ಅಮೀರ್ ಸತ್ಯಮೇವ ಜಯತೆಗೆ ಭರ್ಜರಿ ಪ್ರತಿಕ್ರಿಯೆ

ಭಾನುವಾರ (ಮೇ 6) ಬೆಳಗ್ಗೆ 11ಕ್ಕೆ ಪ್ರಸಾರವಾದ ಮೊದಲ ಸಂಚಿಕೆಯಲ್ಲಿ ಅಮೀರ್ ಆಯ್ದುಕೊಂಡ ಟಾಪಿಕ್ 'ಹೆಣ್ಣು ಭ್ರೂಣ ಹತ್ಯೆ'. ಭ್ರೂಣಹತ್ಯೆ ಎದುರಿಸಿದ ಹಲವು ಅಮ್ಮಂದಿರ ಕರುಣಾಜನಕ ಕಥೆಗಳು, ಆಘಾತಕಾರಿ ಅಂಕಿಅಂಶಗಳು, ವೈದ್ಯರು ಹಾಗೂ ತಜ್ಞರ ಸಂದರ್ಶನಗಳು...ಹೀಗೆ ಕಾರ್ಯಕ್ರಮವನ್ನು ಬಹಳ ಲವಲವಿಕೆಯಿಂದ ಅಮೀರ್ ನಡೆಸಿಕೊಟ್ಟರು.

ಒಟ್ಟು ತೊಂಬತ್ತು ನಿಮಿಷಗಳ ಈ ರಿಯಾಲಿಟಿ ಶೋ ಮೂಲಕ ಅಮೀರ್ ಕೆಲವು ಸತ್ಯ ಸಂಗತಿಗಳನ್ನು ಅನಾವರಣಗೊಳಿಸಿದರು. ಮೊದಲ ಸಂಚಿಕೆ ಮುಗಿಯುತ್ತಿದ್ದಂತೆ ಅಮೀರ್‌ಗೆ ದೇಶದ ಮೂಲೆಮೂಲೆಗಳಿಂದ ಶ್ಲಾಘನೆಯ ಸುರಿಮಳೆಯಾಯಿತು. ಅವರ ಟ್ವಿಟ್ಟರ್ ಖಾತೆಗೆ ಅಭಿನಂದನೆಗಳ ಮಹಾಪೂರವೇ ಹರಿದುಬಂದಿದೆ.

'ಸತ್ಯಮೇವ ಜಯತೆ' ಕಮರ್ಷಿಯಲ್ ಟಿವಿ ಶೋ ಅಲ್ಲ. ಇದೊಂದು ಚಳವಳಿ. ಜನರ ಮನೋಭಾವ, ಅವರ ಚಿಂತನೆಗಳನ್ನು ಈ ಶೋ ಮೂಲಕ ಬದಲಾಯಿಸಲು ಹೊರಟಿದ್ದೇನೆ. ಪ್ರತಿ ಸಂಚಿಕೆಯೂ ದೇಶದ ಜ್ವಲಂತ ಸಮಸ್ಯೆಗಳ ಮೇಲೆ ಬೆಳಕು ಚೆಲ್ಲಲಿದೆ ಎಂದಿದ್ದಾರೆ ಅಮೀರ್ ಖಾನ್. (ಏಜೆನ್ಸೀಸ್)