ರಿಕ್ಷಾವಾಲಾ ಮಗನ ಮದುವೆಗೆ ನಟ ಅಮೀರ್ ಖಾನ್

ಬಾಲಿವುಡ್ ನಟ ಅಮೀರ್ ಖಾನ್ ಅವರನ್ನು ರಿಕ್ಷಾವಾಲಾ ಒಬ್ಬ ತನ್ನ ಮಗನ ಮದುವೆಗೆ ತಪ್ಪದೆ ಬರಬೇಕು ಎಂದು ಆಹ್ವಾನಿಸಿದ್ದಾನೆ. ವಾರಣಾಸಿಯಿಂದ ಮುಂಬೈಗೆ ಬಂದ 47ರ ಪ್ರಾಯದ ಲಖನ್ ಅವರು ಅಮೀರ್‌ರನ್ನು ಮದುವೆಗೆ ಆಹ್ವಾನಿಸಿದ್ದಾರೆ. ಮದುವೆಗೆ ತಪ್ಪದೆ ಬರುತ್ತೇನೆ ಎಂದು ಅಮೀರ್ ಕೈಕುಲುಕಿ ಕಳುಹಿಸಿದ್ದಾರೆ.

ಅಮೀರ್‌ಗೇನು ಲಖನ್ ದೂರದ ಸಂಬಂಧಿಯಲ್ಲ. ಎರಡು ವರ್ಷಗಳ ಹಿಂದಷ್ಟೇ ಈ ರಿಕ್ಷಾವಾಲಾ ಪರಿಚಯವಾಗಿತ್ತು. ಅಮೀರ್ ಆಗ '3 ಈಟಿಯಟ್ಸ್' ಚಿತ್ರದ ಪ್ರಚಾರದಲ್ಲಿದ್ದರು. ಯಾವುದೇ ಬಾಡಿಗಾರ್ಡ್ಸ್ ಇಲ್ಲದೆ ಉತ್ತರ ಭಾರತದಾದ್ಯಂತ ಅಮೀರ್ ಪ್ರಚಾರ ಕೈಗೊಂಡಿದ್ದರು. ಆಗ ಅಮೀರ್‌ಗೆ ಈ ಆಸಾಮಿ ಪರಿಚಯವಾಗಿ ತನ್ನ ರಿಕ್ಷಾದಲ್ಲಿ ವಾರಣಾಸಿಯನ್ನೆಲ್ಲಾ ಸುತ್ತಾಡಿಸಿ ಸುಸ್ತು ಮಾಡಿದ್ದ.

ಮೂರು ದಿನಗಳ ಪ್ರಚಾರದಲ್ಲಿ ಲಖನ್ ಜೊತೆಗೆ ಅಮೀರ್‌ಗೆ ಆತ್ಮೀಯ ಬಂಧವೇರ್ಪಟ್ಟಿತ್ತು. ಈ ಬಂಧವೇ ರಿಕ್ಷಾವಾಲಾರನ್ನು ಮುಂಬೈತನಕ ಕರೆತಂದಿತ್ತು. ತಮ್ಮ ಬಿಡುವಿಲ್ಲದ ಕೆಲಸಗಳ ನಡುವೆಯೂ ಲಖನ್‌ರನ್ನು ಪ್ರೀತಿಯಿಂದ ಬರಮಾಡಿಕೊಂಡ ಅಮೀರ್ ಮದುವೆಗೆ ಬರುವ ಭರವಸೆ ನೀಡಿದ್ದಾರೆ. (ಏಜೆನ್ಸೀಸ್)