Varisu trailer: ಮಾಸ್‌ಗೆ ಮಾಸ್, ಕ್ಲಾಸ್‌ಗೆ ಕ್ಲಾಸ್: ವಾರಸ್ದಾರನಾಗಿ ದಳಪತಿ ದಂಗಲ್

ಸಿಂಪಲ್ ಕಥೆ ಭರ್ಜರಿ ಟ್ರೀಟ್‌ಮೆಂಟ್

ಟ್ರೈಲರ್ ನೋಡುತ್ತಿದ್ದರೆ 'ವಾರೀಸು' ರೊಟೀನ್ ಸ್ಟೋರಿ ಎನ್ನುವುದು ಗೊತ್ತಾಗುತ್ತಿದೆ. ಟ್ರೈಲರ್‌ನಲ್ಲಿ ದೊಡ್ಡ ಬ್ಯುಸಿನೆಸ್‌ಮನ್ ಫ್ಯಾಮಿಲಿಯ ಚಿಕ್ಕ ಮಗನಾಗಿ ವಿಜಯ್‌ನ ತೋರಿಸಲಾಗಿದೆ. ಆತ ತನ್ನ ಮನೆಯಿಂದ ದೂರಾಗಿ ತನ್ನದೇ ಲೋಕದಲ್ಲಿ ಜೀವನ ನಡೆಸುತ್ತಿರುತ್ತಾನೆ. ತನ್ನ ಕುಟುಂಬಕ್ಕೆ ಬ್ಯುಸಿನೆಸ್‌ನಲ್ಲಿ ಶತ್ರುಗಳು ಹುಟ್ಟಿಕೊಂಡಿದ್ದಾರೆ ಎಂದು ತಿಳಿದು ವಾರಸ್ದಾರನಾಗಿ ವಿಜಯ್ ವಾಪಸ್ ಬಂದು ಆ ಸಮಸ್ಯೆಗಳನ್ನು ಬಗೆಹರಿಸುತ್ತಾನೆ. ಇನ್ನು ಮನಸ್ತಾಪದಿಂದ ದೂರಾದ ಕುಟುಂಬ ಸದಸ್ಯರನ್ನು ಒಟ್ಟಿಗೆ ಸೇರಿಸುತ್ತಾನೆ.

ಕಂಪ್ಲೀಟ್ ಫ್ಯಾಮಿಲಿ ಎಂಟರ್‌ಟೈನರ್

ಕಥೆ ಸಿಂಪಲ್ ಅನ್ನಿಸಿದರೂ ಅದರ ಟ್ರೀಟ್‌ಮೆಂಟ್ ಚೆನ್ನಾಗಿ ಇರುವಂತೆ ಕಾಣುತ್ತಿದೆ. ವಿಜಯ್ ಅಭಿನಯ ಅಭಿಮಾನಿಗಳಿಗೆ ಇಷ್ಟವಾಗಲಿದೆ. ಮನೆಯ ಹಿರಿಯನಾಗಿ ಶರತ್ ಕುಮಾರ್ ನಟಿಸಿದ್ದಾರೆ. ವಿಜಯ್ ಸಹೋದರರ ಪಾತ್ರಗಳಲ್ಲಿ ತೆಲುಗು ನಟ ಶ್ರೀಕಾಂತ್ ಹಾಗೂ ಶ್ಯಾಮ್ ಮಿಂಚಿದ್ದಾರೆ. ನಾಯಕಿಯಾಗಿ ರಶ್ಮಿಕಾ ಮಂದಣ್ಣ ಸಾಥ್ ಸಿಕ್ಕಿದೆ. ವಿಲನ್ ಆಗಿ ಪ್ರಕಾಶ್ ರಾಜ್ ಅಬ್ಬರಿಸಿದ್ದಾರೆ. ಒಂದು ಅವಿಭಕ್ತ ಕುಟುಂಬದ ಕಥೆ ಇದೆ. ಹಿರಿಯ ನಟಿ ಜಯಸುಧ ಡೈಲಾಗ್‌ಗಳು ಸಂಬಂಧಗಳ ಮಹತ್ವವನ್ನು ತಿಳಿಸುತ್ತದೆ.

ದಳಪತಿ ಡೈಲಾಗ್ಸ್, ಆಕ್ಷನ್ ಧಮಾಕ

ಬರೋಬ್ಬರಿ 250 ಕೋಟಿ ಬಜೆಟ್‌ನಲ್ಲಿ 'ವಾರೀಸು' ಸಿನಿಮಾ ನಿರ್ಮಾಣ ಆಗಿದೆ ಎನ್ನಲಾಗ್ತಿದೆ. ಅದರಲ್ಲಿ ವಿಜಯ್‌ಗೆ ಸಂಭಾವನೆಯಾಗಿ 100 ಕೋಟಿ ಸಿಕ್ಕಿದೆಯಂತೆ. ಇನ್ನು ಎಲ್ಲಾ ಕಮರ್ಷಿಯಲ್ ಎಲಿಮೆಂಟ್ಸ್ ಮಿಕ್ಸ್ ಮಾಡಿ ಆಕ್ಷನ್ ಪ್ಯಾಕ್ಟ್ಡ್ ಟ್ರೈಲರ್ ಕಟ್ ಮಾಡಿದ್ದಾರೆ. ದಳಪತಿ ಆಕ್ಷನ್ ಧಮಾಕಾ ಮತ್ತು ಡೈಲಾಗ್ಸ್ ಅಭಿಮಾನಿಗಳಿಗೆ ಕಿಕ್ ಕೊಡ್ತಿದೆ. "ಪವರ್ ಸೀಟ್‌ನಲ್ಲಿ ಅಲ್ಲ, ಅದರಲ್ಲಿ ಕೂರುವವನಲ್ಲಿ ಇರುತ್ತದೆ" ಎನ್ನುವ ಡೈಲಾಗ್ಸ್ ವೈರಲ್ ಆಗಿದೆ.

ವಿಜಯ್ ಸಂಕ್ರಾಂತಿ ವಿನ್ನರ್?

ಸಂಕ್ರಾಂತಿ ಹಬ್ಬದ ಸಂಭ್ರಮದಲ್ಲಿ ಜನವರಿ 12ಕ್ಕೆ 'ವಾರೀಸು' ಸಿನಿಮಾ ತೆರೆಗೆ ಬರ್ತಿದೆ. ಈ ಬಾರಿ ಸುಗ್ಗಿ ಹಬ್ಬಕ್ಕೆ ತಮಿಳಿನ 2, ತೆಲುಗಿನ 2 ದೊಡ್ಡ ಸಿನಿಮಾಗಳು ರಿಲೀಸ್ ಆಗ್ತಿವೆ. 'ವಾರೀಸು' ಟ್ರೈಲರ್ ನೋಡಿದ ಅಭಿಮಾನಿಗಳು ಸುಗ್ಗಿ ಹಬ್ಬಕ್ಕೆ ಹೇಳಿ ಮಾಡಿಸಿದ ಸಿನಿಮಾ ಇದು ಎನ್ನುತ್ತಿದ್ದಾರೆ. ಸಂಕ್ರಾಂತಿಗೆ ಅಜಿತ್ ನಟನೆಯ 'ತುನಿವು' ಸಿನಿಮಾ ಕೂಡ ಬರ್ತಿದೆ. ಹಾಗಾಗಿ ಎರಡು ಸಿನಿಮಾಗಳಲ್ಲಿ ಯಾವ ಸಿನಿಮಾ ಗೆಲ್ಲುತ್ತದೆ ಎನ್ನುವ ಲೆಕ್ಕಾಚಾರ ನಡೀತಿದೆ.