ಬರುತ್ತಿದೆ ಪವನ್ ಒಡೆಯರ್, ಲೂಸ್ ಮಾದ ಜೋಡಿ

| Published: Wednesday, March 7, 2012, 15:04 [IST]

ಇದೀಗ ಕನ್ನಡದ ಹಾಟ್ ಫೇವರೆಟ್ ಗೀತೆ ಗೋವಿಂದಾಯ ನಮಃ ಚಿತ್ರದ 'ಪ್ಯಾರ್ಗೆ ಆಗ್ಬುಟ್ಟೈತೆ...'. ಈ ಚಿತ್ರ ಇದೇ ತಿಂಗಳು, ಮಾರ್ಚ್ 30, 2012 ರಂದು ರಾಜ್ಯಾದ್ಯಂತ ತೆರೆ ಕಾಣಲಿದೆ. ಅದೊಂದೇ ಹಾಡಿನ ಮೂಲಕ ಚಿತ್ರ ಹಿಟ್ ಆಗುವುದು ಗ್ಯಾರಂಟಿ ಎಂಬ ನಿರೀಕ್ಷೆ ಹುಟ್ಟಿಸಿರುವ ಈ ಚಿತ್ರದ ನಿರ್ದೇಶಕ ಪವನ್ ಒಡೆಯರ್. ಇದೀಗ ಸಹಜವಾಗಿ ಅವರ ಮುಂದಿನ ಚಿತ್ರದ ಬಗ್ಗೆ ಗಾಂಧಿನಗರ ಮಾತನಾಡಲು ಪ್ರಾರಂಭಿಸಿದೆ.

ಈಗಾಗಲೇ ಗೋವಿಂದಾಯ ನಮಃ ನಿರ್ದೇಶಕ ಪವನ್ ಹೊಸ ಚಿತ್ರದ ಸ್ಕ್ರಿಪ್ಟ್ ತಯಾರಿಯಲ್ಲಿದ್ದಾರೆ. ಸುದ್ದಿಮೂಲಗಳ ಪ್ರಕಾರ ಅವರ ಮುಂದಿನ ಚಿತ್ರಕ್ಕೂ ಹಣ ಹಾಕಲಿದ್ದಾರೆ ಗೋವಿಂದಾಯ ನಮಃ ಚಿತ್ರದ ನಿರ್ಮಾಪಕರಾದ ಸುರೇಶ್. ಪವನ್ ರ ಮುಂದಿನ ಚಿತ್ರದ ಹೀರೋ ಲೂಸ್ ಮಾದ ಯೋಗೇಶ್ ಎಂದೇ ಹೇಳಲಾಗುತ್ತಿದೆ. ಸದ್ಯಕ್ಕೆ ರಾಗಿಣಿ ನಾಯಕಿಯಾಗಿರುವ ಬಂಗಾರಿ ಚಿತ್ರಕ್ಕೆ ನಾಯಕರಾಗಿ ಚಿತ್ರಕರಣದಲ್ಲಿ ಬ್ಯುಸಿಯಾಗಿರುವ ಯೋಗಿ, ಏಪ್ರಿಲ್ ನಲ್ಲಿ ಈ ಚಿತ್ರಕ್ಕೆ ಕಾಲ್ ಶೀಟ್ ನೀಡಿದ್ದಾರೆ.

ಏಪ್ರಿಲ್ 15 ರಂದು ಈ ಚಿತ್ರಕ್ಕೆ ಮುಹೂರ್ತ ಎಂಬುದು ಬಹುತೇಕ ಖಚಿತವಾಗಿದೆ. ಆದರೆ ಲೂಸ್ ಮಾದ ಯೋಗೇಶ್ ಹಾಗೂ ಪವನ್ ಸಂಗಮದ ಚಿತ್ರವನ್ನು ಸುರೇಶ್ ನಿರ್ಮಿಸುತ್ತಿದ್ದಾರೋ ಅಥವಾ ಅದು ಪವನ್ ನಿರ್ದೇಶನದ ಬೇರೆ ಚಿತ್ರವೋ ಎಂಬುದು ಸದ್ಯಕ್ಕೆ ಗೊಂದಲದ ವಿಚಾರವಾಗಿದೆ. ಕಾರಣ, ಮಾಹಿತಿಯ ಪ್ರಕಾರ ಯೋಗೇಶ್-ಪವನ್ ಚಿತ್ರಕ್ಕೆ ನಿರ್ಮಾಪಕರು ಬೇರೆ ಎನ್ನಲಾಗುತ್ತಿದೆ. ಯಾವುದಕ್ಕೂ ಪವನ್ ಹಾಗೂ ಯೋಗೇಶ್ ಮ್ಯಾಜಿಕ್ ನೋಡುವುದಕ್ಕೆ ಸಿದ್ಧರಾಗಿ... (ಒನ್ ಇಂಡಿಯಾ ಕನ್ನಡ)