ಬೆಂಗಾಲಿ ನಟಿ ಪಾಯಲ್ ಆತ್ಮಹತ್ಯೆಗೆ ಮಾನಸಿಕ ಖಿನ್ನತೆಯೇ ಕಾರಣ?

ಸಿಲಿಗುರಿ ಚರ್ಚ್ ರಸ್ತೆಯಲ್ಲಿರುವ ಹೊಟೇಲ್

ದಕ್ಷಿಣ ಕೋಲ್ಕತ್ತಾದ ಸಿಲಿಗುರಿ ಚರ್ಚ್ ರಸ್ತೆಯಲ್ಲಿರುವ ಹೊಟೇಲ್ ನಲ್ಲಿ ಮಂಗಳವಾರದಂದು ರೂಮ್ ಪಡೆದಿದ್ದ ಪಾಯಲ್ ಅವರು ಗುರುವಾರಂದು ರೂಮ್ ಖಾಲಿ ಮಾಡುವುದಾಗಿ ಹೇಳಿದ್ದರು. ರೂಮಿನೊಳಗೆ ಹೋದ ಬಳಿಕ ರೂಮ್ ಸರ್ವೀಸ್ ಗೆ ಕರೆ ಮಾಡಿರಲಿಲ್ಲ ಎಂದು ಹೋಟೆಲ್ ಸಿಬ್ಬಂದಿ ಹೇಳಿದ್ದಾರೆ.

ಗುರುವಾರದಂದು ಚೆಕ್ ಔಟ್ ಆಗಬೇಕಿತ್ತು

ಬುಧವಾರ ಸಂಜೆ ವೇಳೆಗೆ ಹೋಟೆಲ್ ಸಿಬ್ಬಂದಿಗೆ ಅನುಮಾನ ಬಂದು, ಬಾಗಿಲು ಬಡಿದು ನೋಡಿದಾಗ, ಪಾಯಲ್ ಅವರು ಫ್ಯಾನಿಗೆ ನೇಣು ಬಿಗಿದುಕೊಂಡಿದ್ದ ಸ್ಥಿತಿಯಲ್ಲಿ ಕಂಡು ಬಂದಿದ್ದಾರೆ. ಗುರುವಾರದಂದು ಹೋಟೆಲ್ ನಿಂದ ಚೆಕ್ ಔಟ್ ಆಗುವುದಾಗಿ ತಿಳಿಸಿದ್ದರು. ಮೇಲ್ನೋಟಕ್ಕೆ ಆತ್ಮಹತ್ಯೆ ಎಂದು ಕಂಡು ಬಂದಿದೆ ಎಂದು ಸಿಲಿಗುರಿ ಪೊಲೀಸರು ಹೇಳಿದ್ದಾರೆ.

ಸೆ. 14ಕ್ಕೆ ಹೊಸ ಚಿತ್ರದ ರಿಲೀಸ್ ನಿಗದಿಯಾಗಿದೆ

36 ವರ್ಷ ವಯಸ್ಸಿನ ಪಾಯಲ್ ಅವರು 'ಎಕ್ ಮಶೇರ್ ಸಾಹಿತ್ಯಾ' 'ಚೋಕರ್ ತರಾ ತುಯಿ', 'ಗೋಯೆಂಡಾ ಗಿನ್ನಿ' ಮುಂತಾದ ಟೆಲಿವಿಷನ್ ಸರಣಿಗಳು, ರಿಯಾಲಿಟಿ ಶೋಗಳಲ್ಲಿ ಕಾಣಿಸಿಕೊಂಡಿದ್ದರು. ಸೆಪ್ಟೆಂಬರ್ 14ಕ್ಕೆ ಅವರ ಹೊಸ ಚಿತ್ರ ಕೇಲೋ ತೆರೆಗೆ ಬರಲು ಸಿದ್ಧವಾಗಿದೆ.

ವಿವಾಹ ವಿಚ್ಛೇದನವೇ ಕಾರಣವಾಯಿತೆ?

ಇತ್ತೀಚೆಗೆ ವಿವಾಹ ವಿಚ್ಛೇದನ ಪಡೆದುಕೊಂಡಿದ್ದ ಪಾಯಲ್ ಅವರು ತಮ್ಮ 2 ವರ್ಷ ವಯಸ್ಸಿನ ಮಗನ ಜೊತೆ ತಂದೆ ಮನೆಯಲ್ಲಿ ವಾಸವಿದ್ದರು. ಮಾನಸಿಕ ಖಿನ್ನತೆಯಿಂದ ಮನೆಯವರಿಗೆ ಹೇಳದೆ ಸಿಲಿಗುರಿಗೆ ಬಂದಿದ್ದರು. ಅವರ ಸಾವಿನ ಕಾರಣ ಹಾಗೂ ಇನ್ನಿತರ ವಿವರಗಳು ಮರಣೋತ್ತರ ಪರೀಕ್ಷೆ ನಂತರ ತಿಳಿಯಲಿದೆ ಸಿಲಿಗುರಿ ಡಿಸಿಪಿ ಗೌರಬ್ ಲಾಲ್ ಹೇಳಿದ್ದಾರೆ.