ಲಾಕ್‌ಡೌನ್ ಸೃಷ್ಟಿಸಿದ ಅಸಮಾನತೆ ಮೇಲೆ ಬೆಳಕು ಚೆಲ್ಲುವ 'ದಿ ಫೆನ್ಸ್'

ಭಿನ್ನ ಹಾದಿ ಹಿಡಿವಂತೆ ಪ್ರೇರೇಪಿಸುವ ಲಾಕ್‌ಡೌನ್

'ದಿ ಫೆನ್ಸ್' ಕಿರುಚಿತ್ರದಲ್ಲಿ ಎರಡು ಭಿನ್ನ ಸ್ಥರ, ವರ್ಗಕ್ಕೆ ಸೇರಿದ ಇಬ್ಬರು ವಿದ್ಯಾರ್ಥಿಗಳನ್ನು ಪ್ರಧಾನವಾಗಿಟ್ಟುಕೊಂಡು ಲಾಕ್‌ಡೌನ್‌ನಲ್ಲಿ ಉಂಟಾದ ಸಾಮಾಜಿಕ ಬಹಿಷ್ಕಾರದ ವಿಷಯಗಳನ್ನು, ಮಾನವೀಯತೆ ಮರೆತ ಮುಖಗಳನ್ನು ಚಿತ್ರಿಸುವ ಪ್ರಯತ್ನ ಮಾಡಲಾಗಿದೆ. ಊರ ಗಡಿಗೆ ಬೇಲಿ ಹಾಕುವ, ಊರಿಗೆ ವಾಪಸ್ಸಾದ ವಲಸೆ ಕಾರ್ಮಿಕರನ್ನು ಊರು ಪ್ರವೇಶಿಸಲು ಬಿಡದೆ ಬಲವಂತದಿಂದ ಹೊರಗಟ್ಟಿದ ಪ್ರಸಂಗಗಳನ್ನೂ ಸಹ ಇಲ್ಲಿ ಅಟೆಂಡ್ ಮಾಡಲಾಗಿದೆ.

ಕಡಿಮೆ ಸಂಪನ್ಮೂಲ ಬಳಸಿ ಕತೆ ಹೇಳಿದ್ದಾರೆ

ಕಡಿಮೆ ಸಂಪನ್ಮೂಲಗಳನ್ನು ಬಳಸಿ ಕತೆ ಹೇಳಿದ್ದಾರೆ ನಿರ್ದೇಶಕ ಅರೋಚಿ. ತಮ್ಮ ಸುತ್ತ-ಮುತ್ತ ಕಂಡ, ಗಮನಿಸಿದ ಘಟನೆಗಳಿಗೆ ದೃಶ್ಯದ ರೂಪವನ್ನು ಅವರು ನೀಡಿದ್ದಾರೆ. ಹಳ್ಳಿಗಳಲ್ಲಿ ಎದುರಿಸಲಾಗುತ್ತಿರುವ ನೆಟ್‌ವರ್ಕ್ ಸಮಸ್ಯೆ, ನೆಟ್‌ವರ್ಕ್‌ಗಾಗಿ ಕಿಲೋಮೀಟರ್‌ಗಟ್ಟಲೆ ಹೊಳೆ, ತೊರೆ ದಾಟಿ ಹೋಗುವ ಮಕ್ಕಳು. ವರ್ಕ್‌ ಫ್ರಂ ಹೋಮ್ ಉದ್ಯೋಗಿಗಳು ಎಲ್ಲರೂ ಕಿರುಚಿತ್ರದಲ್ಲಿ ಪಾತ್ರವಾಗಿ ತಮ್ಮ ಕಷ್ಟಗಳನ್ನು ದೃಶ್ಯಿಕವಾಗಿ ಹೇಳಿಕೊಂಡಿದ್ದಾರೆ.

ಕಂಡು, ಕೇಳಿ, ಓದಿದ ವಿಷಯಗಳೇ ಸ್ಪೂರ್ತಿ: ಅರೋಚಿ

'ಫಿಲ್ಮೀಬೀಟ್‌' ಜೊತೆ ಮಾತನಾಡಿದ ಕಿರುಚಿತ್ರದ ನಿರ್ದೇಶಕ ಅರೋಚಿ, 'ಬೆಂಗಳೂರಿನಿಂದ ವಾಪಸ್ಸಾದಾಗ ಕಂಡ, ಕೇಳಿದ, ಪತ್ರಿಕೆಗಳಲ್ಲಿ ಓದಿದ ಘಟನೆಗಳೆ 'ದಿ ಫೆನ್ಸ್' ಕಿರುಚಿತ್ರ ಮಾಡಲು ಪ್ರೇರಣೆ. ವಲಸೆ ಕಾರ್ಮಿಕರು ಬರದಂತೆ ಹಳ್ಳಿಗಳಿಗೆ ಬೇಲಿ ಹಾಕುವ, ಊರ ಪ್ರವೇಶ ನಿರಾಕರಿಸಿಸುವ ಘಟನೆಗಳು ತೀರ ಅಮಾನವೀಯ ಎನಿಸಿತು. ಜೊತೆಗೆ ಮಲೆನಾಡು ಹಳ್ಳಿಗಳ ನೆಟ್‌ವರ್ಕ್ ಸಮಸ್ಯೆ, ಅದರಿಂದ ವಿದ್ಯಾರ್ಥಿಗಳು ಎದುರಿಸುತ್ತಿರುವ ಸಮಸ್ಯೆಗಳು. ಇವೆಲ್ಲವೂ ಎಲ್ಲೋ ಕೂತವರಿಗೆ ಸರಳ ಸಮಸ್ಯೆ ಎನಿಸಿದರೂ ಆಳದಲ್ಲಿ ಇವುಗಳ ಪರಿಣಾಮ ಬಹಳ ಗಂಭೀರ ಹಾಗಾಗಿ ಈ ವಿಷಯದ ಮೇಲೆ ಕಿರುಚಿತ್ರ ನಿರ್ದೇಶಿಸಿದೆ'' ಎಂದಿದ್ದಾರೆ.

Recommended Video

Karnataka Unlock: Yediyurappa ಹೇಳಿಕೆ ಕೇಳಿ ನಿಟ್ಟುಸಿರು ಬಿಟ್ಟ ಚಿತ್ರರಂಗ | Filmibeat Kannada

ಮೊದಲ ಪ್ರಯತ್ನದಲ್ಲಿಯೇ ಗಮನ ಸೆಳೆದಿದ್ದಾರೆ

ಎರಡು ತಿಂಗಳ ಕಾಲ ಶ್ರಮವಹಿಸಿ ಈ ಕಿರುಚಿತ್ರ ನಿರ್ದೇಶಿಸಿದ್ದಾರೆ ಅರೋಚಿ. ಸ್ಥಳೀಯ ಮಕ್ಕಳು, ಊರ ಜನರೇ ಇಲ್ಲಿ ನಟರು. ಡಿಎಸ್‌ಎಲ್‌ಆರ್ ಕ್ಯಾಮೆರಾ ಬಳಸಿ ಚಿತ್ರೀಕರಿಸಲಾಗಿರುವ ಕಿರುಚಿತ್ರದ ಸಂಕಲನ ಮಾಡಿರುವುದು ಕಾರ್ತಿಕ್ ಕುರ್ಕುರೆ, ನಿರ್ಮಾಣ ಸುಧಾ ವೈ.ಎಂ., ಚಿತ್ರಕತೆ, ಸಂಭಾಷಣೆ, ನಿರ್ದೇಶನ ಮತ್ತು ಕ್ಯಾಮೆರಾ ಜವಾಬ್ದಾರಿಗಳನ್ನು ಅರೋಚಿಯೇ ನಿರ್ವಹಿಸಿದ್ದಾರೆ. ಗುಡ್ಡ, ಕಾಡು-ಮೇಡು ಅಲೆದು ಚಿತ್ರೀಕರಣ ಮಾಡಿರುವ ಚಿತ್ರತಂಡದ ಶ್ರಮ ಕಿರುಚಿತ್ರದಲ್ಲಿ ಕಾಣುತ್ತದೆ. ಮೊದಲ ಪ್ರಯತ್ನದಲ್ಲಿಯೇ ಗಮನ ಸೆಳೆದಿದೆ ಈ ತಂಡ.