'ಲವ್ ಮಾಕ್ಟೇಲ್-2'ನಲ್ಲಿ ದೊಡ್ಡ ಬದಲಾವಣೆ; ಚಿತ್ರದಿಂದ ಹೊರನಡೆದ ರಘು ದೀಕ್ಷಿತ್

ಸಿನಿಮಾದಿಂದ ಹೊರ ನಡೆದ ರಘು ದೀಕ್ಷಿತ್

ಸದ್ಯ ಕೇಳಿ ಬರುತ್ತಿರುವ ಮಾಹಿತಿ ಪ್ರಕಾರ ಸಂಗೀತ ನಿರ್ದೇಶಕ ರಘು ದೀಕ್ಷಿತ್, ಲವ್ ಮಾಕ್ಟೇಲ್-2 ಸಿನಿಮಾದಿಂದ ಹೊರ ಹೋಗಿದ್ದಾರಂತೆ. ಕೆಲವು ಕಾರಣಗಳಿಂದ ರಘು ದೀಕ್ಷಿತ್ ಸಿನಿಮಾದ ಭಾಗವಾಗಿಲ್ಲ ಎಂದು ಹೇಳಲಾಗುತ್ತಿದೆ. ಮೊದಲ ಭಾಗದಲ್ಲಿ ಸಂಗೀತದಿಂದ ಮೋಡಿ ಮಾಡಿದ್ದ ರಘು ದೀಕ್ಷಿತ್, ಪಾರ್ಟ್-2ನಿಂದ ಹೊರ ನಡೆದಿರುವುದು ಅಭಿಮಾನಿಗಳಿಗೆ ಕೊಂಚ ನಿರಾಸೆ ಮಾಡಿಸಿದೆ.

ರಘು ದೀಕ್ಷಿತ್ ಜಾಗಕ್ಕೆ ನಕುಲ್ ಎಂಟ್ರಿ

ರಘು ದೀಕ್ಷಿತ್ ಜಾಗಕ್ಕೆ ಖ್ಯಾತ ಗಾಯಕ ನಕುಲ್ ಅಭ್ಯಂಕರ್ ಎಂಟ್ರಿ ಕೊಟ್ಟಿದ್ದಾರೆ. ಹೌದು, ಲವ್ ಮಾಕ್ಟೇಲ್ ಭಾಗ- 2ರಲ್ಲಿ ನಕುಲ್ ಸಂಗೀತ ನಿರ್ದೇಶನ ಮಾಡುವ ಸಾಧ್ಯತೆ ಇದೆ. ಪಾರ್ಟ್-1ರಲ್ಲಿ ಸಿನಿಮಾದ ಭಾಗವಾಗಿದ್ದ ನಕುಲ್, ಪಾರ್ಟ್-2ನಲ್ಲಿ ಸಂಗೀತ ಸಂಯೋಜನೆಯ ಜವಾಬ್ದಾರಿ ವಹಿಸಿಕೊಳ್ಳಲಿದ್ದಾರೆ ಎಂದು ಹೇಳಲಾಗುತ್ತಿದೆ. ಲವ್ ಮಾಕ್ಟೇಲ್ ಸಿನಿಮಾದಲ್ಲಿ ದೊಡ್ಡ ಮಟ್ಟಕ್ಕೆ ಹಿಟ್ ಆದ 'ಲವ್ ಯು ಚಿನ್ನ...' ಮತ್ತು 'ಜನುಮಗಳೇ ಕಾಯುವೆ...' ಹಾಡನ್ನು ನಕುಲ್ ಹಾಡಿದ್ದಾರೆ.

ಚಿತ್ರೀಕರಣ ಮುಗಿದ ಬಳಿಕ ಸಂಗೀತದ ಬಗ್ಗೆ ಚರ್ಚೆ

ಲವ್ ಮಾಕ್ಟೇಲ್ ಮೊದಲ ಭಾಗದಲ್ಲಿ ಸಿನಿಮಾದ ಚಿತ್ರೀಕರಣ ಮುಗಿಸಿದ ಬಳಿಕ ಹಾಡುಗಳನ್ನು ಸೇರಿಸಲಾಗಿತ್ತು. ಇದೀಗ ಪಾರ್ಟ್-2ಗೂ ಅದೇ ಪ್ಲಾನ್ ಮಾಡಿದ್ದಾರೆ ನಿರ್ದೇಶಕ ಮತ್ತು ನಿರ್ಮಾಪಕ ಕೃಷ್ಣ. ಸದ್ಯ 60 ರಷ್ಟು ಚಿತ್ರೀಕರಣ ಮುಗಿಸಿರುವ ಸಿನಿಮಾತಂಡ ಸಂಪೂರ್ಣ ಶೂಟಿಂಗ್ ಮುಗಿದ ಬಳಿಕ ಸಂಗೀತದ ಬಗ್ಗೆ ಚರ್ಚೆ ಮಾಡಿ, ಹಾಡುಗಳನ್ನು ಸೇರಿಸಲಿದ್ದಾರಂತೆ.

Recommended Video

ಇವನ ಬೆನ್ನು ತಟ್ಟಿ ಆಶೀರ್ವಾದ ಮಾಡಿ | NodidavaruEnantare | Umapathy Srinivas | Filmibeat Kannada

ಕುತೂಹಲ ಹೆಚ್ಚಿಸಿದ ಪಾರ್ಟ್-2

ಲವ್ ಮಾಕ್ಟೇಲ್-2 ಸಿನಿಮಾ ಚಿತ್ರೀಕರಣಕ್ಕೆ ಕೊಂಚ ಬ್ರೇಕ್ ಹಾಕಿದ್ದಾರೆ ಡಾರ್ಲಿಂಗ್ ಕೃಷ್ಣ. ಎರಡನೇ ಭಾಗಕ್ಕೆ ಹೊಸ ನಾಯಕಿಯರ ಎಂಟ್ರಿಯಾಗಿದೆ. ಬೆಂಗಳೂರು ಮೂಲದ ಮಲಯಾಳಂ ನಟಿ ರೇಚಲ್ ಡೇವಿಡ್ ಚಿತ್ರಕ್ಕೆ ಆಯ್ಕೆಯಾಗಿದ್ದಾರೆ. ಇನ್ನೂ ಸುಶ್ಮಿತಾ ಎನ್ನುವ ಮತ್ತೋರ್ವ ಯುವ ನಟಿ ಸಹ ಲವ್ ಮಾಕ್ಟೇಲ್-2ನಲ್ಲಿ ನಟಿಸುತ್ತಿದ್ದಾರೆ. ಒಟ್ನಲ್ಲಿ ಸಾಕಷ್ಟು ನಿರೀಕ್ಷೆಯೊಂದಿಗೆ ಸಿನಿಮಾ ತೆರೆಗೆ ಬರುತ್ತಿದೆ. ಇದೀಗ ಸಂಗೀತ ನಿರ್ದೇಶಕರು ಬದಲಾಗಿರುವುದರಿಂದ ಹಾಡುಗಳು ಹೇಗಿರಲಿವೆ ಎನ್ನುವ ಕುತೂಹಲ ಸಹ ಅಭಿಮಾನಿಗಳಲ್ಲಿ ಮನೆ ಮಾಡಿದೆ.