"KGF" ಕಾನ್ಫಿಡೆನ್ಸ್, 'ಕಾಂತಾರ' ಎಮೋಷನ್.. ಪ್ರಾಮಾಣಿಕ ಪ್ರಯತ್ನಕ್ಕೆ ಯಶಸ್ಸು ಶತಸಿದ್ಧ": ವಿ. ರವಿಚಂದ್ರನ್

ಕನ್ನಡ ಇಂಡಸ್ಟ್ರಿಗೆ ಶುಕ್ರದೆಸೆ

'ರೇಮೊ' ಸಿನಿಮಾ ಪ್ರೀ ರಿಲೀಸ್ ಈವೆಂಟ್‌ನಲ್ಲಿ ಮಾತನಾಡುತ್ತಾ "ಕನ್ನಡ ಚಿತ್ರರಂಗಕ್ಕೆ ಈಗ ಒಳ್ಳೆ ಸ್ಥಿತಿಯಲ್ಲಿದೆ. ಶುಕ್ರದೆಸೆ ಬಂದಿದೆ. ರಿಷಬ್ ಶೆಟ್ಟಿಗೆ ಗಜಕೇಸರಿ ಯೋಗ ಬಂದಿದೆ ಎನ್ನುತ್ತಿದ್ದಾರೆ. ನಮ್ಮ ಸಿನಿಮಾಗಳ ಬಗ್ಗೆ ಎಲ್ಲರೂ ಮಾತನಾಡುತ್ತಿದ್ದಾರೆ. ಇಂತಹ ಸಮಯದಲ್ಲಿ ಸಿ. ಆರ್ ಮನೋಹರ್‌ರಂತಹ ನಿರ್ಮಾಪಕರು ಬೇಕು. ನಗು ನಗುತ್ತಾ ಸಿನಿಮಾ ಮಾಡುವವರು ಬೇಕು. ನಿರ್ಮಾಪಕರು ಎಷ್ಟು ಖುಷಿಯಿಂದ ಸಿನಿಮಾ ಮಾಡಿದರೆ ಅಷ್ಟು ಒಳ್ಳೆ ಸಿನಿಮಾ ಆಗುತ್ತದೆ"

'KGF' ಕಾನ್ಫಿಡೆನ್ಸ್, 'ಕಾಂತಾರ' ಎಮೋಷನ್

"ಕನ್ನಡ ಚಿತ್ರರಂಗಕ್ಕೆ ಎನ್ನುವುದು ಒಂದು 'KGF' ಕಾನ್ಫಿಡೆನ್ಸ್. ಆ ಸಿನಿಮಾ ಕಾನ್ಫಿಡೆನ್ಸ್ ಕೊಡ್ತು. ನಾವು ಎಷ್ಟು ವ್ಯಯಿಸಿದರೆ ಅಷ್ಟು ಬರುತ್ತದೆ ಎಂದು ಯಶ್ ತೋರಿಸಿಕೊಟ್ಟ. 'ಕಾಂತಾರ' ಅನ್ನುವುದು ಒಂದು ಎಮೋಷನ್. ಅದು ನಿಮ್ಮ ಹೃದಯವನ್ನು ತಾಕಿತ್ತು. ಅದು ಕೂಡ ಗೆದ್ದು ತೋರಿಸುತ್ತದೆ. ಎರಡು ಸಿನಿಮಾ ಬಜೆಟ್‌ನಲ್ಲಿ ವ್ಯತ್ಯಾಸ ಇದೆ. 'KGF' ತಂಡ ದೊಡ್ಡ ಗುರಿಯೊಂದಿಗೆ ಗೆದ್ದರೆ, 'ಕಾಂತಾರ' ಗುರಿ ಇಲ್ಲದೇ ಗೆದ್ದರು.

ರಿಷಬ್ ಶೆಟ್ಟಿ ಕಡಿಮೆ ಕಷ್ಟಪಟ್ಟಿಲ್ಲ

"ಸಿನಿಮಾ ಮಾಡುವ ಪ್ರಾಮಾಣಿಕತೆ ಬಹಳ ಮುಖ್ಯ. ರಿಷಬ್ ಶೆಟ್ಟಿ ಏನು ಕಡಿಮೆ ಕಷ್ಟಪಟ್ಟಿಲ್ಲ. ನನಗೆ ಗೊತ್ತಿರುವಂತೆ ರಿಷಬ್ 15 ವರ್ಷಗಳಿಂದ ಚಿತ್ರರಂಗದಲ್ಲಿ ಇದ್ದಾರೆ. ಇದು ಬರೀ ಒಂದು 'ಕಾಂತಾರ'ದಿಂದ ಸಿಕ್ಕಿದ ಸಕ್ಸಸ್ ಅಲ್ಲ. 15 ವರ್ಷಗಳ ಜರ್ನಿಯಿಂದ ಸಿಕ್ಕಿದ್ದು. ಅದು ಬಹಳ ಮುಖ್ಯ. ಸಕ್ಸಸ್ ಗುರಿ ಅಲ್ಲ. ನಿಮ್ಮ ಕೆಲಸವೇ ಗುರಿ. ಒಳ್ಲೆ ಕೆಲಸಕ್ಕೆ ಪ್ರತಿಫಲ ಸಿಕ್ಕೇ ಸಿಗುತ್ತದೆ" ಎಂದರು.

ನ.25ಕ್ಕೆ 'ರೇಮೊ' ಸಿನಿಮಾ ರಿಲೀಸ್

ಮ್ಯೂಸಿಕಲ್ ಲವ್ ಸ್ಟೋರಿ 'ರೇಮೊ' ಸಿನಿಮಾ ನವೆಂಬರ್ 25ಕ್ಕೆ ತೆರೆಗಪ್ಪಳಿಸಲಿದೆ. ಸಿ. ಆರ್ ಮನೋಹರ್ ನಿರ್ಮಾಣದ ಈ ಅದ್ಧೂರಿ ಚಿತ್ರದಲ್ಲಿ ಇಶಾನ್, ಆಶಿಕಾ ರಂಗನಾಥ್ ಲೀಡ್ ರೋಲ್‌ಗಳಲ್ಲಿ ನಟಿಸಿದ್ದಾರೆ. ಪವನ್ ಒಡೆಯರ್ ಚಿತ್ರಕ್ಕೆ ಆಕ್ಷನ್ ಕಟ್ ಹೇಳಿದ್ದಾರೆ. ಈಗಾಗಲೇ ಚಿತ್ರದ ಟ್ರೈಲರ್, ಸಾಂಗ್ಸ್ ಹಿಟ್ ಆಗಿದೆ.