ಕ್ಯಾನ್ಸರ್ ಗೆದ್ದ ನಟಿಗೆ ಕೊರೊನಾ ವೈರಸ್ ಕಾಟ: ಆಹಾರ, ಔಷಧಿ ಸಿಗದೆ ಪರದಾಟ

ತಿನ್ನಲು ಸಿಗುತ್ತಿಲ್ಲ. ಔಷಧವೂ ಇಲ್ಲ

'ಲೈಫ್ ಇನ್ ಎ ಮೆಟ್ರೊ' ಸಿನಿಮಾ ಖ್ಯಾತಿಯ ನಫಿಜಾ ಅಲಿ, ಹಿಂದೂಸ್ತಾನ್ ಟೈಮ್ಸ್ ಪತ್ರಿಕೆಯೊಂದಿಗೆ ತಾವು ಅನುಭವಿಸುತ್ತಿರುವ ನೋವನ್ನು ತೋಡಿಕೊಂಡಿದ್ದಾರೆ. ಇಲ್ಲಿ ತರಕಾರಿ, ಹಣ್ಣು, ಔಷಧಿ ಯಾವುದೂ ಸಿಗುತ್ತಿಲ್ಲ ಎಂದು ತಿಳಿಸಿದ್ದಾರೆ.

ಒಣ ಆಹಾರವೇ ಗತಿ

'ಇಲ್ಲಿನ ಕಿರಾಣಿ ಅಂಗಡಿಗಳು ಆರು ದಿನಗಳಿಂದ ಬಾಗಿಲು ತೆರೆದಿಲ್ಲ. ನಾನೊಬ್ಬ ಕ್ಯಾನ್ಸರ್ ಸರ್ವೈವರ್. ಆರೋಗ್ಯ ಕಾಪಾಡಿಕೊಳ್ಳಲು ಸರಿಯಾದ ಆಹಾರ ಸೇವನೆ ಮಾಡಬೇಕು. ಆದರೆ ಕಳೆದ ಕೆಲವು ದಿನಗಳಿಂದ ನಾನು ಕೇವಲ ಒಣ ಪಡಿತರಗಳನ್ನು ಸೇವಿಸುತ್ತಿದ್ದೇನೆ' ಎಂದಿದ್ದಾರೆ.

ತರಕಾರಿ, ಹಣ್ಣುಗಳಿಲ್ಲ

'ಇಲ್ಲಿ ತರಕಾರಿಗಳಿಲ್ಲ. ಹಣ್ಣುಗಳೂ ಇಲ್ಲ. ನಮಗೆ ಯಾವುದೂ ಸಿಗುತ್ತಿಲ್ಲ. ನಾನು ಮೊರ್ಜಿಮ್‌ನಲ್ಲಿದ್ದು, ಇಲ್ಲಿನ ಜನರ ಸ್ಥಿತಿ ಭೀಕರವಾಗಿದೆ. ಪಂಜಿಮ್‌ನಲ್ಲಿ ಪರಿಸ್ಥಿತಿ ಚೆನ್ನಾಗಿದೆ. ಎಲ್ಲರ ಬದುಕಿನ ಬಗ್ಗೆ ನನ್ನ ಹೃದಯ ಮಿಡಿಯುತ್ತಿದೆ' ಎಂದು ತಿಳಿಸಿದ್ದಾರೆ.

ಮೂರನೇ ಹಂತದ ಕ್ಯಾನ್ಸರ್

'ಜುನೂನ್', 'ಬೇವಾಫಾ', 'ಯಮ್ಲಾ ಪಗ್ಲಾ ದೀವಾನಾ' ಮುಂತಾದ ಸಿನಿಮಾಗಳಲ್ಲಿ ನಟಿಸಿರುವ ನಫಿಜಾ ಅಲಿ ಅವರಲ್ಲಿ 2018ರಲ್ಲಿ ಮೂರನೇ ಹಂತದ ಕ್ಯಾನ್ಸರ್ ಪತ್ತೆಯಾಗಿತ್ತು. ಮಹಾಮಾರಿಯ ವಿರುದ್ಧ ಹೋರಾಟದಲ್ಲಿ ನಫಿಜಾ ಗೆದ್ದಿದ್ದರು.

ಕೊರಿಯರ್ ಕೂಡ ಇಲ್ಲ

ನಫಿಜಾ ಮತ್ತು ಅವರ ಮಗಳ ಕುಟುಂಬದವರು ಹತ್ತು ದಿನಗಳ ಕಾಲ ಗೋವಾದಲ್ಲಿ ಇರಲು ತೆರಳಿತ್ತು. ಆದರೆ ದೇಶವ್ಯಾಪಿ ಲಾಕ್‌ಡೌನ್ ಘೋಷಣೆ ಮಾಡಿದ್ದರಿಂದಾಗಿ ಅವರು ಅಲ್ಲಿಯೇ ಉಳಿದುಕೊಳ್ಳುವುದು ಅನಿವಾರ್ಯವಾಗಿದೆ. 'ನನ್ನ ಬಳಿ ಇದ್ದ ಎಲ್ಲ ಔಷಧಗಳೂ ಖಾಲಿಯಾಗುತ್ತಿವೆ. ಇಲ್ಲಿ ಕೊರಿಯರ್ ಸರ್ವಿಸ್ ಕೂಡ ಇಲ್ಲ. ಹೇಗೆ ಇರುವುದೋ ಗೊತ್ತಾಗುತ್ತಿಲ್ಲ' ಎಂದು ತಿಳಿಸಿದ್ದಾರೆ.

ನಫಿಜಾ ಸೋದರ ಸಂಬಂಧಿಗೆ ಕೊರೊನಾ

ನಫಿಜಾ ಮತ್ತು ಅವರ ಕುಟುಂಬ ಗೋವಾದಲ್ಲಿ ಸುರಕ್ಷಿತವಾಗಿದೆ. ಆದರೆ ನಫಿಜಾ ಅವರ ಸೋದರ ಸಂಬಂಧಿ ದಿಯಾ ನಾಯ್ಡು ಅವರಲ್ಲಿ ಕೊರೊನಾ ವೈರಸ್ ಸೊಂಕು ಇರುವುದು ಪತ್ತೆಯಾಗಿದೆ. ವೃತ್ತಿಯಿಂದ ನೃತ್ಯಪಟು ಆಗಿರುವ ದಿಯಾ, ಬೆಂಗಳೂರಿನಲ್ಲಿದ್ದಾರೆ. ದಿಯಾ ಅವರು ಸ್ವಿಟ್ಜರ್ಲೆಂಡ್‌ನಿಂದ ಬೆಂಗಳೂರಿಗೆ ಮರಳಿದ್ದರು. ತಾವೇ ಸ್ವತಃ ತಪಾಸಣೆಗೆ ಒಳಗಾಗಿದ್ದರು. ಬಳಿಕ ಚಿಕಿತ್ಸೆ ಪಡೆದು ಈಗ ಗುಣಮುಖರೂ ಆಗಿದ್ದಾರೆ ಎಂದು ನಫಿಜಾ ತಿಳಿಸಿದ್ದಾರೆ.