ದೀಪಾವಳಿ ಹಬ್ಬಕ್ಕೆ 'ಹೆಡ್ ಬುಷ್' Vs 'ಕಾಂತಾರ': ಬಾಕ್ಸಾಫೀಸ್‌ ಕಥೆಯೇನು?

ಬೆಳಕಿನ ಹಬ್ಬಕ್ಕೆ 'ಹೆಡ್ ಬುಷ್'

ಡಾಲಿ ಧನಂಜಯ್ ಸಿನಿಮಾ 'ಹೆಡ್ ಬುಷ್' ಅಕ್ಟೋಬರ್ 21ಕ್ಕೆ ರಿಲೀಸ್ ಆಗುತ್ತಿದೆ. ಇತ್ತೀಚೆಗೆಷ್ಟೇ ದಾವಣಗೆರೆಯಲ್ಲಿ 'ಹೆಡ್ ಬುಷ್' ಸಿನಿಮಾದ ಟ್ರೈಲರ್ ಲಾಂಚ್ ಮಾಡಲಾಗಿದೆ. ಈ ವೇಳೆ ಬಹುತೇಕ ಚಿತ್ರರಂಗದ ದಿಗ್ಗಜರೆಲ್ಲ ಒಟ್ಟಿಗೆ ಸೇರಿದ್ದಾರೆ. ಹೊಂಬಾಳೆಯ ಅಂಗ ಸಂಸ್ಥೆ ಕೆಆರ್‌ಜಿ ಸ್ಟುಡಿಯೋ ಈ ಸಿನಿಮಾವನ್ನು ವಿತರಣೆ ಮಾಡುತ್ತಿದೆ. ಜೊತೆಗೆ ಪ್ರಮೋಷನ್ ಕೂಡ ಮಾಡುತ್ತಿದೆ. ಹೀಗಾಗಿ 'ಹೆಡ್ ಬುಷ್' ಬಾಕ್ಸಾಫೀಸ್‌ನಲ್ಲಿ ಬೇಜಾನ್ ಸೌಂಡ್ ಮಾಡುತ್ತೆ ಅನ್ನೋ ನಿರೀಕ್ಷೆಯಿದೆ. ಜಯರಾಜ್ ಅವತಾರದಲ್ಲಿ ಬರೋ ಡಾಲಿ ದೀಪಾವಳಿ ಹಬ್ಬದಲ್ಲಿ ಬಾಕ್ಸಾಫೀಸ್‌ ದೋಚೋದು ಗ್ಯಾರಂಟಿ ಅನ್ನೋ ಹಲವರ ಲೆಕ್ಕಾಚಾರ.

'ಹೆಡ್‌ ಬುಷ್‌'ಗೆ 'ಕಾಂತಾರ' ಸವಾಲು

ಕಳೆದ 18 ದಿನಗಳಿಂದ 'ಕಾಂತಾರ' ಸಿನಿಮಾ ಅಬ್ಬರ ತಗ್ಗಿಲ್ಲ. ಪ್ರತಿದಿನ 'ಕಾಂತಾರ' ಸಿನಿಮಾ ನೋಡವವರ ಸಂಖ್ಯೆ ಹೆಚ್ಚಾಗುತ್ತಲೇ ಇದೆ. ಈ ಕಾರಣಕ್ಕೆ ಡಾಲಿ ಧನಂಜಯ್ 'ಹೆಡ್ ಬುಷ್' ಸಿನಿಮಾವನ್ನು ನಿರಂತರವಾಗಿ ಪ್ರಚಾರ ಮಾಡುತ್ತಲೇ ಇದ್ದರು. 'ಕಾಂತಾರ' ಅಬ್ಬರದ ನಡುವೆನೇ ತಮ್ಮ ಸಿನಿಮಾ ಬಗ್ಗೆನೂ ಗಮನ ಸೆಳೆಯುವುದಕ್ಕೆ ಬೇಕಾಗಿರೋ ಎಲ್ಲಾ ಪ್ರಯತ್ನಗಳನ್ನೂ ಮಾಡಿದ್ದರು. ಆದರೂ, ದೀಪಾವಳಿ ರಜೆಯಲ್ಲಿ ಜನರು 'ಕಾಂತಾರ' ಕಡೆ ಮುಖ ಮಾಡುತ್ತಾರಾ? ಇಲ್ಲಾ ಹೊಸ ಸಿನಿಮಾ 'ಹೆಡ್ ಬುಷ್' ನೋಡುತ್ತಾರಾ? ಅನ್ನೋದೇ ದೊಡ್ಡ ಪ್ರಶ್ನೆಯಾಗಿದೆ.

ಈ ಪೈಪೋಟಿ ಇದೇ ಮೊದಲು

ಎರಡು ಸಿನಿಮಾಗಳು ಒಂದೇ ದಿನ ರಿಲೀಸ್ ಆದ ಉದಾಹರಣೆಗಳು ಇವೆ. ಆ ಎರಡು ಸಿನಿಮಾಗಳು ಪೈಪೋಟಿಗೆ ಬಿದ್ದಿದ್ದೂ ಇದೆ. ಆದರೆ, ಈಗಾಗಲೇ ಬಿಡುಗಡೆಯಾಗಿರುವ ಸಿನಿಮಾ ವಿರುದ್ಧ 'ಹೆಡ್ ಬುಷ್' ಕಾಂಪಿಟೇಷನ್‌ಗೆ ಬೀಳಬೇಕಿದೆ. ಎಲ್ಲಕ್ಕಿಂತ ಹೆಚ್ಚಾಗಿ ಹೊಂಬಾಳೆ ಹಾಗೂ ಕೆಆರ್‌ಜಿ ಸ್ಟುಡಿಯೋ ಈ ಎರಡೂ ಸಿನಿಮಾಗಳನ್ನು ರಿಲೀಸ್ ಮಾಡಿದ್ದು, ತಮ್ಮದೇ ಸಂಸ್ಥೆಯ ಎರಡು ಸಿನಿಮಾಗಳನ್ನು ಪೈಪೋಟಿಗೆ ಇಳಿಸಿದ್ದಾರೆ. ಹೀಗಾಗಿ ರಿಸಲ್ಟ್‌ಗಾಗಿ ಜನರು ಕಾಯುತ್ತಿದ್ದಾರೆ.

'ಹೆಡ್ ಬುಷ್'ಗೆ ಅನುಕೂಲ ಆಗೋದೇನು?

'ಹೆಡ್ ಬುಷ್' ಬಿಡುಗಡೆಯಾಗುವ ವೇಳೆ 'ಕಾಂತಾರ' ಕರ್ನಾಟಕದಲ್ಲಿ ರಿಲೀಸ್ ಆಗಿ ಮೂರು ವಾರಗಳಾಗುತ್ತೆ. ಅಷ್ಟೊತ್ತಿಗೆ 'ಕಾಂತಾರ' ಅಬ್ಬರ ಸ್ವಲ್ಪ ಮಟ್ಟಿಗೆ ತಗ್ಗಬಹುದು ಎಂದು ಅಂದಾಜಿಸಲಾಗಿದೆ. ಅಲ್ಲದೆ, ಈಗಾಗಲೇ 'ಕಾಂತಾರ' ಸಿನಿಮಾ ನೋಡಿರುವವರು 'ಹೆಡ್ ಬುಷ್' ಸಿನಿಮಾ ನೋಡುವ ಅವಕಾಶವಿದೆ. ಅಲ್ಲದೆ ಕೆಆರ್‌ಜಿ ಸ್ಟುಡಿಯೋ ವಿತರಣೆ ಮಾಡುತ್ತಿರುವುದರಿಂದ ಗ್ರ್ಯಾಂಡ್ ಆಗಿಯೇ ರಿಲೀಸ್ ಮಾಡುತ್ತೆ. ಹೀಗಾಗಿ ಬಾಕ್ಸಾಫೀಸ್‌ನಲ್ಲಿ ಜೋರಾಗಿಯೇ ಸದ್ದು ಮಾಡಬಹುದು ಅನ್ನೋ ನಿರೀಕ್ಷೆಯಿದೆ.