು. ಆದರೆ ಕೇರಳ ಹೈಕೋರ್ಟ್ ಮೀರಾ ಅರ್ಜಿಯನ್ನು ತಿರಸ್ಕರಿಸಿ ಆಗಸ್ಟ್ 8ರಂದು ಕೋರ್ಟ್‌ಗೆ ಹಾಜರಾಗುವಂತೆ ಆದೇಶಿಸಿದೆ.

'ಸ್ವಪ್ನಮಲ್ಲಿಕ' ಎಂಬ ಚಿತ್ರಕ್ಕೆ ಮೀರಾ ಸಹಿಹಾಕಿದ್ದರು. ಈಗ ಮೀರಾ ಕೈಕೊಟ್ಟಿರುವ ಕಾರಣ ಚಿತ್ರ ನಿರ್ಮಾಪಕರು ಕತೆಯನ್ನು ಬದಲಾಯಿಸಿ ಮತ್ತೊಬ್ಬ ತಾರೆಯನ್ನು ಕರೆತರುವುದಾಗಿ ತಿಳಿಸಿದ್ದಾರೆ. ಇಜ್ಜೋಡು, ದೇವರು ಕೊಟ್ಟ ತಂಗಿ, ಅರಸು ಸೇರಿದಂತೆ ಮುಂತಾದ ಕನ್ನಡ ಚಿತ್ರಗಳಲ್ಲಿ ಮೀರಾ ಅಭಿನಯಿಸಿದ್ದಾರೆ. (ಏಜೆನ್ಸೀಸ್)