ಅಮಿತಾಬ್ ಜೋಡಿಯಾಗಿ ಶ್ರೀದೇವಿ ರೀ ಎಂಟ್ರಿ ?

ಮಿ. ಇಂಡಿಯಾ ಭಾಗ 2 ಮೂಲಕ ಶ್ರೀದೇವಿ ಚಿತ್ರರಂಗಕ್ಕೆ ರೀ ಎಂಟ್ರಿ ಕೊಡ್ತಾರೆ ಎನ್ನಲಾಗಿತ್ತು. ಆದರೆ, ಯಾಕೋ ಚಿತ್ರ ಇನ್ನು ಮೇಲೆಕ್ಕೆದ್ದಿಲ್ಲ. ಆದರೆ, ಪ್ರತಿಭಾವಂತ ನಿರ್ದೇಶಕ ಬಾಲ್ಕಿಗೆ ಕಾಲ್ ಶೀಟ್ ನೀಡಿರುವ ಶ್ರೀದೇವಿ, ಇಂಗ್ಲೀಷ್ ವಿಂಗ್ಲೀಷ್ ಚಿತ್ರಕ್ಕೆ ಸಹಿ ಹಾಕಿದ್ದಾರೆ.

ಅಮಿತಾಬ್ ಬಚ್ಚನ್ ಜೋಡಿಯಾಗಿ ಈ ಚಿತ್ರದಲ್ಲಿ ನಟಿಸುವ ಸಾಧ್ಯತೆಯಿದೆ. ಇಬ್ಬರು ಹೆಣ್ಣು ಮಕ್ಕಳ ತಾಯಿಯಾದ 47 ವರ್ಷದ ಶ್ರೀದೇವಿ, ನವರಸ ನಾಯಕಿಯಾಗಿ ಮೆರೆದವರು, ಅವರ ಅಭಿಮಾನಿಗಳು ಶ್ರೀದೇವಿ ರೀ ಎಂಟ್ರಿಗಾಗಿ ಕಾತುರದಿಂದ ಕಾದಿದ್ದಾರೆ.

ಪ್ರಥಮ ಬಾರಿಗೆ ಮಹಿಳಾ ನಿರ್ದೇಶಕಿ ಕೈ ಕೆಳಗೆ ಅಭಿನಯಿಸುತ್ತಿರುವ ಶ್ರೀದೇವಿ, 1997ರಲ್ಲಿ ಜುದಾಯಿ ಚಿತ್ರದ ನಂತರ ಹಿರಿತೆರೆಯತ್ತ ಮುಖ ಮಾಡಿರಲಿಲ್ಲ. ಪತಿ ಬೋನಿ ಕಪೂರ್ ಚಿತ್ರ ನಿರ್ಮಾಣದ ಬಗ್ಗೆ ಕೂಡಾ ಹೆಚ್ಚಾಗಿ ತಲೆ ಕೆಡಿಸಿಕೊಂಡಿರಲಿಲ್ಲ. ಮಾಲಿನಿ ಅಯ್ಯರ್ ಆಗಿ ಸಹಾರಾ ಟಿವಿಯಲ್ಲಿ ಕಾಣಿಸಿಕೊಂಡಿದ್ದು ಬಿಟ್ಟರೆ, ಶ್ರೀದೇವಿ ಮತ್ತೆ ಬಣ್ಣ ಹಚ್ಚಿರಲಿಲ್ಲ. ರೀ ಎಂಟ್ರಿ ಕೊಡುತ್ತಿರುವ ಶ್ರೀದೇವಿ, ಮಾಧುರಿಯಂತೆ ಕೋಟಿಗಟ್ಟಲೆ ಸಂಭಾವನೆ ಕೇಳಿಲ್ಲ ಎಂಬುದು ನಿರ್ಮಾಪಕರ ಪಾಲಿಗೆ ಸಿಹಿ ಸುದ್ದಿ.