ಈ ವೀಕೆಂಡ್ ನಲ್ಲಿ ಕಿರುತೆರೆ ಪ್ರೇಕ್ಷಕರಿಗೆ ಮಸ್ತ್ ಮನರಂಜನೆ

ಈ ವಾರದಿಂದ ಕನ್ನಡದ ಕೋಟ್ಯಧಿಪತಿ

ಪುನೀತ್ ರಾಜ್ ಕುಮಾರ್ ಸಾರಥ್ಯದಲ್ಲಿ ಮೂಡಿಬರುತ್ತಿರುವ ಕನ್ನಡದ ಕೋಟ್ಯಧಿಪತಿ ನಾಲ್ಕನೇ ಆವೃತ್ತಿ ಇಂದಿನಿಂದ ಆರಂಭವಾಗುತ್ತಿದೆ. ಇದೇ ಮೊದಲ ಬಾರಿಗೆ ಕಲರ್ಸ್ ಕನ್ನಡದ ವಾಹಿನಿಯಲ್ಲಿ ಈ ಶೋ ಪ್ರಸಾರವಾಗುತ್ತಿದ್ದು, ಶನಿವಾರ ಮತ್ತು ಭಾನುವಾರ ರಾತ್ರಿ 8 ಗಂಟೆಗೆ ಟೆಲಿಕಾಸ್ಟ್ ಆಗ್ತಿದೆ.

ಎರಡೂ ದಿನ ಹಂಸಲೇಖ ಸಂಚಿಕೆ

ನಾದಬ್ರಹ್ಮ ಅವರ ಹುಟ್ಟುಹಬ್ಬದ ಪ್ರಯುಕ್ತ ಜೀ ಕನ್ನಡದಲ್ಲಿ ಪ್ರಸಾರವಾಗುವ ಸರಿಗಮಪ ಸಿಂಗಿಂಗ್ ಕಾರ್ಯಕ್ರಮದಲ್ಲಿ ಎರಡೂ ದಿನವೂ ಹಂಸಲೇಖ ಹಾಡುಗಳ ಸಂಚಿಕೆ ಪ್ರಸಾರವಾಗಲಿದೆ. ಜೂನ್ 23 ಭಾನುವಾರ ಹಂಸಲೇಖ ಹುಟ್ಟುಹಬ್ಬ. ಹಂಸಲೇಖ ಅವರು 68 ವರ್ಷ ಪೂರೈಸಲಿದ್ದಾರೆ. 68 ವರ್ಷಕ್ಕೆ 68 ಸ್ಪರ್ಧಿಗಳನ್ನು ಕರೆಸಿ, ಅವರ ಕಡೆಯಿಂದ ಹಾಡು ಹಾಡಿಸಿ, ಹುಟ್ಟುಹಬ್ಬಕ್ಕೆ ಮರೆಯಲಾದ ಉಡುಗೊರೆಯನ್ನು ಸರಿಗಮಪ ತಂಡ ನೀಡಿದೆ.

ವೀಕೆಂಡ್ ವಿತ್ ರಮೇಶ್

ಜೀ ಕನ್ನಡದ ಮತ್ತೊಂದು ಸೂಪರ್ ಹಿಟ್ ಶೋ ವೀಕೆಂಡ್ ವಿತ್ ರಮೇಶ್ ಕಾರ್ಯಕ್ರಮದಲ್ಲಿ ಈ ವಾರ ಇಬ್ಬರು ಹಾಸ್ಯಕಲಾವಿದರು ಭಾಗವಹಿಸಲಿದ್ದಾರೆ. ಹಾಸ್ಯ ನಟ ಚಿಕ್ಕಣ್ಣ ಮತ್ತು ಹಿರಿಯ ಹಾಸ್ಯನಟ ಬಿರಾದರ್ ಸಾಧಕರ ಕುರ್ಚಿಯಲ್ಲಿ ಕುಳಿತುಕೊಂಡಿದ್ದಾರೆ. ಬಿರಾದರ್ ಅವರ ಎಪಿಸೋಡ್ ಶನಿವಾರ ಮತ್ತು ಚಿಕ್ಕಣ್ಣ ಎಪಿಸೋಡ್ ಭಾನುವಾರ ಮೂಡಿಬರಲಿದೆ.

ಪಂಚತಂತ್ರ ಸಿನಿಮಾ

ಇದೇ ಭಾನುವಾರ ಮಧ್ಯಾಹ್ನ 3 ಗಂಟೆಗೆ ಯೋಗರಾಜ್ ಭಟ್ ನಿರ್ದೇಶನದಲ್ಲಿ ರಿಲೀಸ್ ಆಗಿದ್ದ ಪಂಚತಂತ್ರ ಸಿನಿಮಾ ಪ್ರಸಾರವಾಗ್ತಿದೆ. ಚಿತ್ರಮಂದಿರದಲ್ಲಿ ಮಿಸ್ ಮಾಡಿಕೊಂಡಿದ್ದ ಪ್ರೇಕ್ಷಕರು, ಭಾನುವಾರ ಮಧ್ಯಾಹ್ನ ಆರಾಮಾಗಿ ಕೂತು ಮನೆಯಲ್ಲಿ ಈ ಸಿನಿಮಾ ನೋಡಬಹುದು.

ಮಜಾ ಟಾಕೀಸ್ ಪ್ರಿಯಾಂಕಾ ಉಪೇಂದ್ರ

ಕಲರ್ಸ್ ಸೂಪರ್ ವಾಹಿನಿಯಲ್ಲಿ ಪ್ರಸಾರವಾಗುವ ಕಾಮಿಡಿ ಟಾಕ್ ಶೋ ಮಜಾ ಟಾಕೀಸ್ ನಲ್ಲಿ ಶನಿವಾರ ಪ್ರಿಯಾಂಕಾ ಉಪೇಂದ್ರ ಅವರು ಭಾಗವಹಿಸಿದ್ದಾರೆ. ಕಳೆದ ವಾರ ಉಪೇಂದ್ರ ಅವರು ಭಾಗಿಯಾಗಿದ್ದರು. ಈ ವಾರ ಪ್ರಿಯಾಂಕಾ ಉಪೇಂದ್ರ ಬರ್ತಿದ್ದಾರೆ.