Pathaan Review in Kannada : 4 ವರ್ಷಗಳ ಬಳಿಕ ಮತ್ತೆ ಹೀರೊ ಆದ ಶಾರುಖ್: ಜಾನ್.. ದೀಪಿಕಾ.. ಸಲ್ಮಾನ್ ಸೂಪರ್!

'ಪಠಾಣ್' ಸಿನಿಮಾದ ಥೀಮ್ ಏನು?

'ಪಠಾಣ್' ಸಿನಿಮಾ ಮೇಲೆ ಬಾಲಿವುಡ್ ಮಂದಿ ಅಷ್ಟೇ ಅಲ್ಲ. ಇಡೀ ವಿಶ್ವವೇ ಎದುರು ನೋಡುತ್ತಿತ್ತು. ನಾಲ್ಕು ವರ್ಷಗಳ ಬಳಿಕ ಕಮ್‌ಬ್ಯಾಕ್ ಮಾಡುತ್ತಿರುವ ಕಿಂಗ್ ಖಾನ್ ಎಂಟ್ರಿ ಹೇಗಿರುತ್ತೆ ಎಂದು ಎದುರು ನೋಡುತ್ತಿದ್ದವರಿಗೆ ಈಗ ಉತ್ತರ ಸಿಕ್ಕಿದೆ. ಅಂದ್ಹಾಗೆ 'ಪಠಾಣ್' ಸಿನಿಮಾ ಪಕ್ಕಾ ಮಸಾಲಾ ಎಂಟರ್‌ಟೈನರ್ ಸಿನಿಮಾ. ದುಬಾರಿ ಆಕ್ಷನ್ ಸೀಕ್ವೆನ್ಸ್, ಹೀರೊ ವಿಲನ್ ನಡುವಿನ ಘರ್ಷಣೆ, ರೊಮ್ಯಾನ್ಸ್ ಈ ಸಿನಿಮಾದ ಹೈಲೈಟ್. ಈ ಸಿನಿಮಾ ಬಾಲಿವುಡ್ ಪ್ರೇಕ್ಷಕರನ್ನು ಮತ್ತೆ ಥಿಯೇಟರ್‌ನತ್ತ ಕರೆತರುವಲ್ಲಿ ಯಶಸ್ವಿಯಾಗುವ ಎಲ್ಲಾ ಸಾಧ್ಯತೆಗಳೂ ಇವೆ.

'ಪಠಾಣ್' ಕಥೆಯೇನು?

ಮಾಜಿ ಸೈನಿಕ (ಶಾರುಖ್ ಖಾನ್) ಸ್ಪೈ ಆಗಿ ಬದಲಾಗಿದ್ದಾನೆ. ಆತನ ಅಂಡರ್‌ಕವರ್ ಹೆಸರು 'ಪಠಾಣ್'. ಈತನ ಎದುರಾಳಿಯಾಗಿ ಜಿಮ್ (ಜಾನ್ ಅಬ್ರಾಹಂ). ಮಾಜಿ RAW ಎಜೆಂಟ್ ಆಗಿರೋ ಜಿಮ್ ತನ್ನದೇ ದೇಶದ ವಿರುದ್ಧ ತಿರುಗಿಬಿದ್ದಿರುತ್ತಾನೆ. ಆರ್ಟಿಕಲ್ 370ಯನ್ನು ತೆಗೆದು ಹಾಕಿದ ಬಳಿಕ ಈತನನ್ನು ಪಾಕಿಸ್ತಾನಿ ಅಧಿಕಾರಿ ಸಂಪರ್ಕಿಸುತ್ತಾನೆ. ಇದರ ಜೊತೆನೇ ಐಎಸ್‌ಐ ಎಜೆಂಟ್ ಆಗಿ ರುಬೈ (ದೀಪಿಕಾ ಪಡುಕೋಣೆ) ಕಾಣಿಸಿಕೊಂಡಿದ್ದಾರೆ. ಇಲ್ಲಿಂದ ಈ ಮೂವರ ನಡುವೆ ಒಂದು ಗೇಮ್ ನಡೆಯುತ್ತೆ. ಮುಂದೇನಾಗುತ್ತೆ ಅನ್ನೋದು ಸಿನಿಮಾದ ಕಥೆ.

'ಪಠಾಣ್' ನಿರ್ದೇಶನ ಹೇಗಿದೆ?

ಸ್ಪೈ ಥ್ರಿಲ್ಲರ್ ಸಿನಿಮಾಗಳನ್ನು ನಿರ್ದೇಶನ ಮಾಡುವುದರಲ್ಲಿ ಬಾಲಿವುಡ್ ನಿರ್ದೇಶಕ ಸಿದ್ಧಾರ್ಥ್ ಆನಂದ್ ಎಕ್ಸ್‌ಪರ್ಟ್. ಈ ಸಿನಿಮಾವನ್ನು ಗೆಲ್ಲಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಸಿಕ್ಕಾಪಟ್ಟೆ ಆಕ್ಷನ್, ಚೇಸಿಂಗ್ ಸೀನ್, ಡೆತ್ ಮತ್ತು ಡೇಂಜರ್‌ ಸ್ಟಂಟ್‌ಗಳು, ಕಾರು, ಬೈಕ್, ಹೆಲಿಕಾಪ್ಟರ್‌ಗಳ ಕ್ಲ್ಯಾಶ್ ಈ ಸಿನಿಮಾದಲ್ಲಿ ಎದ್ದು ಕಾಣುತ್ತೆ. ಈ ಎಲ್ಲಾ ಸೀನ್‌ಗಳು ಕೂಡ ಶಿಳ್ಳೆ ಹೊಡೆಯುವಂತಿವೆ.

ಶಾರುಖ್ ಖಾನ್ ಎಂಟ್ರಿ ಹೇಗಿದೆ?

ಸಿನಿಮಾದಲ್ಲಿ ಶಾರುಖ್ ಖಾನ್ ಎಂಟ್ರಿ ಮೊಟ್ಟ ಮೊದಲ ದೃಶ್ಯದಿಂದ ಗಮನ ಸೆಳೆಯುತ್ತೆ. 58 ವರ್ಷದ ನಟ ಫಿಟ್ನೆಸ್, ಸಿಕ್ಸ್ ಪ್ಯಾಕ್ ಬಾಡಿ, ಪವರ್‌ಫುಲ್ ಕಣ್ಣುಗಳು ಪ್ರೇಕ್ಷಕರಿಗೆ ಕಿಕ್ ಕೊಡುತ್ತವೆ. ಶಾರುಖ್ ಖಾನ್ ಜೊತೆ ಸಿನಿಪ್ರಿಯರಿಗೆ ಕಿಕ್ ಕೊಡುವ ಮತ್ತೊಬ್ಬ ನಟ ಜಾನ್ ಅಬ್ರಾಹಂ. ಜಿಮ್ ಪಾತ್ರದಲ್ಲಿ ಮಸಲ್‌ಮ್ಯಾನ್ ಜಾನ್ ಅಬ್ರಾಹಂ ಗಮನ ಸೆಳೆಯುತ್ತಾರೆ. ಕೆಲವೊಮ್ಮೆ ಶಾರುಖ್ ಖಾನ್ ಪಾತ್ರಕ್ಕೆ ಸೈಡು ಹೊಡೆಯುವಂತೆ ನಟಿಸಿದ್ದಾರೆ. ದೀಪಿಕಾ ಪಡುಕೋಣೆ ಈ ಸಿನಿಮಾದಲ್ಲಿ ತುಂಬಾನೇ ಸುಂದರವಾಗಿ ಕಾಣಿಸುತ್ತಾರೆ. ಶಾರುಖ್ ಹಾಗೂ ದೀಪಿಕಾ ಕೆಮಿಸ್ಟ್ರಿ ಮತ್ತೊಮ್ಮೆ ಪ್ರೇಕ್ಷಕರ ಗಮನ ಸೆಳೆಯುತ್ತಿದೆ.

ಸಲ್ಮಾನ್ ಖಾನ್ ಹೈಲೈಟ್

'ಪಠಾಣ್' ಸಿನಿಮಾದ ಮತ್ತೊಂದು ಹೈಲೈಟ್ ಸಲ್ಮಾನ್ ಖಾನ್. ಅತಿಥಿ ಪಾತ್ರದಲ್ಲಿ ಎಂಟ್ರಿ ಕೊಟ್ಟರೂ ಸಲ್ಮಾನ್ ಖಾನ್ ಖದರ್‌ಗೆ ಶಿಳ್ಳೆಗಳು ಬೀಳುತ್ತವೆ. ವೈಆರ್‌ಎಫ್ ಸ್ಪೈ ಥ್ರಿಲ್ಲರ್‌ ಯುನಿವರ್ಸಿಟಿಯಲ್ಲಿ ಶಾರುಖ್ ಹಾಗೂ ಸಲ್ಮಾನ್ ಖಾನ್ ಒಟ್ಟಿಗೆ ಕಾಣಿಸಿಕೊಂಡಿದ್ದು, ಸಿನಿಮಾಗೆ ಹೊಸ ಇಮೇಜ್ ಕೊಟ್ಟಿದೆ. ಕೊನೆಯದಾಗಿ 'ಪಠಾಣ್' ಸಿನಿಮಾ ಪಕ್ಕಾ ಮಾಸ್ ಮಸಾಲಾ ಎಂಟರ್‌ಟೈನರ್ ಸಿನಿಮಾ.