ಶರ್ಮಾಗೆ ಮಸ್ತ್ ಚಮಕ್ ಕೊಟ್ಟ ಸುದೀಪ್!

'ಟಿಆರ್‌ಪಿ' ನರೇಂದ್ರ ಬಾಬು ಶರ್ಮಾ

"ಈ ಬಿಕನಾಸಿ ಕಾರ್ಯಕ್ರಮ ಯಾರು ನೋಡ್ತಾರೆ" ಅಂತ ಹೇಳಿಯೂ, ಬಿಗ್ ಬಾಸ್‌ಗೇ ಧಮ್ಕಿ ಹಾಕಿಯೂ ನರೇಂದ್ರ ಬಾಬು ಶರ್ಮಾ ಮನೆಯಲ್ಲಿ ಉಳಿದುಕೊಂಡಿರುವುದು ನಿಜಕ್ಕೂ 8ನೇ ವಂಡರ್. ಹಾಳಾಗಿ ಹೋಗ್ತೀಯಾ, ಮುಂಡಾಮೋಚ್ಕೊಂಡು ಹೋಗ್ತೀಯಾ ಎಂದು ಎಷ್ಟೇ ಬೈಸಿಕೊಂಡರೂ ಬಿಗ್ ಬಾಸಿಗೆ ಬೇಕಾಗಿರುವುದೂ ಅದೇ. ನನ್ನನ್ನು ಹಾಕಿಕೊಂಡಿದ್ದಕ್ಕೆ ಟಿಆರ್‌ಪಿ ಹೆಚ್ಚಾಗಿದೆ ಎಂದು ಶರ್ಮಾ ಹೇಳಿದ್ದರಲ್ಲಿ ಅತಿಶಯೋಕ್ತಿಯಿಲ್ಲ. ಶರ್ಮಾರನ್ನು ಮನೆಯಿಂದ ಹೊರಗೆ ಕಳಿಸಿ ಪಾಪ್ಯುಲಾರಿಟಿ ಉಳಿಸಿಕೊಳ್ಳಲು ಬಿಗ್ ಬಾಸಿಗೆ ಸಾಧ್ಯವೆ? ಡೌಟ್.

ಅತಿಯಾದ ಮಾತುಗಾರ ಅರುಣ್ ಸಾಗರ್

ನಾಟಕೀಯತೆಯನ್ನೇ ಸಹಜವಾಗಿ ಮಾಡುವ ಪ್ರತಿಭಾವಂತ ನಟ ಅರುಣ್ ಸಾಗರ್ ಎಲಿಮಿನೇಷನ್ನಿಗೆ ನಾಮಿನೇಟ್ ಆಗಿದ್ದು ಕಡಿಮೆ. ಅತಿಯಾದ ಮಾತುಗಾರಿಕೆ, ನಿಷ್ಠೆಯಿಂದಾಗಿ ಗಮನ ಸೆಳೆದಿದ್ದರೂ ಮನೆಯಲ್ಲಿಯೇ ಕೆಲವರ ವಿರೋಧ ಕಟ್ಟಿಕೊಂಡಿರುವುದು ನಿಜ. ಆದರೆ, ಯಾವುದೇ ಟಾಸ್ಕನ್ನು ಲೀಲಾಜಾಲವಾಗಿ ಮಾಡುವ ಅರುಣ್ ಸಾಗರ್ ಬಿಗ್ ಬಾಸ್ ಗೆಲ್ಲುವ ಪ್ರಬಲ ಸ್ಪರ್ಧಾಳು. ಅರುಣ್‌ಗೆ ಸರಿಸಾಟಿಯೆಂದರೆ ಜಗಳಗಂಟಿ ಎಂದು ಬಿರುದು ಪಡೆದಿರುವ ಚಂದ್ರಿಕಾ ಮಾತ್ರ.

ಸ್ಟ್ರಾಂಗೂ ಅಲ್ಲ ವೀಕೂ ಅಲ್ಲ ನಿಕಿತಾ ತುಕ್ರಲ್

61 ದಿನಗಳಾದರೂ 61 ಕನ್ನಡ ಪದಗಳನ್ನು ಸರಿಯಾಗಿ ಕಲಿಯದ ನಿಕಿತಾ ತುಕ್ರಲ್ ಅತ್ತ ಸ್ಟ್ರಾಂಗೂ ಅಲ್ಲ, ಅತ್ತ ವೀಕೂ ಅಲ್ಲ ಎಂಬಂತಹ ಸ್ಪರ್ಧಾಳು. ಕನ್ನಡ ಬರುವುದಿಲ್ಲ ಮತ್ತು ನಾಟಕೀಯತೆ ಇಲ್ಲ ಎಂಬ ಅಂಶವೇ ನಿಕಿತಾ ಮೇಲೆ ಪ್ರೇಕ್ಷಕರಿಗೆ ಅನುಕಂಪ ಮೂಡುವಂತೆ ಮಾಡಿದೆ. ಒಟ್ಟಿನಲ್ಲಿ ಇಂಥವರೊಬ್ಬರು ಇರಲೇಬೇಕೆಂದು ನಿಕಿತಾ ಇನ್ನೂ ಉಳಿದುಕೊಂಡಿದ್ದಾರೆ.

ಇದ್ದಂತೂ ಇಲ್ಲದಿರುವ ವಿಜಯ ರಾಘವೇಂದ್ರ

ಅತ್ಯಂತ ಸುರಕ್ಷಿತ ಸ್ಪರ್ಧಾಳು ಎಂದು ಎಲ್ಲರಿಂದ ಹೊಗಳಿಸಿಕೊಂಡಿರುವ ವಿಜಯ ರಾಘವೇಂದ್ರ ಅವರಿಗೆ ಆ ಗುಣವೇ ದೌರ್ಬಲ್ಯವೆ ಎಂದು ಸುದೀಪ್ ಕೇಳಿದ್ದು ಸಮಂಜಸವಾಗಿತ್ತು. ಎಂದೂ ಹೆಚ್ಚಿನ ರಿಸ್ಕ್ ತೆಗೆದುಕೊಳ್ಳುವುದಿಲ್ಲ, ಕಾಲುಕೆರೆದು ಜಗಳಕ್ಕೆ ಹೋಗುವುದಿಲ್ಲ. ಒಟ್ಟಿನಲ್ಲಿ ಸ್ಪರ್ಧೆಯಲ್ಲಿ ಇದ್ದರೂ ಇಲ್ಲದಂತೆ ಇದ್ದಾರೆ ವಿಜಯ್. ಚಂದ್ರಿಕಾರಿಂದ ಕ್ಯಾರೆಕ್ಟರ್‌ಲೆಸ್ ಅಂತ ಕರೆಯಿಸಿಕೊಂಡಿದ್ದಾರೆ. ಅತಿಯಾದ ಒಳ್ಳೆಯದನ ತೋರಿಸುವುದು ಸ್ಪರ್ಧೆಯಲ್ಲಿ ತರವಲ್ಲ ಎಂದು ವಿಜಯ್ ರಾಘವೇಂದ್ರ ಇನ್ನಾದರೂ ಅರಿತುಕೊಳ್ಳಬೇಕು.

ಜಗತ್ ಜಗಳಗಂಟಿ ಚಂದ್ರಿಕಾ

ಬಿಗ್ ಬಾಸ್ ಮನೆಯಲ್ಲಿ ಇರುವ ಏಕೈಕ 'ಗಂಡಸು' ಎಂದು ಯೋಗರಾಜ್ ಭಟ್ಟರಿಂದ ಬಣ್ಣಿಸಿಕೊಂಡಿರುವ ಚಂದ್ರಿಕಾ ಮತ್ತೊಬ್ಬ ಪ್ರಬಲ ಸ್ಪರ್ಧಾಳು. ಆದರೆ, ತಮ್ಮೆಲ್ಲ ಶಕ್ತಿ, ಸಮಯವನ್ನೆಲ್ಲ ಜಗಳವಾಡುವುದರಲ್ಲಿ, ಕಣ್ಣೀರುಗರೆಯುವುದರಲ್ಲಿ, ಬಿಗ್ ಬಿಗಿಯಾಗಿ ಬಟ್ಟೆ ತೊಟ್ಟು ಅಸಹ್ಯವಾಗಿ ಕಾಣಿಸಿಕೊಳ್ಳುವುದರಲ್ಲಿ ವ್ಯಯಿಸಿಕೊಳ್ಳುತ್ತಿದ್ದಾರೆ. ಮಾತುಮಾತಿಗೂ ಮಗನ ಮೇಲೆ ಆಣೆ ಮಾಡುತ್ತ ನಗೆಪಾಟಲಿಗೀಡಾಗುತ್ತಿದ್ದಾರೆ. ಇದಿಷ್ಟು ಹೊರತುಪಡಿಸಿದರೆ ಅರುಣ್‌ಗೆ ಚಂದ್ರಿಕಾ ಸರಿಸಾಟಿಯಾಗಬಲ್ಲರು.

ಊಟದ ಜೊತೆ ಉಪ್ಪಿನಕಾಯಿ ಅನುಶ್ರೀ

ಕಳ್ಳ ಮಿಂಡ್ರಿ ಅಂತ ಶರ್ಮಾರಿಂದ ಅನ್ನಿಸಿಕೊಂಡಿರುವ ಅನುಶ್ರೀ ಊಟದ ಜೊತೆ ಉಪ್ಪಿನಕಾಯಿ ಇದ್ದಂತೆ. ಇದ್ದರೆ ಪರವಾಗಿಲ್ಲ, ಇಲ್ಲದಿದ್ದರೂ ತೊಂದರೆಯಿಲ್ಲ ಎಂಬಂತಹ ಸ್ಪರ್ಧಾಳು. ಪ್ರಬಲ ಕಂಟೆಂಡರ್ ಅಂತ ಯಾವತ್ತೂ ಅನ್ನಿಸಿಲ್ಲ. ಅನವಶ್ಯಕವಾಗಿ ಚೀರಾಡಿಕೊಂಡು, ಅಗತ್ಯವಿಲ್ಲದೆ ಕೂಗಾಡಿಕೊಂಡು, ಅವರಿವರ ಜೊತೆ ಹಾಳುಹರಟೆ ಹೊಡೆದುಕೊಂಡು ಬಿಗ್ ಬಾಸ್ ಮನೆಯಲ್ಲಿ ಕಾಲಕಳೆಯುತ್ತಿದ್ದಾರೆ. ಯಾವಾಗ ಹೊರಬರುತ್ತಾರೆ? ಗೊತ್ತಿಲ್ಲ.

ವೀಕೆಸ್ಟ್ ಸ್ಪರ್ಧಿ ಲೂಸ್ ಮಾದ ಯೋಗೇಶ್

ಬಿಗ್ ಬಾಸ್ ಮನೆಯಲ್ಲಿ ಹೊಕ್ಕ ಅತ್ಯಂತ ಬಲಹೀನ ವ್ಯಕ್ತಿ ಎಂದರೆ ಲೂಸ್ ಮಾದ ಯೋಗೇಶ್. ಹಳ್ಳಿ ಹುಡುಗ ರಾಜೇಶ್‌ಗಿಂತಲೂ ವೀಕ್ ಅಂತ ಕರೆದರೂ ಪರವಾಗಿಲ್ಲ. ಉಳಿದವರಲ್ಲಿ ಇರುವಂಥ ಜಾಣ್ಮೆಯಾಗಲಿ, ಸ್ಪರ್ಧಾಳುಗಳಲ್ಲಿ ಇರಬೇಕಾದಂತಹ ಸ್ಪಿರಿಟ್ ಆಗಲಿ ಇಲ್ಲವೇ ಇಲ್ಲ. ವೈಲ್ಡ್ ಕಾರ್ಡ್ ಎಂಟ್ರಿಯಾಗಿರುವ ಯೋಗೇಶ್‌ನಿಂದಾಗಿ ನಿಕಿತಾಗೂ ಹಿನ್ನಡೆಯಾದರೂ ಅಚ್ಚರಿಯಿಲ್ಲ. ಬರದೆಯಿದ್ದರೇ ಚೆನ್ನಾಗಿತ್ತು ಅಂತ ಅನ್ನಿಸಿದರೆ ಅಚ್ಚರಿಯಿಲ್ಲ.