ಇದಪ್ಪಾ ಕಾಡುಬೆಟ್ಟು ಶಿವನ ಕ್ರೇಜ್ ಅಂದ್ರೆ: ನೇರವಾಗಿ ಹಾಲಿವುಡ್‌ಗೆ 'ಕಾಂತಾರ'?

ಇಂಗ್ಲೀಷ್ ಭಾಷೆಗೆ 'ಕಾಂತಾರ' ಡಬ್?

ನಮ್ಮ ಕರಾವಳಿಯ ಕಥೆಯನ್ನು ರಿಷಬ್ ಶೆಟ್ಟಿ ಕನ್ನಡದಲ್ಲಿ ಮಾತ್ರ ಕಟ್ಟಿಕೊಟ್ಟಿದ್ದರು. ಬೇರೆ ಭಾಷೆಗಳಿಗೆ 'ಕಾಂತಾರ' ಸಿನಿಮಾ ತಾನಾಗಿಯೇ ಡಬ್ ಮಾಡಿಸಿಕೊಂಡಿತ್ತು. ಇದೀಗ ಇಂಗ್ಲೀಷ್ ಭಾಷೆಗೆ ಚಿತ್ರವನ್ನು ಡಬ್ ಮಾಡುವ ಬಗ್ಗೆ ಚರ್ಚೆ ಶುರುವಾಗಿದೆ. ಹೊಂಬಾಳೆ ಫಿಲ್ಮ್ಸ್ ಸಂಸ್ಥೆ ಇಂತಹ ಕಸರತ್ತು ನಡೆಸುತ್ತಿದೆ ಎನ್ನುವ ಗುಸುಗುಸು ಕೇಳಿಬರ್ತಿದೆ. ಅದೇ ನಿಜವಾದರೇ ಮತ್ತೊಮ್ಮೆ 'ಕಾಂತಾರ' ಸದ್ದು ವಿಶ್ವದಾದ್ಯಂತ ಮಾರ್ದನಿಸುವುದು ಗ್ಯಾರೆಂಟಿ.

ನೇರವಾಗಿ ಓಟಿಟಿಗೆ ಇಂಗ್ಲೀಷ್ ವರ್ಷನ್?

'ಕಾಂತಾರ' ಚಿತ್ರವನ್ನು ಇಂಗ್ಲೀಷ್ ಭಾಷೆಗೆ ಡಬ್ ಮಾಡಿ ಮತ್ತಷ್ಟು ದೊಡ್ಡ ಮಟ್ಟದಲ್ಲಿ ಪ್ರೇಕ್ಷಕರಿಗೆ ತಲುಪಿಸುವ ಪ್ರಯತ್ನ ನಡೀತಿದೆ. ಆದರೆ ಇಂಗ್ಲೀಷ್ ವರ್ಷನ್ ಥಿಯೇಟರ್‌ನಲ್ಲಿ ಬಿಡುಗಡೆಯಾಗುತ್ತಾ? ಇಲ್ಲ ಬರೀ ಓಟಿಟಿಗೆ ಬರುತ್ತಾ ಎನ್ನುವುದನ್ನು ಕಾದು ನೋಡಬೇಕು. 'ಕಾಂತಾರ' ಹಿಂದಿ ವರ್ಷನ್ ನೆಟ್‌ಫ್ಲಿಕ್ಸ್‌ನಲ್ಲಿ ಬರುವ ಸಾಧ್ಯತೆಯಿದೆ. ಅದೇ ರೀತಿ ಇಂಗ್ಲೀಷ್ ವರ್ಷನ್ ಸಹ ನೆಟ್‌ಫ್ಲಿಕ್ಸ್‌ಗೆ ಬಂದರೆ ಅಚ್ಚರಿ ಪಡಬೇಕಿಲ್ಲ.

ಹಾಲಿವುಡ್‌ನಲ್ಲಿ ಸದ್ದು ಮಾಡಿದ್ದ 'RRR'

ರಾಜಮೌಳಿ ನಿರ್ದೇಶನದ 'RRR' ನೆಟ್‌ಫ್ಲಿಕ್ಸ್‌ನಲ್ಲಿ ಸ್ಟ್ರೀಮಿಂಗ್ ಆಗಿ ಹಾಲಿವುಡ್‌ನಲ್ಲಿ ಸದ್ದು ಮಾಡಿದ್ದು ಗೊತ್ತೇಯಿದೆ. ಹಾಲಿವುಡ್ ಫಿಲ್ಮ್ ಮೇಕರ್ಸ್ ಕೂಡ ರಾಮ್‌-ಭೀಮ್ ಬ್ರೊಮ್ಯಾನ್ಸ್ ನೋಡಿ ಬೆರಗಾಗಿದ್ದರು. ಚಿತ್ರತಂಡದ ಪ್ರಯತ್ನಕ್ಕೆ ಬಹುಪರಾಕ್ ಎಂದಿದ್ದರು. ಇವತ್ತಿಗೂ ಹಲವು ಅಂತರಾಷ್ಟ್ರೀಯ ಫಿಲ್ಮ್ ಫೆಸ್ಟಿವಲ್‌ಗಳಲ್ಲಿ ಸಿನಿಮಾ ಪ್ರದರ್ಶನ ಕಂಡು ಧೂಳೆಬ್ಬಿಸುತ್ತಿದೆ. ಒಳ್ಳೆ ಕಂಟೆಂಟ್ ಇದ್ದರೆ ದಕ್ಷಿಣ ಭಾರತದ ಸಿನಿಮಾಗಳು ಹಾಲಿವುಡ್‌ನಲ್ಲೂ ಅಬ್ಬರಿಸುತ್ತವೆ ಎನ್ನುವುದು ಸಾಬೀತಾಗಿದೆ. 'ಕಾಂತಾರ' ಕೂಡ ಇದೇ ರೀತಿ ಹಾಲಿವುಡ್‌ನಲ್ಲಿ ಸಂಚಲನ ಸೃಷ್ಟಿಸಿದರೆ ಅಚ್ಚರಿಪಡಬೇಕಿಲ್ಲ.

ತುಳು ವರ್ಷನ್‌ ರಿಲೀಸ್‌ಗೆ ಕೌಂಟ್‌ಡೌನ್

'ಕಾಂತಾರ' ಸಿನಿಮಾ ತುಳು ಭಾಷೆಗೆ ಡಬ್ ಆಗಿದ್ದು ನಾಳೆ(ಡಿಸೆಂಬರ್ 2) ತೆರೆಗಪ್ಪಳಿಸಲಿದೆ. ವಿದೇಶಗಳಲ್ಲೂ ಸಿನಿಮಾ ತುಳು ಭಾಷೆಯಲ್ಲಿ ಪ್ರದರ್ಶನ ಕಾಣುತಿದೆ. ತುಳುನಾಡಿದ ಕಥೆಯನ್ನು ಅಲ್ಲಿನ ಆಚಾರಣೆ, ಸಂಸ್ಕೃತಿಯನ್ನು ಚಿತ್ರದಲ್ಲಿ ಕಟ್ಟಿಕೊಡಲಾಗಿದೆ. ಹಾಗಾಗಿ ತುಳು ಭಾಷೆಯಲ್ಲಿ ಸಿನಿಮಾ ಡಬ್ ಮಾಡಿ ರಿಲೀಸ್ ಮಾಡಲೇಬೇಕು ಎಂದು ನಿರ್ಮಾಪಕರಾದ ವಿಜಯ್ ಕಿರಗಂದೂರ್ ಮುಂದಾಗಿದ್ದಾರೆ.