ಬೆಳ್ಳಿತೆರೆಯ ಹಿರಿಯ ಅಭಿನೇತ್ರಿ ಮೈನಾವತಿ ಇನ್ನಿಲ್ಲ

ಶನಿವಾರ (ನ.10) ಬೆಳಗ್ಗೆ ಹೃದಯಾಘಾತವಾಗಿ ಅವರು ಕೊನೆಯುಸಿರೆಳೆದಿದ್ದಾರೆ. ಅವರಿಗೆ 78 ವರ್ಷ ವಯಸ್ಸಾಗಿತ್ತು.

ನಾಯಕಿಯಾಗಿ ಚಿತ್ರರಂಗಕ್ಕೆ ಅಡಿಯಿಟ್ಟ ಮೈನಾವತಿ ಅವರು ಕನ್ನಡ, ತಮಿಳು ಹಾಗೂ ತೆಲುಗು ಚಿತ್ರರಂಗದಲ್ಲಿ 100ಕ್ಕೂ ಅಧಿಕ ಚಿತ್ರಗಳಲ್ಲಿ ಅಭಿನಯಿಸಿದ್ದಾರೆ.

ವರನಟ ಡಾ. ರಾಜ್ ಕುಮಾರ್ ಅವರೊಂದಿಗೆ ಹಲವಾರು ಚಿತ್ರಗಳಲ್ಲಿ ಮೈನಾವತಿ ಅವರು ಅಭಿನಯಿಸಿದ್ದಾರೆ. ಅಬ್ಬಾ ಈ ಹುಡುಗಿ, ಸೋದರಿ, ಕಚದೇವಯಾನಿ, ರಾಯರ ಸೊಸೆ, ನಾನೇ ಭಾಗ್ಯವತಿ, ಅನುರಾಧ, ಅನ್ನಪೂರ್ಣ, ಸರ್ವಜ್ಞಮೂರ್ತಿ, ಅಮ್ಮ, ಮುತ್ತೈದೆ ಭಾಗ್ಯ, ಒಬ್ಬರಿಗಿಂತ ಒಬ್ಬರು ಸೇರಿದಂತೆ ಮುಂತಾದ ಚಿತ್ರಗಳಲ್ಲಿ ಮೈನಾವತಿ ಅಭಿನಯಿಸಿದ್ದಾರೆ.

ಕಿರುತೆರೆಯಲ್ಲಿ ಬಿಜಿಯಾಗಿದ್ದ ತಮ್ಮ ಪುತ್ರ ಶ್ಯಾಮಸುಂದರ್ ಅವರನ್ನು ಕಳೆದುಕೊಂಡ ನೋವು ಮೈನಾವತಿ ಅವರನ್ನು ಕಡೆ ದಿನಗಳಲ್ಲಿ ಕಾಡುತ್ತಿತ್ತು. ಅವರ ನಿಧನಕ್ಕೆ ಕನ್ನಡ ಚಿತ್ರರಂಗ ಕಂಬನಿ ಮಿಡಿದಿದೆ. (ಏಜೆನ್ಸೀಸ್)