Yash 19 : ಯಶ್ ಮುಂದಿನ ಚಿತ್ರಕ್ಕೆ ಯಶ್ ಅವರೇ ನಿರ್ಮಾಪಕರಂತೆ; ಬ್ಯಾನರ್ ಹೆಸರೇನು?

ಯಶ್ ಬ್ಯಾನರ್ ಹೆಸರೇನು?

ಯಶ್ ತಾವು ಚಿತ್ರ ನಿರ್ಮಾಣ ಸಂಸ್ಥೆಯನ್ನು ಸ್ಥಾಪಿಸುತ್ತಿರುವ ಕುರಿತಾಗಿ ಎಲ್ಲಿಯೂ ಸಹ ಅಧಿಕೃತವಾಗಿ ಘೋಷಣೆ ಮಾಡಿಲ್ಲ. ಆದರೆ ಕಳೆದ ಹಲವಾರು ದಿನಗಳಿಂದ ಯಶ್ ಬ್ಯಾನರ್ ಆರಂಭಿಸಲಿದ್ದಾರೆ ಎಂಬ ಸುದ್ದಿ ಇತ್ತು. ಆದರೆ ಇದೀಗ ಈ ಸುದ್ದಿಗೆ ಹೊಸದಾಗಿ ಯಶ್ ಬ್ಯಾನರ್ ಹೆಸರು ಹೀಗಿರಲಿದೆ ಎಂಬ ವಿಷಯವೂ ಸೇರಿಕೊಂಡಿದೆ. ಹೌದು, 'ಆಯ್ರಾ ಪ್ರೊಡಕ್ಷನ್ ಹೌಸ್' ಎಂಬ ಹೆಸರಿನಡಿಯಲ್ಲಿ ಯಶ್ ಚಿತ್ರ ನಿರ್ಮಾಣಕ್ಕೆ ಇಳಿಯಲಿದ್ದಾರೆ, ಇದೇ ಬ್ಯಾನರ್ ಅಡಿಯಲ್ಲಿ ಯಶ್ ಮುಂದಿನ ಚಿತ್ರ 'ಯಶ್ 19' ಮೂಡಿಬರಲಿದೆ ಎಂಬ ಸುದ್ದಿ ಸದ್ಯ ಹರಿದಾಡುತ್ತಿವೆ. ಆಯ್ರಾ ಎಂಬುದು ಯಶ್ ಹಾಗೂ ರಾಧಿಕಾ ಯಶ್ ಪುತ್ರಿಯ ಹೆಸರು.

ರಾಧಿಕಾ ಪಂಡಿತ್ ನಿರ್ಮಾಪಕಿಯಾಗಬಹುದು

ಒಂದುವೇಳೆ ವೈರಲ್ ಆಗುತ್ತಿರುವ ಸುದ್ದಿಯ ಪ್ರಕಾರ 'ಆಯ್ರಾ ಪ್ರೊಡಕ್ಷನ್ ಹೌಸ್' ನಿಜವಾಗಿಯೂ ಆರಂಭಗೊಂಡರೆ ಯಶ್ ಪತ್ನಿ ರಾಧಿಕಾ ಯಶ್ ನಿರ್ಮಾಕಿಯಾಗುವುದು ಬಹುತೇಕ ಖಚಿತ ಎನ್ನಬಹುದು. ನಮ್ಮ ಕನ್ನಡ ನಟರು ಸ್ಥಾಪಿಸಿದ ಚಿತ್ರ ನಿರ್ಮಾಣ ಸಂಸ್ಥೆಗಳನ್ನು ಅವರ ಧರ್ಮಪತ್ನಿಯರು ನೋಡಿಕೊಳ್ಳುವ ರೂಢಿ ಇದ್ದು, ಪಾರ್ವತಮ್ಮ ರಾಜ್‌ಕುಮಾರ್, ಅಶ್ವಿನಿ ಪುನೀತ್ ರಾಜ್‌ಕುಮಾರ್ ಹಾಗೂ ಪ್ರಿಯಾ ಸುದೀಪ್ ರೀತಿಯೇ ರಾಧಿಕಾ ಯಶ್ ಸಹ ನಿರ್ಮಾಪಕಿಯಾಗಿ ಬಡ್ತಿ ಪಡೆಯುವ ಸಾಧ್ಯತೆಗಳು ಹೆಚ್ಚಿವೆ.

ಇದಾದ್ರೂ ನಿಜವಾಗ್ಲಿ ಎಂದ ಯಶ್ ಫ್ಯಾನ್ಸ್

ಇನ್ನು ಕೆಜಿಎಫ್ ಬಳಿಕ ಯಶ್ ಯಾವ ಚಿತ್ರದಲ್ಲಿ ಅಭಿನಯಿಸಲಿದ್ದಾರೆ ಎಂಬ ಕುತೂಹಲ ಚಿತ್ರ ರಸಿಕರಲ್ಲಿ, ಅದರಲ್ಲಿಯೂ ಯಶ್ ಅಭಿಮಾನಿಗಳಲ್ಲಿ ಮನೆ ಮಾಡಿದೆ. ಈ ಚಿತ್ರದ ಕುರಿತಾಗಿ ಈ ರೀತಿಯ ಸುದ್ದಿಗಳು ಈಗಾಗಲೇ ಹಲವಾರು ಬಾರಿ ಹರಿದಾಡಿದ್ದು, ಈ ಸುದ್ದಿಯಾದರೂ ನಿಜವಾಗಲಿ ಎಂದು ಸಿನಿ ರಸಿಕರು ಹಾಗೂ ಯಶ್ ಅಭಿಮಾನಿಗಳು ಆಶಿಸಿದ್ದಾರೆ.