ಕರ್ನಾಟಕದಲ್ಲಿ 'ಕಾಲಾ' ರಿಲೀಸ್ ಆಗಿಲ್ಲ ಅಂದ್ರೆ ಎಷ್ಟು ಕೋಟಿ ನಷ್ಟವಾಗುತ್ತೆ.?

140 ಕೋಟಿ ಬಜೆಟ್ ಸಿನಿಮಾ

ರಜನಿಕಾಂತ್ ಅಳಿಯ ಧನುಶ್ ನಿರ್ಮಾಣ ಸಂಸ್ಥೆ ತಯಾರು ಮಾಡಿರುವ 'ಕಾಲಾ' ಚಿತ್ರಕ್ಕೆ ಬರೋಬ್ಬರಿ 140 ಕೋಟಿ ಬಂಡವಾಳ ಹಾಕಲಾಗಿದೆ. ಆದ್ರೆ, ಕರ್ನಾಟಕದಲ್ಲಿ ಬಿಡುಗಡೆಯಾಗಿಲ್ಲ ಅಂದ್ರೆ ದೊಡ್ಡ ಮೊತ್ತದ ನಷ್ಟ ಅನುಭವಿಸವುದು ಖಚಿತ. ಯಾಕಂದ್ರೆ, ರಜನಿಕಾಂತ್ ದಕ್ಷಿಣ ಭಾರತದ ಬಹುಬೇಡಿಕೆಯ ನಟ. ಅದರಲ್ಲೂ ಕರ್ನಾಟಕದಲ್ಲಿ ರಜನಿ ಸಿನಿಮಾಗಳಿಗೆ ದೊಡ್ಡ ಮಟ್ಟದ ಒಪನಿಂಗ್ ಸಿಗುತ್ತೆ.

ನಿರ್ಮಾಪಕರಿಗೆ ಎಷ್ಟು ಕೋಟಿ ನಷ್ಟವಾಗುತ್ತೆ.?

ಹಿರಿಯ ನಿರ್ಮಾಪಕರ ಲೆಕ್ಕಾಚಾರದ ಪ್ರಕಾರ 'ಕಾಲಾ' ಸಿನಿಮಾ ಕರ್ನಾಟಕದಲ್ಲಿ ಬಿಡುಗಡೆಯಾಗಿಲ್ಲ ಅಂದ್ರೆ ಸುಮಾರು 7 ಕೋಟಿ (ನೆಟ್ ಕಲೆಕ್ಷನ್) ನಷ್ಟವಾಗುತ್ತೆ. ಒಟ್ಟಾರೆ 25 ಕೋಟಿವರೆಗೂ ಕಳೆದುಕೊಳ್ಳುವ ಆತಂಕವಿದೆ.

ತಮಿಳು ಚಿತ್ರಕ್ಕೆ ಹೊರರಾಜ್ಯದಲ್ಲೇ ಲಾಭ ಹೆಚ್ಚು

ಮೂಲಗಳ ಪ್ರಕಾರ ತಮಿಳು ಚಿತ್ರಗಳಿಗೆ ಹೊರರಾಜ್ಯಗಳಿಂದಲೇ ಹೆಚ್ಚು ಲಾಭ ಸಿಗುತ್ತೆ. ಶೇಕಡಾ 25 ರಿಂದ 30ರಷ್ಟು ಆದಾಯ ನೆರೆರಾಜ್ಯಗಳಿಂದಲೇ ಬರುತ್ತೆ. ಅದರಲ್ಲೂ ಬೆಂಗಳೂರಿನಂತಹ ನಗರದಿಂದಲೇ ಹೆಚ್ಚು ಹಣ ಗಳಿಸಿಬಹುದು. ಒಂದು ವೇಳೆ ಇಲ್ಲಿ ಬಿಡಗಡೆಯಾಗಲ್ಲ ಅಂದ್ರೆ, ನಿರ್ಮಾಪಕರಿಗೆ ದೊಡ್ಡ ಮಟ್ಟದ ಹಣ ನಷ್ಟ ಆಗೋದು ಪಕ್ಕಾ.

ಹೈಕೋರ್ಟ್ ಮೊರೆ ಹೋದ ಕಾಲಾ

ಸದ್ಯದ ಮಾಹಿತಿ ಪ್ರಕಾರ 'ಕಾಲಾ' ಚಿತ್ರದ ನಿರ್ಮಾಪಕರು ಕರ್ನಾಟಕ ಹೈಕೋರ್ಟ್ ಮೊರೆ ಹೋಗಿದ್ದಾರೆ ಎನ್ನಲಾಗಿದೆ. 'ಕಾಲಾ' ಸಿನಿಮಾವನ್ನ ಬಿಡುಗಡೆ ಮಾಡಲು ಅವಕಾಶ ಮಾಡಿಕೊಡಬೇಕು ಮತ್ತು ಚಿತ್ರಮಂದಿರಗಳಿಗೆ ರಕ್ಷಣೆ ನೀಡಬೇಕು ಎಂದು ಮನವಿ ಮಾಡಿದ್ದಾರಂತೆ. ನಿಷೇಧದಿಂದ ಆಗುವ ನಷ್ಟದ ಬಗ್ಗೆ ಕೋರ್ಟ್ ಗೆ ಮನವರಿಕೆ ಮಾಡುವ ಪ್ರಯತ್ನ ಮಾಡಿದ್ದಾರೆ.

ರಾಜ್ಯ ಸರ್ಕಾರ ನಿಷೇಧ ಮಾಡಿಲ್ಲ

ಕರ್ನಾಟಕದಲ್ಲಿ 'ಕಾಲಾ' ಸಿನಿಮಾವನ್ನ ಕರ್ನಾಟಕ ಸರ್ಕಾರ ನಿಷೇಧ ಮಾಡಿಲ್ಲ. ಕನ್ನಡ ಪರ ಸಂಘಟನೆಗಳು ಮಾತ್ರ ವಿರೋಧ ಸೂಚಿಸಿದೆ. ಇನ್ನೊಂದು ಮಾಹಿತಿಯ ಪ್ರಕಾರ ಕರ್ನಾಟಕದ ವಿತರಕರು ಮತ್ತು ಪ್ರದರ್ಶಕರು ಸಿನಿಮಾ ತೆಗೆದುಕೊಳ್ಳುವಲ್ಲಿ ಹಿಂದೆ ಸರಿದಿದ್ದಾರೆ ಎನ್ನಲಾಗಿದೆ.

ಬಾಕ್ಸ್ ಆಫೀಸ್ ಧೂಳೆಬ್ಬಿಸಿದ್ದ 'ಕಬಾಲಿ'

ಈ ಹಿಂದೆ ತೆರೆಕಂಡಿದ್ದ ರಜನಿಕಾಂತ್ ಸಿನಿಮಾ 'ಕಬಾಲಿ', ಕರ್ನಾಟಕದಲ್ಲಿ ಸುಮಾರು 240ಕ್ಕೂ ಅಧಿಕ ಸ್ಕ್ರೀನ್ ಗಳಲ್ಲಿ ಬಿಡುಗಡೆಯಾಗಿತ್ತು. ಮೊದಲ ದಿನ ದಾಖಲೆ ಮೊತ್ತದಲ್ಲಿ ಕಲೆಕ್ಷನ್ ಮಾಡಿತ್ತು. ಹೀಗಾಗಿ, 'ಕಾಲಾ' ಚಿತ್ರದ ಮೇಲೂ ನಿರೀಕ್ಷೆ ಹೆಚ್ಚಿದೆ.