ಹುಟ್ಟುಹಬ್ಬ ಆಚರಣೆ: ಅಭಿಮಾನಿಗಳಿಗೆ ವಿಶೇಷ ಸಂದೇಶ ಕೊಟ್ಟ ಯಶ್

ನಿಮ್ಮ, ನಿಮ್ಮ ಕುಟುಂಬದ ಆರೋಗ್ಯ ಮುಖ್ಯ: ಯಶ್

'ನನಗೆ ನಿಮ್ಮ ಆರೋಗ್ಯ, ನಿಮ್ಮ ಕುಟುಂಬದವರ ಆರೋಗ್ಯ ಹೆಚ್ಚು ಮುಖ್ಯ, ಹಾಗಾಗಿ ಈ ಬಾರಿ ಗುಂಪು ಗೂಡಿ ಹುಟ್ಟುಹಬ್ಬ ಆಚರಿಸುವ ಬದಲಿಗೆ, ತಾವುಗಳು ಎಲ್ಲಿ ಇರುತ್ತೀರೋ ಅಲ್ಲಿಂದಲೇ ಹುಟ್ಟುಹಬ್ಬಕ್ಕೆ ಶುಭ ಹಾರೈಸಿ, ಸಾಮಾಜಿಕ ಜಾಲತಾಣದಲ್ಲಿ ಸಂದೇಶ ಕಳಿಸಿ' ಎಂದಿದ್ದಾರೆ ಯಶ್.

ಟೀಸರ್ ನೋಡಿ ಆನಂದಿಸಿ, ಹರಸಿ: ಯಶ್

ಹುಟ್ಟುಹಬ್ಬದ ದಿನವೇ ಹೊಂಬಾಳೆ ಫಿಲಮ್ಸ್‌ ಯೂಟ್ಯೂಬ್ ಚಾನೆಲ್‌ನಲ್ಲಿ ಕೆಜಿಎಫ್ 2 ಸಿನಿಮಾದ ಟೀಸರ್ ಬಿಡುಗಡೆ ಆಗಲಿದ್ದು, ಟೀಸರ್ ಅನ್ನು ನೋಡಿ ಆನಂದಿಸಿ, ಪ್ರತಿಕ್ರಿಯಿಸಿ ಎಂದು ಮನವಿ ಮಾಡಿದ್ದಾರೆ ನಟ ಯಶ್.

'ಮುಂಚೆ ನನ್ನ ಹುಟ್ಟುಹಬ್ಬಕ್ಕೆ ಹೆಚ್ಚು ಮಹತ್ವ ನೀಡುತ್ತಿರಲಿಲ್ಲ'

'ನನ್ನ ಹುಟ್ಟುಹಬ್ಬಕ್ಕೆ ನಾನು ಹೆಚ್ಚು ಮಹತ್ವ ಕೊಡುತ್ತಿರಲಿಲ್ಲ. ಆದರೆ ನೀವೆಲ್ಲರೂ ಪ್ರೀತಿಯಿಂದ ನನ್ನ ಹುಟ್ಟುಹಬ್ಬ ಆಚರಿಸಲು ಪ್ರಾರಂಭಿಸಿದ ಮೇಲೆಯೇ ನಾನು ಹುಟ್ಟುಹಬ್ಬಕ್ಕೆ ಮಹತ್ವ ನೀಡಲು ಆರಂಭಿಸಿದೆ. ನನ್ನ ಹುಟ್ಟುಹಬ್ಬದಂದು ನಿಮ್ಮನ್ನೆಲ್ಲಾ ಹತ್ತಿರದಿಂದ ನೋಡಬಹುದಲ್ಲ ಎಂಬುದು ನನ್ನ ಖುಷಿಯೂ ಆಗಿತ್ತು. ಆದರೆ ಈಗ ಪರಿಸ್ಥಿತಿ ಬೇರೆಯೇ ಇದೆ' ಎಂದು ಬೇಸರವ್ಯಕ್ತಪಡಿಸಿದ್ದಾರೆ ನಟ ಯಶ್.

ಬೇರೆ ರಾಜ್ಯಗಳಿಂದಲೂ ಬಂದಿದ್ದ ಅಭಿಮಾನಿಗಳು

ಕಳೆದ ಬಾರಿ ಹುಟ್ಟುಹಬ್ಬಕ್ಕೆ ಬೇರೆ ಬೇರೆ ರಾಜ್ಯಗಳಿಂದ ಸಹ ಜನರು ಬಂದಿದ್ದರು ಎಂದಿರುವ ಯಶ್, ಬೇರೆ ರಾಜ್ಯಗಳ ಅಭಿಮಾನಿಗಳಿಗಾಗಿ ಮೇಲಿನ ಸಂದೇಶವನ್ನು ಇಂಗ್ಲೀಷ್‌ನಲ್ಲಿ ಸಹ ಹೇಳಿದ್ದಾರೆ. ಜನವರಿ 8 ರಂದು ಬೆಳಿಗ್ಗೆ 10:18 ಗೆ ಸರಿಯಾಗಿ ಕೆಜಿಎಫ್ 2 ಸಿನಿಮಾದ ಟೀಸರ್ ಬಿಡುಗಡೆ ಆಗಲಿದೆ. ಯಶ್ ಹುಟ್ಟುಹಬ್ಬಕ್ಕೆಂದು ಈ ಟೀಸರ್ ಅನ್ನು ಬಿಡುಗಡೆ ಮಾಡಲಾಗುತ್ತಿದೆ.