ಗೆದ್ದವರನ್ನು ನೋಡಿ ಹೊಟ್ಟೆಕಿಚ್ಚು ಪಡಬೇಡಿ ಪೈಪೋಟಿ ನೀಡಿ: ಯಶ್

ಹೊಟ್ಟೆಕಿಚ್ಚು ಪಡಬಾರದು

ಬೇರೆ ಚಿತ್ರರಂಗಗಳ ಬಗ್ಗೆ ಹಗುರವಾಗಿ ಮಾತನಾಡುವುದನ್ನು ನಿಲ್ಲಿಸಬೇಕು, ಬೇರೆ ಚಿತ್ರರಂಗಗಳನ್ನು ಟ್ರೋಲ್ ಮಾಡುವುದನ್ನು ಬೆಂಬಲಿಸಬಾರದು ಎಂದಿರುವ ಯಶ್ ಒಳ್ಳೆ ಚಿತ್ರಗಳನ್ನು ಮಾಡುವ ಕಲಾವಿದನನ್ನು ಹಾಗೂ ಒಳ್ಳೆ ಚಿತ್ರಗಳನ್ನು ಮಾಡುವ ಚಿತ್ರರಂಗಳನ್ನು ಗೌರವಿಸಬೇಕು ಎಂದಿದ್ದಾರೆ. ಇದೇ ವೇಳೆ ಬೇರೆ ಚಿತ್ರರಂಗದ ಬಗ್ಗೆ ಹೊಟ್ಟೆಕಿಚ್ಚು ಪಡಬಾರದು, ನಾವೇ ಬೆಸ್ಟ್ ಎಂದು ಸುಮ್ಮನೆ ಕೂರಬಾರದು, ಹೋಗಿ ಪೈಪೋಟಿ ನೀಡಬೇಕು, ಈಗಿನ ತಲೆಮಾರಿನ ಯುವಕರು ಅದನ್ನು ಅರ್ಥಮಾಡಿಕೊಳ್ಳಬೇಕು ಎಂದು ಯಶ್ ಹೇಳಿದರು.

ನಮ್ಮನ್ನು ಹೀಯಾಳಿಸಿದ್ರು ಎಂದು ನಾವೂ ಹೀಯಾಳಿಸಬಾರದು

ಇನ್ನೂ ಮುಂದುವರಿದು ಮಾತನಾಡಿದ ಕನ್ನಡ ಚಿತ್ರರಂಗದ ಅಭಿಮಾನಿಗಳಿಗೆ ಸಂದೇಶವೊಂದನ್ನು ನೀಡಿದರು. ಕನ್ನಡ ಸಿನಿ ರಸಿಕರು ಬೇರೆ ಚಿತ್ರರಂಗದ ಬಗ್ಗೆ ಕೀಳಾಗಿ ಮಾತನಾಡಬಾರದು, ನಾವು ಹಿಂದೆ ಉಳಿದಿದ್ದಾಗ ಹೀಯಾಳಿಸಿದ್ರು ಎಂಬ ಕಾರಣಕ್ಕೆ ನಾವು ಬೆಳೆದು ಗೌರವ ಪಡೆದುಕೊಂಡ ನಂತರ ಬೇರೆ ಚಿತ್ರರಂಗವನ್ನು ಹೀಯಾಳಿಸುವುದು ಸರಿಯಲ್ಲ, ನಾವು ಎಲ್ಲರನ್ನೂ ಗೌರವಿಸಬೇಕು ಎಂದು ಯಶ್ ಹೇಳಿದರು.

ಬಾಲಿವುಡ್‌ ಗೌರವಿಸಿ

ಮಾತು ಮುಂದುವರಿಸಿದ ಯಶ್ ಬಾಲಿವುಡ್ ಅನ್ನು ಗೌರವಿಸಿ ಎಂದರು. ದಕ್ಷಿಣ ಹಾಗೂ ಉತ್ತರ ಭಾರತದ ಚಿತ್ರರಂಗಗಳು ಎಂಬುದನ್ನು ಬಿಡಿ, ಆ ರೀತಿ ಮಾತನಾಡಬೇಡಿ, ನಾವು ಇದನ್ನೆಲ್ಲಾ ನಿಲ್ಲಿಸುವುದು ಯಾವಾಗ, ನಮ್ಮ ಗುರಿ ಬೇರೆ ದೇಶಗಳ ಜತೆ ಪೈಪೋಟಿ ನೀಡುವುದಾಗಿರಬೇಕು, ಪೈಪೋಟಿ ನೀಡಿ ಭಾರತ ಬಂದಿದೆ ಎಂದು ಪ್ರಪಂಚಕ್ಕೆ ಹೇಳಿ ಎಂದು ಯಶ್ ಹೇಳಿದರು.

ಬಾಲಿವುಡ್ ತುಂಬಾ ಕಲಿಸಿಕೊಟ್ಟಿದೆ

ಇನ್ನು ಬಾಲಿವುಡ್ ಚಿತ್ರರಂಗ ಈ ಹಿಂದೆ ಹಲವು ವಿಚಾರಗಳನ್ನು ಕಲಿಸಿಕೊಟ್ಟಿದೆ ಹಾಗೂ ಅವರು ಸದ್ಯಕ್ಕೆ ಕೆಟ್ಟ ಹಂತದಲ್ಲಿದ್ದಾರೆ ಎಂದೂ ಸಹ ಯಶ್ ಹೇಳಿದರು. ಯಶ್ ಈ ರೀತಿ ಇತರೆ ಚಿತ್ರರಂಗವನ್ನು ಗೌರವಿಸಿ ಎಂದು ಸಂದೇಶ ನೀಡಿದ್ದನ್ನು ಕಂಡ ಅಲ್ಲಿದ್ದ ಸಿನಿ ರಸಿಕರು ಶಿಳ್ಳೆ ಚಪ್ಪಾಳೆ ಹಾಕಿ ಪ್ರಶಂಸಿಸಿದರು.