'ಕಾಂತಾರ' ಹಿಂದಿ ರೀಮೆಕ್ ಬಗ್ಗೆ ರಿಷಬ್ ಶೆಟ್ಟಿ ಮಾತು: ತಮ್ಮ ಪಾತ್ರ ಯಾರು ಮಾಡಿದರೆ ಸೂಕ್ತ ಎಂದರು?

16ನೇ ದಿನ 4.10 ಕೋಟಿ ಕಲೆಕ್ಷನ್

'ಕಾಂತಾರ' ಹಿಂದಿ ವರ್ಷನ್ ನಿನ್ನೆ ಭಾರತದಲ್ಲಿ 4.10 ಕೋಟಿ ರೂ. ಕಲೆಕ್ಷನ್ ಮಾಡಿದೆ. ಶುಕ್ರವಾರ 2.75 ಕೋಟಿ ರೂ. ಗಳಿಸಿದ್ದ ಸಿನಿಮಾ ಮರುದಿನ ಅದಕ್ಕಿಂತ ಎರಡರಷ್ಟು ಗಳಿಕೆ ಕಂಡಿರುವುದು ವಿಶೇಷ. ಸಿನಿಮಾ ರಿಲೀಸ್ ಆದ 3ನೇ ವಾರದಲ್ಲಿ ಹೀಗೆ ಏಕಾಏಕಿ ಕಲೆಕ್ಷನ್ ಡಬಲ್ ಆಗುವುದು ಎಂದರೆ ತಮಾಷೆ ಮಾತಲ್ಲ. ಒಳ್ಳೆ ಕಂಟೆಂಟ್ ಇದ್ದರೆ ಮಾತ್ರ ಇಂತಹ ಮ್ಯಾಜಿಕ್ ನಡೆಯಲು ಸಾಧ್ಯ ಎಂದು ಕೆಲವರು ಹೇಳುತ್ತಿದ್ದಾರೆ.

ಬಾಲಿವುಡ್‌ಗೆ ರೀಮೇಕ್?

'ಕಾಂತಾರ' ಈಗಾಗಲೇ ಹಿಂದಿಗೆ ಡಬ್ ಆಗಿ ಸೂಪರ್ ಹಿಟ್ ಆಗ್ತಿದೆ. ದಿನದಿಂದ ದಿನಕ್ಕೆ ಸಿನಿಮಾ ನೋಡುವ ಪ್ರೇಕ್ಷಕರ ಸಂಖ್ಯೆ ಹೆಚ್ಚಾಗುತ್ತಿದೆ. ಹಾಗಾಗಿ ಚಿತ್ರ ಹಿಂದಿಗೆ ರೀಮೆಕ್ ಆಗುತ್ತಾ? ಎಂದರೆ ಇಲ್ಲ ಎಂದಿದ್ದಾರೆ ರಿಷಬ್ ಶೆಟ್ಟಿ. ಸಂದರ್ಶನಲ್ಲಿ ಈ ಬಗ್ಗೆ ಮಾತನಾಡಿರುವ ರಿಷಬ್, ಹಿಂದಿಗೆ ಸಿನಿಮಾ ಈಗಾಗಲೇ ಡಬ್ ಆಗಿದೆ. ಹಾಗಾಗಿ ರೀಮೆಕ್ ಅಗತ್ಯ ಇಲ್ಲ ಎಂದಿದ್ದಾರೆ. ಒಂದು ವೇಳೆ ರೀಮೆಕ್ ಮಾಡಿದರೆ ಯಾರು ನಿಮ್ಮ ಪಾತ್ರ ಸೂಕ್ತ ಎನ್ನುವ ಪ್ರಶ್ನೆಗೂ ಉತ್ತರಿಸಿದ್ದಾರೆ. "ಅಂತಹ ಪಾತ್ರಗಳನ್ನು ಮಾಡಲು ನಮ್ಮ ಮೂಲ ಮತ್ತು ಸಂಸ್ಕೃತಿಯನ್ನು ನಂಬಬೇಕು. ಹಿಂದಿ ಚಿತ್ರರಂಗದಲ್ಲಿ ನಾನು ಮೆಚ್ಚುವ ಅನೇಕ ದೊಡ್ಡ ನಟರಿದ್ದಾರೆ. ಆದರೆ ನನಗೆ ರಿಮೇಕ್‌ ಮಾಡುವುದರಲ್ಲಿ ಆಸಕ್ತಿ ಇಲ್ಲ" ಎಂದಿದ್ದಾರೆ.

200 ಕೋಟಿ ಗಡಿ ದಾಟಿದ ಕಲೆಕ್ಷನ್

ಈಗಾಗಲೇ 'ಕಾಂತಾರ' ಸಿನಿಮಾ ಒಟ್ಟು ಕಲೆಕ್ಷನ್ 200 ಕೋಟಿ ರೂ. ಗಡಿ ದಾಟಿರುವ ಸುಳಿವು ಸಿಗುತ್ತಿದೆ. ಸೆಪ್ಟೆಂಬರ್ 30ಕ್ಕೆ ಕನ್ನಡದಲ್ಲೇ ವಿಶ್ವದಾದ್ಯಂತ ಸಿನಿಮಾ ತೆರೆಕಂಡಿತ್ತು. ಅಕ್ಟೋಬರ್ 14ರ ನಂತರ ಬೇರೆ ಭಾಷೆಗಳಿಗೆ ಡಬ್ ಆಗಿ ರಿಲೀಸ್ ಆಗಿ ಭರ್ಜರಿ ರೆಸ್ಪಾನ್ಸ್ ಗಿಟ್ಟಿಸಿಕೊಂಡಿತ್ತು. ಹಿಂದಿ ಹಾಗೂ ತೆಲುಗಿನಲ್ಲಿ ಸಿನಿಮಾ ಕಲೆಕ್ಷನ್ ಜೋರಾಗಿದೆ. ಎಲ್ಲಾ ಭಾಷಿಕರಿಗೂ ಸಿನಿಮಾ ಅದ್ಭುತ ಅನುಭವ ನೀಡುತ್ತಿದೆ. ಈಗಾಗಲೇ ಹಿಂದಿ ಹಾಗೂ ತೆಲುಗು ವರ್ಷನ್ ಕಲೆಕ್ಷನ್ 30 ಕೋಟಿ ರೂ. ದಾಟಿದೆ.

ರಿಷಬ್ ಶೆಟ್ಟಿ ವಿಜಯ ಯಾತ್ರೆ

'ಕಾಂತಾರ' ರಿಲೀಸ್‌ಗೂ ಮೊದಲು ಮುಂಬೈ, ಚೆನ್ನೈ, ಹೈದರಾಬಾದ್‌ಗೆ ತೆರಳಿ ರಿಷಬ್ ಶೆಟ್ಟಿ ಪ್ರಚಾರ ಮಾಡಿ ಬಂದಿದ್ದರು. ಇದೀಗ ಚಿತ್ರತಂಡ ಪ್ರೇಕ್ಷಕರಿಗೆ ಧನ್ಯವಾದ ತಿಳಿಸಲು ಬೇರೆ ಬೇರೆ ರಾಜ್ಯಗಳಿಗೆ ಹೋಗಿ ಬಂದಿದೆ. ಮುಂಬೈನ ಸಿದ್ದಿ ವಿನಾಯಕ ದೇವಸ್ಥಾನಕ್ಕೆ ರಿಷಬ್ ಶೆಟ್ಟಿ ಭೇಟಿ ನೀಡಿದ್ದಾರೆ. ಕೊಚ್ಚಿನ, ಚೆನ್ನೈ, ತಿರುಪತಿ, ವೈಜಾಗ್‌ಗೆ ಹೋಗಿ ಪ್ರೇಕ್ಷಕರ ಜೊತೆ ಸಿನಿಮಾ ವೀಕ್ಷಿಸಿದ್ದಾರೆ. ಸಿನಿಮಾ ಗೆಲ್ಲಿಸಿದ ಎಲ್ಲರಿಗೂ ಧನ್ಯವಾದ ತಿಳಿಸಿದ್ದಾರೆ. ಅದಕ್ಕೆ ಸಂಬಂಧಿಸಿದ ಫೋಟೊಗಳು, ವಿಡಿಯೋ ವೈರಲ್ ಆಗಿದೆ.