'ಪ್ರಜಾಕೀಯ'ಕ್ಕೆ ಜೀವ ತುಂಬಲು ಸಜ್ಜಾದ ಉಪ್ಪಿ: ಹುಟ್ಟುಹಬ್ಬಕ್ಕೆ ಸೆಕೆಂಡ್ ಇನ್ನಿಂಗ್ಸ್

ಉಪೇಂದ್ರ ಪಕ್ಷದ ಹೆಸರು ಅಂತಿಮ

ಕರ್ನಾಟಕ ಪ್ರಜ್ಞಾವಂತ ಜನತಾ ಪಾರ್ಟಿಯ (ಕೆಪಿಜೆಪಿ) ಮೂಲಕ ರಾಜಕೀಯಕ್ಕೆ ಪ್ರವೇಶ ಮಾಡಿದ್ದ ಉಪೇಂದ್ರ ಅವರು ಈಗ ತಮ್ಮದೇ ಸ್ವಂತ ಪಾರ್ಟಿಯನ್ನ ಸ್ಥಾಪಿಸಿಕೊಂಡಿದ್ದಾರೆ. ಈ ಪಾರ್ಟಿಯ ಹೆಸರು ಅಂತಿಮವಾಗಿದ್ದು, ಉತ್ತಮ ಪ್ರಜಾಕೀಯ ಪಾರ್ಟಿ (ಯು.ಪಿ.ಪಿ) ಎಂದು ಘೋಷಿಸಲಿದ್ದಾರೆ.

18 ರಂದು ಲೋಕಾರ್ಪಣೆ

ಉಪೇಂದ್ರ ಅವರ 'ಉತ್ತಮ ಪ್ರಜಾಕೀಯ ಪಾರ್ಟಿ' ಪಕ್ಷವನ್ನ ಅಧಿಕೃತವಾಗಿ 18ನೇ ತಾರೀಖು ತಮ್ಮ ನಿವಾಸದಲ್ಲೇ ಲೋಕಾರ್ಪಣೆ ಮಾಡುವುದಾಗಿ ತಿಳಿಸಿದ್ದಾರೆ. ಮತ್ತೊಂದು ವಿಶೇಷ ಅಂದ್ರೆ ಸೆಪ್ಟೆಂಬರ 18 ಉಪೇಂದ್ರ ಅವರ ಹುಟ್ಟುಹಬ್ಬವಿದೆ. ಈ ಕಾರ್ಯಕ್ರಮಕ್ಕೆ ಎಲ್ಲರೂ ಬನ್ನಿ ಎಂದು ಮುಕ್ತವಾಗಿ ಆಹ್ವಾನಿಸಿದ್ದಾರೆ.

ಲೋಕಸಭೆಗೆ ಸ್ಪರ್ಧೆ ಖಚಿತ.!

ಉಪೇಂದ್ರ ಅವರು ತಮ್ಮ ಪಕ್ಷವನ್ನೇ ಇನ್ನು ಅಂತಿಮ ಮಾಡಿಲ್ಲ. ಇನ್ನು ಸಂಘಟನೆ ಯಾವಾಗ, ಅಭ್ಯರ್ಥಿಗಳು ಯಾವಾಗ ಎನ್ನುತ್ತಿದ್ದವರಿಗೆ ಉತ್ತರ ಕೊಡಲು ಉಪ್ಪಿ ಸಿದ್ಧವಾಗಿದ್ದಾರೆ. ಈಗ ಪಕ್ಷ ಘೋಷಿಸುತ್ತಿರುವುದನ್ನ ನೋಡಿದ್ರೆ, ಬಹುಶಃ ಉಪೇಂದ್ರ ಅವರು ಈ ಬಾರಿ ಲೋಕಸಭೆ ಚುನಾವಣೆಗೆ ಸ್ಪರ್ಧೆ ಮಾಡುವುದು ಖಚಿತವೆನ್ನಲಾಗುತ್ತಿದೆ.

ಅಭ್ಯರ್ಥಿಗಳ ಪಟ್ಟಿ ಸಿದ್ಧವಾಗಿದೆ

ಅಂದ್ಹಾಗೆ, ಕಳೆದ ಬಾರಿ ಕೆಪಿಜೆಪಿ ಪಕ್ಷದಲ್ಲಿದ್ದಾಗ ಉಪೇಂದ್ರ ಅವರು ಕೆಲವು ಅಭ್ಯರ್ಥಿಗಳನ್ನ ಆಯ್ಕೆ ಮಾಡಿ ಅಂತಿಮ ಮಾಡಿಕೊಂಡಿದ್ದರು. ಉಪ್ಪಿ ಪಕ್ಷ ತೊರೆದಾಗ ಅವರು ಕೂಡ ಉಪ್ಪಿ ಜೊತೆಯಲ್ಲೆ ಬಂದರು. ಅವರಿಗೆ ಈಗ ಲೋಕಸಭೆಯಲ್ಲಿ ಟಿಕೆಟ್ ಸಿಗಬಹುದು. ಪಕ್ಷ ಅಧಿಕೃತವಾಗಿ ಘೋಷಿಸಿದ ನಂತರ ಬಹುಶಃ ಟಿಕೆಟ್ ಹಂಚುವ ಕೆಲಸಕ್ಕೆ ಉಪ್ಪಿ ಮುಂದಾಗಬಹುದು. ಇದಕ್ಕೆಲ್ಲಾ ಉತ್ತರ 18 ರಂದು ಸಿಗಲಿದೆ.

ಅಭಿಮಾನಿಗಳಿಂದ ಮನವಿ

''ಈ ಬಾರಿಯಾದರೂ ಯಾವುದೇ ಗೊಂದಲವಿಲ್ಲದೇ ಸ್ಪಷ್ಟ ನಿಲುವಿನೊಂದಿಗೆ ಬನ್ನಿ. ಬಹಳಷ್ಟು ಜನರ ವಿಶ್ವಾಸ ಗಳಿಸಿದ ನೀವೂ ನಿಮ್ಮದೇ ಗೊಂದಲದಿಂದ ಬರೀ ಮಾತಷ್ಟೆ ಅನಿಸುವಂತಾಗಿದೆ. ಇದು ನನ್ನ ವಿನಂತಿ ಅಷ್ಟೇ'' ಎಂದು ಕೆಲವರು ಮನವಿ ಮಾಡುತ್ತಿದ್ದಾರೆ. ''ಅಣ್ಣ ಈ ಬಾರಿ ಏನೇ ಇದ್ದರೂ ನಿಮ್ಮ ಇರುವಿಕೆಯಲ್ಲಿ ಸ್ವತಃ ನೀವೇ ಖುದ್ದಾಗಿ ಎಲ್ಲವನ್ನು ಮಾಡಿ ನನ್ನ ಬೆಂಬಲ ಕೂಡ ನಿಮಗೆ ನಿಮ್ಮ ಹೊರತು ಎಲ್ಲರೂ ಡೋಂಗಿಗಳೇ'' ಎನ್ನುತ್ತಿದ್ದಾರೆ.