'ಬಿಗ್ ಬಾಸ್' ರಿಯಾಲಿಟಿ ಶೋ ಗೆದ್ದ ಮೇಘ ಧಾಡೆ

ಭಾರತದ ಅತಿ ದೊಡ್ಡ ರಿಯಾಲಿಟಿ ಶೋಗಳಲ್ಲಿ ಒಂದಾಗಿರುವ ಬಿಗ್ ಬಾಸ್ ಹಲವು ಭಾಷೆಗಳಲ್ಲಿ ಮೂಡಿ ಬರ್ತಿದೆ. ತೆಲುಗು, ತಮಿಳು ಹಾಗೂ ಮಲಯಾಂ ಭಾಷೆಯ ಬಿಗ್ ಬಾಸ್ ನಡೆಯುತ್ತಿದ್ದು, ಮರಾಠಿ ಬಿಗ್ ಬಾಸ್ ಮುಗಿದಿದೆ.

ಮರಾಠಿ ಬಿಗ್ ಬಾಸ್ ಗ್ರ್ಯಾಂಡ್ ಫಿನಾಲೆ ಭಾನುವಾರ ಅದ್ಧೂರಿಯಾಗಿ ನೆರವೇರಿದ್ದು, ಪುಷ್ಕರ್ ಜೋಗ್ ಅವರನ್ನ ಹಿಂದಿಕ್ಕಿ ಮೇಘ ಧಾಡೆ ಫೈನಲ್ ಟ್ರೋಫಿಗೆ ಮುತ್ತಿಟ್ಟಿದ್ದಾರೆ.

ಮರಾಠಿಯ ಚೊಚ್ಚಲ ಬಿಗ್ ಬಾಸ್ ಶೋ ಇದಾಗಿದ್ದು, ಮೊದಲ ಆವೃತ್ತಿ ಗೆದ್ದ ಮೇಘಾ ಅವರಿಗೆ 18.60 ಲಕ್ಷ ಬಹುಮಾನ ನೀಡಲಾಗಿದೆ.

ಕೊನೆಯ ಅಂತಿಮ ಘಟ್ಟದಲ್ಲಿ ಮೇಘಾ, ಪುಷ್ಕರ್ ಜೋಗ್, ಶರ್ಮೀಷ್ಠಾ ರಾವತ್, ಆಸ್ಟಡ್ ಕಲೆ, ಸಾಯಿ ಲೋಕುರ್ ಹಾಗೂ ಸ್ಮಿತಾ ಗುಂಡ್ಕರ್ ಇದ್ದರು. ಮೇಘಾ ಧಾಡೆ ಅವರ ಪರವಾಗಿ ಅತಿ ಹೆಚ್ಚು ಮತಗಳು ಸಿಕ್ಕಿದ್ದು ಜಯಮಾಲೆ ಒಲಿಸಿಕೊಂಡಿದ್ದಾರೆ.

ಇನ್ನುಳಿದಂತೆ ಹಿಂದಿ ಹಾಗೂ ಕನ್ನಡ ಬಿಗ್ ಬಾಸ್ ಕಾರ್ಯಕ್ರಮ ಸೆಪ್ಟಂಬರ್ ತಿಂಗಳಲ್ಲಿ ಆರಂಭವಾಗುವ ಸಾಧ್ಯತೆ ಇದೆ. ಕನ್ನಡದಲ್ಲಿ ಕಿಚ್ಚ ಸುದೀಪ್ ಹಾಗೂ ಹಿಂದಿಯಲ್ಲಿ ಸಲ್ಮಾನ್ ಖಾನ್ ನಿರೂಪಣೆ ಮಾಡಲಿದ್ದಾರೆ.