ನನ್ನ ಕುಟುಂಬದ ಕಾರಣಕ್ಕೆ ನನ್ನನ್ನು ದೂರ ಇಡಲಾಗಿದೆ: ಬಿಗ್‌ಬಾಸ್‌ನಲ್ಲಿ ಶಮಿತಾ ಕಣ್ಣೀರು

ಅವರೊಟ್ಟಿಗೆ ಗೆಳತಿಯಾಗಿ ಇರಲಾರೆ: ಶಮಿತಾ

ನಿಶಾಂತ್‌ ಜೊತೆಗಿನ ಜಗಳದ ಬಗ್ಗೆ ಮತ್ತೊಬ್ಬ ಸಹ ಸ್ಪರ್ಧಿ ರಾಕೇಶ್‌ ಜೊತೆ ಮಾತನಾಡುತ್ತಾ, ''ಆ ರೀತಿಯ ಜನರೊಟ್ಟಿಗೆ ಸ್ನೇಹಿತರಾಗಿ ಹೇಗೆ ಉಳಿಯಲು ಸಾಧ್ಯ? ಯಾರೊಂದಿಗೂ ಜಗಳ ಮಾಡಬೇಡ ಎಂದು ನೀನು ನನಗೆ ಹೇಳಿದ್ದೆ. ನಾನೂ ಸಹ ಹಾಗೆಯೇ ಇರಲು ಯತ್ನಿಸುತ್ತಿದ್ದೇನೆ. ಬಾಯಿ ಮುಚ್ಚಿಕೊಂಡು ಬದುಕುತ್ತಿದ್ದೇನೆ. ಇನ್ನು ಮುಂದೆ ನನಗೆ ಹೀಗೆ ಇರಲು ಸಾಧ್ಯವಿಲ್ಲ. ನಿಶಾಂತ್, ದಿವ್ಯಾ ಅಗರ್ವಾಲ್ ಅಂಥಹವರೊಟ್ಟಿಗೆ ಗೆಳತಿಯಾಗಿ ಇರಲು ನನಗೆ ಸಾಧ್ಯವಿಲ್ಲ'' ಎನ್ನುತ್ತಾ ಕಣ್ಣೀರು ಹಾಕಿದ್ದಾರೆ ಶಮಿತಾ ಶೆಟ್ಟಿ.

''ನಾನು ಸಿನಿಮಾದವಳಾದ್ದರಿಂದ ಭಿನ್ನವಾಗಿ ನೋಡಲಾಗುತ್ತಿದೆ''

''ಈ ಮನೆಯಲ್ಲಿ ಕ್ಲಾಸ್ ಆಧಾರದ ಮೇಲೆ ವಿಭಾಗಗಳು ಆಗಿಬಿಟ್ಟಿವೆ. ನಾನು ಸಿನಿಮಾ ರಂಗದಿಂದ ಬಂದಿದ್ದೇನೆ. ಸಿನಿಮಾ ಕುಟುಂಬದಿಂದ ಬಂದಿದ್ದೇನೆ (ಶೆಟ್ಟಿ ಕುಟುಂಬ) ನಾನು ನಟಿ, ನಾನು ಕ್ಲಾಸಿ ಎಂಬ ಕಾರಣಕ್ಕೆ ನನ್ನನ್ನು ಭಿನ್ನವಾಗಿ ನೋಡಲಾಗುತ್ತಿದೆ. ನಾನು ಸಿನಿಮಾ ಜಗತ್ತಿನ ಬಗ್ಗೆ ಮಾತನಾಡುತ್ತೇನೆ, ನನಗೆ ಅವಕಾಶ ಕೊಟ್ಟ ಜನರ ಬಗ್ಗೆ ಮಾತನಾಡಿದ್ದೇನೆ. ನನಗೆ ಅವಕಾಶ ಕೊಟ್ಟ ಜನ ಹೊರಗಿದ್ದಾರೆ. ಈ ಮನೆಯ ಜನರು ನನಗೆ ಅವಕಾಶ ಕೊಟ್ಟಿಲ್ಲ'' ಎಂದು ಕಣ್ಣೀರು ಹಾಕಿದ್ದಾರೆ ನಟಿ ಶಿಲ್ಪಾ ಶೆಟ್ಟಿ.

ಶಿಲ್ಪಾ ಶೆಟ್ಟಿ ಬಗ್ಗೆ ಶಮಿತಾ ಶೆಟ್ಟಿ ಮಾತು

ಕೆಲವು ದಿನಗಳ ಹಿಂದಷ್ಟೆ ಅಕ್ಕ ಶಿಲ್ಪಾ ಶೆಟ್ಟಿಯ ಬಗ್ಗೆ ಮಾತನಾಡಿ ಕಣ್ಣೀರು ಹಾಕಿದ್ದರು ಶಮಿತಾ ಶೆಟ್ಟಿ, ''ಶಿಲ್ಪಾ ಶೆಟ್ಟಿಯ ತಂಗಿಯಾಗಿರುವುದು ಸುಲಭದ ಕಾರ್ಯವಲ್ಲ. ಎಲ್ಲರೂ ನನ್ನನ್ನು ಅಕ್ಕನಿಗೆ ಹೋಲಿಸಿ ಮಾತನಾಡುತ್ತಿದ್ದರು. ಅದು ನನಗೆ ಬಹಳ ಸಮಸ್ಯೆ ಕೊಟ್ಟಿದೆ. ಆದರೆ ನಾನು ಅಂಥಹಾ ಅಕ್ಕನನ್ನು ಪಡೆಯಲು ಪುಣ್ಯ ಮಾಡಿದ್ದೆ. ಆಕೆಯಿಂದಾಗಿ ನಾನು ಇಷ್ಟು ವರ್ಷ ಸಿನಿಮಾರಂಗದಲ್ಲಿ ಇರಲು ಸಾಧ್ಯವಾಯಿತು. ಆದರೆ ಆಕೆಯ ನೆರಳಿನಿಂದ ಆಚೆ ಬಂದು ನಾನು ನನ್ನದೇ ಆದ ಗುರುತನ್ನು ಪಡೆದುಕೊಂಡೆ'' ಎಂದಿದ್ದಾರೆ ಶಮಿತಾ ಶೆಟ್ಟಿ.

ಶಿಲ್ಪಾ ಶೆಟ್ಟಿ ಸಹೋದರಿ ಶಮಿತಾ ಶೆಟ್ಟಿ

ನಟಿ ಶಮಿತಾ ಶೆಟ್ಟಿ, ಶಿಲ್ಪಾ ಶೆಟ್ಟಿಯ ಸಹೋದರಿ. ಶಿಲ್ಪಾ ಶೆಟ್ಟಿಯ ಪತಿ ರಾಜ್ ಕುಂದ್ರಾ ಜುಲೈ 19ರಂದು ಮುಂಬೈ ಪೊಲೀಸರಿಂದ ಬಂಧನಕ್ಕೆ ಒಳಗಾಗಿದ್ದಾರೆ. ರಾಜ್ ಕುಂದ್ರಾ ಅಶ್ಲೀಲ ವಿಡಿಯೋಗಳನ್ನು ನಿರ್ಮಾಣ ಮಾಡಿ ಅವನ್ನು ವಿದೇಶಿ ಸಂಸ್ಥೆಗಳ ಸಹಾಯದ ಮೂಲಕ ಹಾಟ್‌ಶಾಟ್ಸ್‌ ಎಂಬ ಆಪ್‌ನಲ್ಲಿ ಮಾರಾಟಕ್ಕಿಡುತ್ತಿದ್ದರು ಆ ಮೂಲಕ ಪ್ರತಿದಿನ ಲಕ್ಷಾಂತರ ಹಣವನ್ನು ರಾಜ್ ಕುಂದ್ರಾ ಗಳಿಸಿದ್ದರು ಎಂದು ಮುಂಬೈ ಪೊಲೀಸರು ಆರೋಪಿಸಿದ್ದಾರೆ. ರಾಜ್ ಕುಂದ್ರಾ ಈವರೆಗೆ ಜೈಲಿನಲ್ಲಿಯೇ ಇದ್ದು, ಕುಂದ್ರಾರ ಜಾಮೀನು ಅರ್ಜಿ ವಿಚಾರಣೆ ಮುಂದಕ್ಕೆ ಹೋಗಿದೆ. ಇಷ್ಟು ದಿನ ಬಹುತೇಕ ಮೌನದಲ್ಲಿದ್ದ ಶಿಲ್ಪಾ ಶೆಟ್ಟಿ ಇದೀಗ ತಮ್ಮ ರಿಯಾಲಿಟಿ ಶೋ ಜಡ್ಜ್‌ ಕಾರ್ಯಕ್ಕೆ ಮರಳಿದ್ದಾರೆ.