ಕನ್ನಡ ಚಿತ್ರರಂಗದ ಹೊಸ ದಾರಿ 'ಪರಾರಿ': ಚೈತನ್ಯ

ನೈಜ ಕಥೆಯಿಂದ ಕಾಮಿಡಿಗೆ ಹೊರಳಿದ್ದೀರಿ ಏನು ವಿಶೇಷ?

ಇದು ನನಗೇನು ಹೊಸದಲ್ಲ. ಈ ಹಿಂದೆ ಸಾಕಷ್ಟು ಕಾಮಿಡಿ ನಾಟಕಗಳನ್ನು ನಿರ್ದೇಶಿಸಿ ಗೆದ್ದಿದ್ದೇನೆ. ಒಂದೇ ಪ್ರಕಾರಕ್ಕೆ ಸೀಮಿತವಾವುದು ನನಗಿಷ್ಟವಿಲ್ಲ. ಎಲ್ಲ ಬಗೆಯ ಚಿತ್ರಗಳನ್ನು ಮಾಡಬೇಕೆಂಬುದು ನನ್ನ ಆಸೆ. ಈ ರೀತಿಯ ವಿವಿಧ ಪ್ರಕಾರದ ಚಿತ್ರಗಳನ್ನು ಮಾಡಿದ್ದಕ್ಕೆ ಕಮಲ್ ಹಾಸನ್ ಗೆದ್ದಿದ್ದು. ಗೋವಿಂದಾಯ ನಮಃ ಮತ್ತು ರ್‍ಯಾಂಬೋ ಚಿತ್ರಗಳ ಯಶಸ್ಸಿನಿಂದ ತಾವು ಕಾಮಿಡಿ ಚಿತ್ರ ಮಾಡಲು ಹೋಗಿಲ್ಲ.

ಬೇರೆ ಕಾಮಿಡಿ ಚಿತ್ರಗಳಿಗೆ ಹೋಲಿಸಿದರೆ ಪರಾರಿ ಚಿತ್ರ ಹೇಗೆ ಭಿನ್ನ?

ನಮ್ಮ ಚಿತ್ರೋದ್ಯಮದಲ್ಲಿ ಒಂದು ಬಲವಾದ ನಂಬಿಕೆ ಇದೆ. ಅತಿಯಾದ ಹಿಂಸೆ ಇಲ್ಲದೆ ಆಕ್ಷನ್ ಚಿತ್ರಗಳನ್ನು ಮಾಡಲು ಸಾಧ್ಯವಿಲ್ಲ ಎಂಬುದು. ಆದರೆ ಆ ದಿನಗಳು ಚಿತ್ರ ಅವರ ನಂಬಿಕೆಯನ್ನು ಹುಸಿಗೊಳಿಸಿತು. ಅದೇ ರೀತಿ ಕಾಮಿಡಿ ಚಿತ್ರಗಳ ಯಶಸ್ಸು ಡೈಲಾಗ್ ಗಳ ಮೇಲೆ ನಿಂತಿದೆ ಎಂಬುದು ಇನ್ನೊಂದು ನಂಬಿಕೆ.

ಈ ನಂಬಿಕೆಯನ್ನೂ ಪರಾರಿ ಚಿತ್ರ ಬುಡಮೇಲು ಮಾಡಲಿದೆ. ಕನ್ನಡ ಚಿತ್ರರಂಗದಲ್ಲಿ ಹೊಸ ಟ್ರೆಂಡ್ ಸೃಷ್ಟಿಸಲಿದೆ. 2007ರಿಂದ ಈ ಸಬ್ಜೆಕ್ಟ್ ನನ್ನ ಮನಸ್ಸಿನಲ್ಲಿತ್ತು. ಈಗ ಅದು ತೆರೆಯ ಮೇಲೆ ಬರುತ್ತಿದೆ. ಗೆಳೆಯನೊಬ್ಬ ಹೇಳಿದ ಕಥೆಯನ್ನು ತೆರೆಗೆ ತರುತ್ತಿದ್ದೇನೆ. ಇದಕ್ಕಾಗಿ ಹಾಸ್ಯ ನಟ, ನಿರ್ದೇಶಕ ಹಾಗೂ ನನ್ನ ಗೆಳೆಯನೂ ಆಗಿರುವ ಮೋಹನ್ ಅವರೊಂದಿಗೂ ಮಾತನಾಡಿ ಚರ್ಚಿಸಿದ್ದೇನೆ. ಕಥೆ, ಚಿತ್ರಕಥೆ ಬರೆದುಕೊಡಲು ಹೇಳಿದ್ದೆ. ನಾವಿಬ್ಬರೂ ಕಾಲೇಜು ದಿನಗಳಿಂದಲೂ ಅಂತರ ಕಾಲೇಜು ಸ್ಪರ್ಧೆಗಳಲ್ಲಿ ಭಾಗವಹಿಸುತ್ತಿದ್ದೆವು.

ಚಿತ್ರದ ತಾರಾಗಣದ ಬಗ್ಗೆ ಏನು ಹೇಳುತ್ತೀರಿ?

ಚಿತ್ರಕಥೆಗೆ ಪೂರಕವಾಗುವಂತಹ ನಟರನ್ನೇ ಆಯ್ಕೆ ಮಾಡಿಕೊಂಡಿದ್ದೇನೆ. ಚಿತ್ರದಲ್ಲಿನ ಅವರ ಪಾತ್ರಕ್ಕೆ ಪ್ರತಿಯೊಬ್ಬರು ಒಪ್ಪುವಂತಿದ್ದಾರೆ. ಬುಲೆಟ್ ಪ್ರಕಾಶ್ ಅವರನ್ನು ಹೊರತುಪಡಿಸಿದರೆ ಉಳಿದ ಕಲಾವಿದರೆಲ್ಲರೂ ಚಿಕ್ಕ ವಯೋಮಾನದವರು. ಆದರೆ ಚಿತ್ರದಲ್ಲಿ ಪ್ರಕಾಶ್ ಅವರು ಎಲ್ಲೂ ವಯಸ್ಸಾದಂತೆ ಕಾಣಿಸುವುದಿಲ್ಲ.

ನಟನಾಗಿ ಬುಲೆಟ್ ಪ್ರಕಾಶ್ ಅವರನ್ನು ಇಷ್ಟಪಡುವವರಲ್ಲಿ ನಾನೂ ಒಬ್ಬ. ಅವರ ಬಾಡಿ ಲಾಂಗ್ವೇಜ್, ಅವರ ಮುಖ ಭಾವ ತುಂಬಾ ಚೆನ್ನಾಗಿ ಮೂಡಿಬಂದಿದೆ. ಇನ್ನು ಶುಭಾ ಪೂಂಜಾ ಅವರ 'ಸ್ಲಂ ಬಾಲ' ಚಿತ್ರವನ್ನು ನೋಡಿ ಇಂಪ್ರೆಸ್ ಆದೆ. ಜಾಹ್ನವಿ ಕಾಮತ್ ಅವರು ತಮ್ಮ ಟೆಲಿ ಸೀರಿಯಲ್ 'ಮುಗಿಲು'ನಲ್ಲಿ ಅಭಿನಯಿಸಿದ್ದಾರೆ. ಶ್ರವಂತ್ ರಾವ್ ಹೊಸಬರು. ಅವರನ್ನು ಆಡಿಷನ್ ಮೂಲಕ ಆಯ್ಕೆ ಮಾಡಿಕೊಂಡೆವು.

ಪರಾರಿ ಚಿತ್ರ ಹೊರ ರಾಜ್ಯಗಳಲ್ಲೂ ಬಿಡುಗಡೆಯಾಗುತ್ತಿದೆಯೆ?

ಹೌದು. ಹೊರ ರಾಜ್ಯಗಳಲ್ಲಷ್ಟೇ ಅಲ್ಲ. ಹೊರ ದೇಶಗಳಲ್ಲೂ ಬಿಡುಗಡೆ ಮಾಡಬೇಕೆಂದಿದ್ದೇವೆ. ಆ ದಿನಗಳು ಚಿತ್ರ ಮುಂಬೈ ಮತ್ತು ದೆಹಲಿಯಲ್ಲಿ ಬಿಡುಗಡೆಯಾಗಿತ್ತು.

ಕನ್ನಡ ಚಿತ್ರರಂಗ ಮತ್ತೆ ಮೂಲ ರೂಪಕ್ಕೆ ಬರುತ್ತಿದೆ ಅನ್ನಿಸುತ್ತಿದೆಯೇ?

ಹೊಸ ಹೊಸ ಪ್ರತಿಭೆಗಳು ಬರುತ್ತಿದ್ದಾರೆ. ಹೊಸ ಹೊಸ ಪ್ರಯೋಗಳನ್ನು ಮಾಡುತ್ತಿದ್ದಾರೆ. ನಿಜಕ್ಕೂ ಒಳ್ಳೆಯ ಬೆಳವಣಿಗೆ. ದೊಡ್ಡ ಸ್ಟಾರ್ ಗಳಿಲ್ಲದ ಚಿತ್ರಗಳು ಗೆಲುವು ಸಾಧಿಸುತ್ತಿವೆ. ಸಿಂಪಲ್ಲಾಗ್ ಒಂದ್ ಲವ್ ಸ್ಟೋರಿ, ಚಾರ್ ಮಿನಾರ್, ಮೈನಾ ಚಿತ್ರಗಳೇ ಇದಕ್ಕೆ ಉದಾಹರಣೆ. ಹೊಸಬಗೆಯ ತಂತ್ರಜ್ಞರು ಹಾಗೂ ನಿರ್ದೇಶಕರ ಪ್ರಯತ್ನದಿಂದಲೇ ಚಿತ್ರಗಳ ಗೆಲುವು ಸಾಧ್ಯವಾಗಿದೆ. ಹೊಸ ಹೊಸ ಆಲೋಚನೆಗಳಿಂದ ಬರುವಂತಹ ನಿರ್ದೇಶಕರೇ ಹೆಚ್ಚು ಗೆಲ್ಲುತ್ತಿದ್ದಾರೆ.

ಸ್ಟಾರ್ ನಟರೆಲ್ಲಾ ರೀಮೇಕ್ ಚಿತ್ರಗಳ ಕಡೆಗೆ ಹೊರಳುತ್ತಿರುವುದು ಬೇಸರದ ಸಂಗತಿ. ಹೊಸತನ್ನು ಮಾಡಲು ಸಾಧ್ಯವಾಗದವರಿಗೆ ಸುಲಭವಾಗಿ ಕಾಣುತ್ತಿರುವ ಮಾರ್ಗ ರೀಮೇಕ್ ಚಿತ್ರಗಳು. ಹೊಸತನದಿಂದ ಕೂಡಿದ ಚಿತ್ರಗಳನ್ನು ಕೊಟ್ಟಿದ್ದಕ್ಕೆ ಪುಟ್ಟಣ್ಣ ಕಣಗಾಲ್ ಅವರಂತಹ ನಿರ್ದೇಶಕರು ಟ್ರೆಂಡ್ ಸೆಟ್ ನಿರ್ದೇಶಕರಾದರು.