ಕ್ಯಾನ್ಸರ್ ಗೆದ್ದ 'ಗೂಳಿ' ಸಿನಿಮಾ ನಟಿಗೆ ಮತ್ತೊಂದು ಕಾಯಿಲೆ: ಸೂರ್ಯನ ಕಿರಣಗಳೇ ಮದ್ದು!

ಮಮತಾಗೆ ವಿಟಿಲಿಗೊ ಸಮಸ್ಯೆ

ಮಲಯಾಳಂ ನಟಿ ಮಮತಾ ಮೋಹನ್ ದಾಸ್ ಆಟೋ ಇಮ್ಯೂನ್ ಕಾಯಿಲೆಯ ವಿಟಲಿಗೋದಿಂದ ಬಳಲುತ್ತಿರುವ ಸಂಗತಿಯನ್ನು ಬಹಿರಂಗ ಪಡಿಸಿದ್ದಾರೆ. ಇದನ್ನು ತೊನ್ನು ರೋಗ ಎಂದು ಕೂಡ ಕರೆಯುತ್ತಾರೆ. ಕ್ಯಾನ್ಸರ್ ವಿರುದ್ಧ್ ಹೋರಾಡಿ ಗೆದ್ದಿದ್ದ ನಟಿ ಈಗ ಮತ್ತೊಂದು ಸಮಸ್ಯೆಯಿಂದ ಬಳಲುತ್ತಿರುವ ಸಂಗತಿ ಅಭಿಮಾನಿಗಳಿಗೆ ಆತಂಕ ತಂದಿದೆ. ವಿಟಿಲಿಗೊದಿಂದ ಬಳಲುವವರು ಚರ್ಮದ ಬಣ್ಣ ಕಳೆದುಕೊಳ್ಳುತ್ತಾರೆ. ಇದರಿಂದ ಮೆಲಟೋನಿನ್ ಸೃಷ್ಟಿಸುವ ಚರ್ಮದ ಕೋಶಗಳನ್ನು ಸಾಯುವಂತೆ ಅಥವಾ ಕೆಲಸವೇ ಮಾಡದಂತೆ ತಡೆಯುತ್ತದೆ. ಇದು ಮಾರಣಾಂತಕ ಅಲ್ಲದೇ ಇದ್ದರೂ ಚರ್ಮದ ಬಣ್ಣ ಬದಲಾಗಿ ಸಮಸ್ಯೆ ಎದುರಾಗುತ್ತದೆ.

ಮಮತಾ ಎಮೋಷನಲ್ ಪೋಸ್ಟ್

ಮಮತಾ ತಮಗಿರುವ ಚರ್ಮದ ಸಮಸ್ಯೆ ಬಗ್ಗೆ ಕಾವ್ಯಾತ್ಮಕವಾಗಿ ಬರೆದುಕೊಂಡಿದ್ದಾರೆ. "ಪ್ರೀತಿಯ ಸೂರ್ಯದೇವ. ಇಂದೆಂದಿಗಿಂತ ನಾನು ಈಗ ನಿನ್ನನ್ನು ಹೆಚ್ಚು ಅಪ್ಪಿಕೊಳ್ಳುತ್ತಿದ್ದೇನೆ. ನನ್ನ ಶರೀರದ ಬಣ್ಣ ಬದಲಾಗುತ್ತಿದೆ. ಅದಕ್ಕೆ ನೀನು ಬರುವುದಕ್ಕು ಮುನ್ನ ಎದ್ದು ನಿನ್ನ ಕಿರಣಗಳಿಗಾಗಿ ಕಾಯುತ್ತೇನೆ. ನಿನ್ನ ಶಕ್ತಿಯನ್ನು ನನಗೆ ಕೊಡು. ಜೀವನವಿಡಿ ನಿನಗೆ ಋಣಿಯಾಗಿ ಇರುತ್ತೇನೆ" ಎಂದು ಬರೆದುಕೊಂಡಿದ್ದಾರೆ. ಅದರ ಅರ್ಥ ಸೂರ್ಯನ ಬೆಳಗಿನ ಕಿರಣಗಳು ಮಮತಾಗೆ ಇರುವ ವಿಟಿಲಿಗೊ ಕಾಯಿಲೆಗೆ ರಾಮಬಾಣ ಎನ್ನುವುದು ಗೊತ್ತಾಗುತ್ತಿದೆ.

ಧೈರ್ಯ ತುಂಬಿದ ಅಭಿಮಾನಿಗಳು

ನಟಿ ಮಮತಾ ಮೋಹನ್ ದಾಸ್ ಪೋಸ್ಟ್ ಅಭಿಮಾನಿಗಳಿಗೆ ಬೇಸರ ತಂದಿದೆ. ಈಗಷ್ಟೇ ಕ್ಯಾನ್ಸರ್‌ನಿಂದ ಚೇತರಿಸಿಕೊಂಡ ನಟಿಗೆ ಇದೆಂಥಾ ಶಿಕ್ಷೆ ಎನ್ನುತ್ತಿದ್ದಾರೆ. ಕಾಮೆಂಟ್ ಬಾಕ್ಸ್‌ನಲ್ಲಿ ಅಭಿಮಾನಿಗಳು ಪ್ರತಿಕ್ರಿಯಿಸಿ ಶೀಘ್ರ ಚೇತರಿಸಿಕೊಳ್ಳುವಂತೆ ಪ್ರಾರ್ಥಿಸುತ್ತಿದ್ದಾರೆ. ನೀನು ಒಬ್ಬ ಫೈಟರ್, ಎಂದು ಧೈರ್ಯ ತುಂಬುತ್ತಿದ್ದಾರೆ. ಕ್ಯಾನ್ಸರ್‌ನ ಹಿಮ್ಮೆಟಿಸಿದಂತೆ ಇದರಿಂದಲೂ ಹೊರಬರುತ್ತೀಯಾ ಎನ್ನುತ್ತಿದ್ದಾರೆ. ಮಮತಾ ಕೊನೆಯದಾಗಿ ಮಲಯಾಳಂನ 'ಜನ ಗಣ ಮನ' ಚಿತ್ರದಲ್ಲಿ ನಟಿಸಿದ್ದರು.

'ಗೂಳಿ' ಚಿತ್ರದಲ್ಲಿ ನಟನೆ

ಮಾಲಿವುಡ್ ಬ್ಯೂಟಿ ಮಮತಾ ಮೋಹನ್ ದಾಸ್ ಹೆಚ್ಚು ಮಲಯಾಳಂ ಸಿನಿಮಾಗಳಲ್ಲಿ ಕೆಲಸ ಮಾಡಿದ್ದಾರೆ. ಇನ್ನುಳಿದಂತೆ ತೆಲುಗು, ತಮಿಳು, ಕನ್ನಡ ಸಿನಿಮಾಗಳಲ್ಲಿ ಬಣ್ಣ ಹಚ್ಚಿದ್ದಾರೆ. ಕನ್ನಡದ 'ಗೂಳಿ' ಚಿತ್ರದಲ್ಲಿ ಸುದೀಪ್ ಜೋಡಿಯಾಗಿ ಮಿಂಚಿದ್ದರು. ಗಾಯಕಿ ಆಗಿಯೂ ಗುರ್ತಿಸಿಕೊಂಡಿರುವ ಚೆಲುವೆ ಸಾಕಷ್ಟು ಹಾಡುಗಳನ್ನು ಹಾಡಿದ್ದಾರೆ.