ಲೋಕೇಶ್ ಕುಟುಂಬದ ಹೊಸ ಸಾಧನೆ: ಇನ್ಮುಂದೆ ಯಾರೂ ಮಾಡಲಾಗದು.!

ಲೋಕೇಶ್ ಗೆ ಸುಬ್ಬಯ್ಯ ನಾಯ್ಡು ಆಕ್ಷನ್ ಕಟ್

ಸೃಜನ್ ಲೋಕೇಶ್ ಅವರ ತಂದೆ ಲೋಕೇಶ್ ಅವರ ಅಭಿನಯಿಸಿದ ಮೊದಲ ಸಿನಿಮಾ 'ಭಕ್ತ ಪ್ರಹ್ಲಾದ' (1958). ಈ ಚಿತ್ರವನ್ನ ನಿರ್ದೇಶನ ಮಾಡಿದ್ದು, ಸೃಜನ್ ಅವರ ತಾತ ಸುಬ್ಬಯ್ಯ ನಾಯ್ಡು. ಲೋಕೇಶ್ ಅವರಿಗೆ ಅವರ ತಂದೆ ಆಕ್ಷನ್ ಕಟ್ ಹೇಳಿದ್ರು. ಇದೇ ಹೆಸರಿನಲ್ಲಿ ಡಾ ರಾಜ್ ಕುಮಾರ್ ಕೂಡ ಸಿನಿಮಾ ಮಾಡಿದ್ರು. ಅದು 1983ರಲ್ಲಿ ಬಿಡುಗಡೆಯಾಗಿತ್ತು.

ಸೃಜನ್ ಗೆ ಲೋಕೇಶ್ ಆಕ್ಷನ್ ಕಟ್

ಸೃಜನ್ ಲೋಕೇಶ್ ಅಭಿನಯದ ಮೊದಲ ಸಿನಿಮಾ 'ಭುಜಂಗಯ್ಯನ ದಶಾವತಾರ'. 1991ರಲ್ಲಿ ತೆರೆಕಂಡಿದ್ದ ಈ ಚಿತ್ರವನ್ನ ಲೋಕೇಶ್ ಅವರೇ ನಟಿಸಿ, ನಿರ್ದೇಶನ ಮಾಡಿ, ನಿರ್ಮಾಣ ಕೂಡ ಮಾಡಿದ್ದರು. ಈ ಚಿತ್ರದಲ್ಲಿ ಮಾಸ್ಟರ್ ಸೃಜನ್ ಬಾಲನಟನಾಗಿ ಅಭಿನಯಿಸಿದ್ದರು. ಹೀಗಾಗಿ, ಮಗನಿಗೆ ಮೊದಲು ಆಕ್ಷನ್ ಕಟ್ ಹೇಳಿದ್ದು ತಂದೆ ಲೋಕೇಶ್.

ಮಗನಿಗೆ ಸೃಜನ್ ಆಕ್ಷನ್ ಕಟ್

ಈಗ ಅದೇ ಸಂಪ್ರದಾಯವನ್ನ ಮುಂದುವರಿಸಿದ ಸೃಜನ್ ಲೋಕೇಶ್ ತಮ್ಮ ಮಗನಿಗೆ ತಾವೇ ಮೊದಲ ಸಲ ಆಕ್ಷನ್ ಕಟ್ ಹೇಳಿದ್ದಾರೆ. ಹೌದು, ಸೃಜನ್ ಲೋಕೇಶ್ ನಟಿಸಿ, ನಿರ್ಮಾಣ ಮಾಡುತ್ತಿರುವ 'ಎಲ್ಲಿದ್ದೆ ಇಲ್ಲಿ ತನಕ' ಚಿತ್ರದಲ್ಲಿ ಸೃಜನ್ ಮಗ ಸುಕೃತ್ ಮೊದಲ ಬಾರಿಗೆ ಕಾಣಿಸಿಕೊಳ್ಳುತ್ತಿದ್ದು, ಮಗನ ದೃಶ್ಯಕ್ಕೆ ಸೃಜನ್ ನಿರ್ದೇಶನ ಮಾಡಿದ್ದಾರೆ. ಉಳಿದಂತೆ ಸಿನಿಮಾವನ್ನ ತೇಜಸ್ವಿ ನಿರ್ದೇಶನ ಮಾಡ್ತಿದ್ದಾರೆ.

ತಲೆಮಾರಿನಿಂದ ಟ್ರೆಂಡ್ ಇದು

ಇದು ಕಲಾವಿದನ ಕುಟುಂಬ ಹಾಗೂ ಸಿನಿಮಾರಂಗದಲ್ಲಿ ದಾಖಲಾಗಿರುವ ಅಪರೂಪದ ಸಾಧನೆ ಮತ್ತು ದಾಖಲೆ ಎನ್ನಬಹುದು. ಈ ರೀತಿಯಾದ ಕ್ಷಣ ಮತ್ತೆ ಬರುತ್ತಾ ಗೊತ್ತಿಲ್ಲ. ಆದ್ರೆ, ಸೃಜನ್ ಲೋಕೇಶ್ ಕುಟುಂಬಕ್ಕೆ ಇದು ಖುಷಿಯ ವಿಚಾರವೇ ಸರಿ.

'ಎಲ್ಲಿದ್ದೆ ಇಲ್ಲಿ ತನಕ' ಆರಂಭ

'ಎಲ್ಲಿದ್ದೆ ಇಲ್ಲಿ ತನಕ' ಸಿನಿಮಾ ಆರಭವಾಗಿದೆ. ದರ್ಶನ್, ರವಿಚಂದ್ರನ್ ಮತ್ತು ಹಿರಿಯ ನಟಿ ಜಯಂತಿ ಈ ಚಿತ್ರಕ್ಕೆ ಚಾಲನೆ ನೀಡಿದ್ದಾರೆ. ಸೃಜನ್ ನಾಯಕನಾಗಿದ್ದು, ಹರಿಪ್ರಿಯಾ ಜೋಡಿಯಾಗಿದ್ದಾರೆ. ಅರ್ಜುನ್ ಜನ್ಯ ಸಂಗೀತ, ತೇಜಸ್ವಿ ನಿರ್ದೇಶನವಿದೆ. ಲೋಕೇಶ್ ಪ್ರೊಡಕ್ಷನ್ ನಲ್ಲೇ ಈ ಸಿನಿಮಾ ತಯಾರಾಗಿದೆ.