ಸಾಲದಲ್ಲಿ ಮುಳುಗಿದ್ದ ಪ್ರಭಾಸ್: ಬಾಲಯ್ಯನ ಮುಂದೆ ಗುಟ್ಟು ರಟ್ಟು

ಬಾಲಯ್ಯನ ಜೊತೆ ಪ್ರಭಾಸ್ ಮಾತುಕತೆ

'ಬಾಹುಬಲಿ' ಸಿನಿಮಾದ ಬಗ್ಗೆ ತಮಾಷೆಯಾಗಿ ಮಾತನಾಡುತ್ತಾ, 'ಛತ್ರಪತಿ' ಸಿನಿಮಾದ ಬಳಿಕ ನಾನು ರಾಜಮೌಳಿ ಮತ್ತೆ ಸಿನಿಮಾ ಮಾಡಬೇಕು ಎಂದುಕೊಂಡಿದ್ದೆವು. ನಾನು ಸಾಲದಲ್ಲಿ ಮುಳುಗಿದ್ದ ಕಾರಣ ಒಂದರ ಹಿಂದೊಂದು ಸಿನಿಮಾಗಳನ್ನು ಸಹಿ ಮಾಡುತ್ತಿದ್ದೆ. ಅದೇ ಸಮಯದಲ್ಲಿ ರಾಜಮೌಳಿ 'ಬಾಹುಬಲಿ' ಮಾಡೋಣ ಎಂದರು. ಆದರೆ 'ಬಾಹುಬಲಿ' ಮುಗಿವ ವರೆಗೆ ಯಾವುದೂ ಸಿನಿಮಾ ಒಪ್ಪಿಕೊಳ್ಳಬಾರದು ಎಂದುಬಿಟ್ಟರು'' ಎಂದಿದ್ದಾರೆ ಪ್ರಭಾಸ್.

ಬಾಲಯ್ಯನ ಮುಂದೆ ಸಾಲದ ಕತೆ ಹೇಳಿದ ಪ್ರಭಾಸ್

ಆದರೆ ನಾನು ಸಾಲದಲ್ಲಿದ್ದಿದ್ದರಿಂದ ಒಂದರ ಹಿಂದೊಂದು ಸಿನಿಮಾ ಒಪ್ಪಿಕೊಳ್ಳುತ್ತಿದ್ದೆ. 'ರೆಬಲ್' ಸಿನಿಮಾ ಮುಗಿಸಿದ ಬಳಿಕ ರಾಜಮೌಳಿಗೆ ಫೋನ್ ಮಾಡಿ, 'ಬಾಹುಬಲಿ' ಪ್ರಾರಂಭವಾಗಲು ಇನ್ನೂ ಸಮಯ ಇದೆಯಲ್ಲ ಈ ಗ್ಯಾಪ್‌ನಲ್ಲಿ ಒಂದು ಸಿನಿಮಾ ಮಾಡಿಕೊಂಡು ಬಿಡುತ್ತೇನೆ ಸಾಲಗಳು ಜಾಸ್ತಿ ಇವೆ ಎಂದೆ. ರಾಜಮೌಳಿ ಓಕೆ ಎಂದರು ಆಗ 'ಮಿರ್ಚಿ' ಸಿನಿಮಾ ಪ್ರಾರಂಭ ಮಾಡಿದೆ'' ಎಂದಿದ್ದಾರೆ ಪ್ರಭಾಸ್. ಅಂದಹಾಗೆ ಮಿರ್ಚಿ ಸಿನಿಮಾವನ್ನು ಪ್ರಭಾಸ್ ಸಹ ಒಡೆತನದ ಯುವಿ ಕ್ರಿಯೇಶನ್‌ನಿಂದ ನಿರ್ಮಾಣ ಮಾಡಲಾಗಿದೆ. ಆ ಸಿನಿಮಾ ಹಿಟ್ ಆಗಿ ದೊಡ್ಡ ಮಟ್ಟದ ಲಾಭವನ್ನೇ ಪ್ರಭಾಸ್‌ ಹಾಗೂ ಅವರ ಗೆಳೆಯರಿಗೆ ತಂದುಕೊಟ್ಟಿತು.

ಪ್ರಭಾಸ್ ಸಾಲದ ಬಗ್ಗೆ ಸುದ್ದಿ

ಪ್ರಭಾಸ್‌ ಸಾಲ ಮಾಡಿದ್ದಾರೆ ಎಂಬ ಸುದ್ದಿ ಇತ್ತೀಚೆಗೆ ಮತ್ತೆ ಹರಿದಾಡುತ್ತಿದೆ. ಹೈದರಾಬಾದ್‌ನ ನ್ಯಾಷನಲ್ ಬ್ಯಾಂಕೊಂದರಲ್ಲಿ ಪ್ರಭಾಸ್ 21 ಕೋಟಿ ಸಾಲ ಮಾಡಿದ್ದಾರೆ ಎಂದು ಹೇಳಲಾಗುತ್ತಿದ್ದು, ಇದಕ್ಕೆ ಸಂಬಂಧಿಸಿದ್ದು ಎನ್ನಲಾದ ಕೆಲವು ದಾಖಲೆಗಳು ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿವೆ. ಆದರೆ ಇದನ್ನು ಪ್ರಭಾಸ್ ಅಭಿಮಾನಿಗಳು ನಿರಾಕರಿಸಿದ್ದಾರೆ. ನೂರಾರು ಕೋಟಿ ಸಂಭಾವನೆ ಪಡೆವ ನಟನಿಗೆ 21 ಕೋಟಿ ದೊಡ್ಡದಲ್ಲ, ಇದು ತೆರಿಗೆ ಉಳಿಸಲು ಮಾಡಿಕೊಂಡಿರುವ ವ್ಯವಸ್ಥೆ ಇರಬಹುದು ಎಂಬ ಮಾತುಗಳು ಕೇಳಿ ಬರುತ್ತಿವೆ.

ಪ್ರಭಾಸ್ ನಟನೆಯ ಮುಂಬರುವ ಸಿನಿಮಾಗಳು

ಸಿನಿಮಾಗಳ ವಿಷಯಕ್ಕೆ ಬರುವುದಾದರೆ, ನಟ ಪ್ರಭಾಸ್ ನಟನೆಯ 'ಆದಿಪುರುಷ್' ಸಿನಿಮಾ ಬಿಡುಗಡೆಗೆ ರೆಡಿಯಾಗಿದೆ. ಆದರೆ ಸಿನಿಮಾದ ಟೀಸರ್‌ಗೆ ಭಾರಿ ಟೀಕೆಗಳು ವ್ಯಕ್ತವಾದ ಕಾರಣ ಸಿನಿಮಾ ಸಿಜಿಐ ಅನ್ನು ಬದಲಾಯಿಸಲಾಗುತ್ತಿದೆ. ಪ್ರಶಾಂತ್ ನೀಲ್ ನಿರ್ದೇಶನದ 'ಸಲಾರ್' ಸಿನಿಮಾದಲ್ಲಿ ಪ್ರಭಾಸ್ ನಟಿಸುತ್ತಿದ್ದು, ಈ ಸಿನಿಮಾ ಸೆಪ್ಟೆಂಬರ್‌ ವೇಳೆಗೆ ತೆರೆಗೆ ಬರಲಿದೆ. ನಾಗ್ ಅಶ್ವಿನ್ ನಿರ್ದೇಶನದ ಸಿನಿಮಾದಲ್ಲಿಯೂ ಪ್ರಭಾಸ್ ನಟಿಸುತ್ತಿದ್ದು ಈ ಸಿನಿಮಾದಲ್ಲಿ ದೀಪಿಕಾ ಪಡುಕೋಣೆ ನಾಯಕಿ. ಇದೀಗ ಮಾರುತಿ ನಿರ್ದೇಶನದ ಸಿನಿಮಾ ಹಾಗೂ ಸುಕುಮಾರ್ ಜೊತೆಗೆ ಒಂದು ಸಿನಿಮಾಕ್ಕೂ ಪ್ರಭಾಸ್ ಸೈ ಎಂದಿದ್ದಾರೆ.