ಜಪಾನಿಯರ ಮನಗೆದ್ದ ರಾಮ್‌-ಭೀಮ್ ಬ್ರೊಮ್ಯಾನ್ಸ್: ಹಳೇ ದಾಖಲೆ ಮುರಿದು ನಂಬರ್ ವನ್ ಸ್ಥಾನದತ್ತ RRR ಓಟ!

'ಬಾಹುಬಲಿ' ದಾಖಲೆ ಮುರಿದ 'RRR'

ಹೌದು ಜಪಾನ್‌ನಲ್ಲೂ 'RRR' ಸಿನಿಮಾ ಸಖತ್ ಸದ್ದು ಮಾಡಿದೆ. ಅಂದಾಜು 18 ಕೋಟಿಗೂ ಅಧಿಕ ಕಲೆಕ್ಷನ್ ಮಾಡಿ ಸಿನಿಮಾ ಮುನ್ನುಗ್ಗುತ್ತಿದೆ. ಜಪಾನ್‌ ಬಾಕ್ಸಾಫೀಸ್‌ನಲ್ಲಿ ಅತಿ ಹೆಚ್ಚು ಕಲೆಕ್ಷನ್ ಮಾಡಿದ ಸಿನಿಮಾಗಳ ಪಟ್ಟಿಯಲ್ಲಿ 2ನೇ ಸ್ಥಾನಕ್ಕೇರಿದೆ. 'ತ್ರೀ ಈಡಿಯಟ್ಸ್', 'ಬಾಹುಬಲಿ' ದಾಖಲೆ ಮುರಿದು ಸಿನಿಮಾ ಎಲ್ಲರ ಹುಬ್ಬೇರಿಸಿದೆ.

ನಂಬರ್‌ ವನ್ ಸ್ಟಾನಕ್ಕೇರುತ್ತಾ ಚಿತ್ರ?

ಜಪಾನ್‌ನಲ್ಲಿ ಅತಿಹೆಚ್ಚು ಕಲೆಕ್ಷನ್ ಮಾಡಿದ ಭಾರತದ ಸಿನಿಮಾ ಅಂದರೆ ಅದು ಸೂಪರ್ ಸ್ಟಾರ್ ರಜನಿಕಾಂತ್ ನಟನೆಯ 'ಮುತ್ತು'. 90ರ ದಶಕದಲ್ಲೇ ಈ ಸಿನಿಮಾ ಜಪಾನಿಯರ ಮನಗೆದ್ದು ಸಂಚಲನ ಸೃಷ್ಟಿಸಿತ್ತು. ರಾಜಮೌಳಿ 'RRR' ಸಿನಿಮಾ 'ಮುತ್ತು' ಸಿನಿಮಾ ದಾಖಲೆ ಮುರಿಯುತ್ತಾ ಎನ್ನುವ ಚರ್ಚೆ ಶುರುವಾಗಿದೆ. ಕೆಲವರು ಅವತ್ತಿನ ಕಾಲಕ್ಕೆ 'ಮುತ್ತು' ದಾಖಲೆ ಮುಂದೆ 'RRR' ಕಲೆಕ್ಷನ್ ಏನೇನು ಅಲ್ಲ ಎನ್ನುತ್ತಿದ್ದಾರೆ. ಈಗಾಗಲೇ 2 ಲಕ್ಷಕ್ಕೂ ಹೆಚ್ಚು ಜನ ಜಪಾನ್‌ನಲ್ಲಿ 'RRR' ಸಿನಿಮಾ ನೋಡಿದ್ದಾರೆ.

'RRR' ಸೀಕ್ವೆಲ್ ಪ್ಲ್ಯಾನ್

ರಾಜಮೌಳಿ ಸದ್ಯ ಯಾವುದೇ ಹೊಸ ಸಿನಿಮಾ ಕೈಗೆತ್ತಿಕೊಂಡಿಲ್ಲ. 'RRR' ಸಕ್ಸಸ್ ನಂತರ ಅದರ ಸೀಕ್ವೆಲ್ ಮಾಡುವ ಬಗ್ಗೆ ಚರ್ಚೆ ನಡೀತಿದೆ. ಈಗಾಗಲೇ ವಿಜಯೇಂದ್ರ ಪ್ರಸಾದ್ ರಾಮ್‌-ಭೀಮ್ ಕಥೆ ಮುಂದುವರೆಸುವ ಕೆಲಸ ಶುರು ಮಾಡಿದ್ದಾರೆ. 'RRR' ಸಿನಿಮಾ ನೋಡಿದವರಿಗೆ ಸೀಕ್ವೆಲ್ ಮಾಡಲು ಹೇಗೆ ಸಾಧ್ಯ ಎನ್ನುವ ಅನುಮಾನ ಮೂಡಿತ್ತು. ಆದರೆ ರಾಜಮೌಳಿ ಮತ್ತವರ ತಂಡ ಅದನ್ನು ಮಾಡಿ ತೋರಿಸುವ ಹಠಕ್ಕೆ ಬಿದ್ದಿದ್ದಾರೆ.

ಮಹೇಶ್ ಬಾಬುಗೆ ಆಕ್ಷನ್ ಕಟ್

ಬಹಳ ವರ್ಷಗಳಿಂದ ರಾಜಮೌಳಿ ನಿರ್ದೇಶನದಲ್ಲಿ ಮಹೇಶ್ ಬಾಬು ನಟಿಸುವ ಬಗ್ಗೆ ಮಾತುಗಳು ಕೇಳಿಬರುತ್ತಿತ್ತು. 'RRR' ನಂತರ ಆ ಚಿತ್ರವನ್ನು ಜಕ್ಕಣ್ಣ ಕೈಗೆತ್ತಿಕೊಳ್ಳುತ್ತಿದ್ದಾರೆ. ಅಫೀಷಿಯಲ್ ಆಗಿ ಸಿನಿಮಾ ಘೋಷಣೆ ಆಗದೇ ಇದ್ದರೂ ಸಂದರ್ಶನಗಳಲ್ಲಿ ಈ ಬಗ್ಗೆ ಮಾಹಿತಿ ನೀಡಿದ್ದಾರೆ. ಪ್ಯಾನ್‌ ವರ್ಲ್ಡ್ ಲೆವೆಲ್‌ನಲ್ಲಿ ಈ ಆಕ್ಷನ್ ಅಡ್ವೆಂಚರಸ್ ಸಿನಿಮಾ ಮೂಡಿ ಬರಲಿದೆ.