ಚಿತ್ರರಂಗಕ್ಕೆ ಡ್ರಗ್ಸ್ ನಂಟನ್ನು ಕಳಂಕ ಎಂದು ಭಾವಿಸಲಾಗದು: ನಟಿ ನಿವೇದಿತಾ

ಉದ್ಯಮಕ್ಕೆ ಕಳಂಕ ಎಂದುಕೊಳ್ಳುವುದಿಲ್ಲ: ನಿವೇದಿತಾ

ಒಂದೊಮ್ಮೆ ಉದ್ಯಮದ ಕೆಲವರು ಮಾದಕ ವ್ಯಸನಿಗಳಾಗಿದ್ದರೂ ಸಹ ಅದನ್ನು ನಾನು ನಮ್ಮ ಉದ್ಯಮಕ್ಕೆ ಕಳಂಕ ಎಂದುಕೊಳ್ಳುವುದಿಲ್ಲ. ಪರಿವಾರದಲ್ಲಿ ತಪ್ಪು ದಾರಿ ಹಿಡಿದವನಿಗೆ ಶಿಕ್ಷೆ ಆಗಬೇಕು, ಆತ ತಪ್ಪು ತಿದ್ದಿಕೊಳ್ಳಲು ಅವಕಾಶ ಸಿಗಬೇಕು. ಹಾಗಾಗಿ ನಾನಿದನ್ನು ಕಳಂಕ ಎಂದುಕೊಳ್ಳುವುದಿಲ್ಲ ಎಂದರು ನಿವೇದಿತಾ.

ಇಡೀಯ ಚಿತ್ರರಂಗವನ್ನೇ ದೂರುವುದು ಸೂಕ್ತವಲ್ಲ: ನಿವೇದಿತಾ

ಚಿತ್ರವೊಂದರ ಸೆಟ್‌ನಲ್ಲಿ ಹತ್ತು-ಹದಿನೈದು ನಟ-ನಟಿಯರಿದ್ದರೆ ನೂರಾರು ಮಂದಿ ಇತರರು ಇರುತ್ತಾರೆ. ಆದರೂ ಸಹ ನಟ-ನಟಿಯರನ್ನೇ 'ಚಿತ್ರರಂಗ' ಎಂದು ಬ್ರ್ಯಾಂಡ್ ಮಾಡಲಾಗಿದೆ. ಅಸಲಿಗೆ ಸಿನಿಮಾಕ್ಕೆ ದುಡಿಯುವ ಎಲ್ಲರೂ ಸೇರಿಯೇ ಚಿತ್ರೋದ್ಯಮ ಎಂಬುದಾಗಿದೆ. ಹೀಗಿರುವಾಗ ಯಾರೋ ಕೆಲವರು ಮಾಡಿರಬಹುದಾದ ತಪ್ಪಿಗೆ ಇಡೀಯ ಚಿತ್ರೋದ್ಯಮವನ್ನೇ ದೋಷಿ ಸ್ಥಾನದಲ್ಲಿ ನಿಲ್ಲಿಸುವುದು ಸೂಕ್ತವಲ್ಲ ಎಂದರು ನಟಿ ನಿವೇದಿತಾ.

ಮಾದಕ ವ್ಯಸನ ಎಲ್ಲಾ ಕ್ಷೇತ್ರಗಳಲ್ಲೂ ಇದೆ: ನಿವೇದಿತಾ

ಸ್ಯಾಂಡಲ್‌ವುಡ್‌ನ ಕೆಲವರಿಗೆ ಚಟವಿರುವ ಸಾಧ್ಯತೆ ಇದೆ. ಆದರೆ ಆ ಚಟವಂತ ಕೆಲವರು ಇಡೀಯ ಸಿನಿಮಾ ಉದ್ಯಮವನ್ನು ಪ್ರತಿನಿಧಿಸುವುದಿಲ್ಲ. ಮಾದಕ ವ್ಯಸನಿಗಳು ಎಲ್ಲಾ ಕ್ಷೇತ್ರದಲ್ಲಿಯೂ ಇದ್ದಾರೆ. ಆದರೆ ಪ್ರಸ್ತುತ ಸಿನಿಮಾ ಉದ್ಯಮದ ಕಡೆಗೆ ಅದರಲ್ಲಿಯೂ ನಟ-ನಟಿಯರ ಕಡೆಗೆ ಮಾತ್ರವೇ 'ಫೋಕಸ್ ಶಿಫ್ಟ್' ಆಗಿದೆ ಎಂದರು ನಿವೇದಿತಾ.

ನಟ-ನಟಿಯರು ಡ್ರಗ್ಸ್ ನನ್ನ ಗಮನಕ್ಕೆ ಬಂದಿಲ್ಲ: ನಿವೇದಿತಾ

ನಟ-ನಟಿಯರು ಡ್ರಗ್ಸ್ ತೆಗೆದುಕೊಳ್ಳುವುದು ವೈಯಕ್ತಿಕವಾಗಿ ನನ್ನ ಗಮನಕ್ಕೆ ಬಂದಿಲ್ಲ. ನಾನು ಹೆಚ್ಚಿಗೆ ಯಾವ ಪಾರ್ಟಿಗಳಿಗೆ ಹೋಗುವುದಿಲ್ಲ. ಆರಂಭದಲ್ಲಿ ಕೆಲವು ಪೇಜ್‌ 3 ಪಾರ್ಟಿಗಳಿಗೆ ಹೋಗಿದ್ದಿದೆ. ಅಲ್ಲಿ ಸಿನಿಮಾದವರು ಮಾತ್ರವೇ ಇರುವುದಿಲ್ಲ, ಪೊಲೀಸರು, ರಾಜಕಾರಣಿಗಳು ಎಲ್ಲ ಕ್ಷೇತ್ರದವರೂ ಇರುತ್ತಾರೆ. ನನ್ನ ಪರಿಚಯದವರು ಮಾದಕ ವ್ಯಸನಿಗಳಾಗಿರುವುದು ನನ್ನ ಗಮನಕ್ಕೆ ಬಂದಿಲ್ಲ ಎಂದರು ನಿವೇದಿತಾ.